Gênesis 6 - Bíblia

Hoyakalu Kamhalene Hektutu Tsonu Kamhajetatshine Piranapni

¹ Wane rix-hixowletna yine tshij-hohoya hiyáhoni hwuhenetna hiwhenenna suxone.

² Waneya Hoyakalu whenene hetna jeji whenene suxone, kihlekakna. Hiyáhoni hhanunrotna satkaka ralukanrone potuko.

³ Hiyáhoni wane htshina Tsru Hixikatshriwa Hoyakalu: — Hita Hiwejinri hi ptowru hohneka yapretakna jejine klu tshinanu jeji hihituchani. Seyni yine hiwejinri hohne pejnu cento e vinte mhale tsonu riwekanna.

⁴ Hiyrunu waneklu papko rawapna tshij-hoho tseruwnapotutatshine potuko. Hiyáhoni wane pnute Hoyakalu whenene hapokmanexinna jeji whenene suxone waneya hmatuwhenexinna hwuhenene jejine. Hiyáhoni xyekaka jejine tsru hixkolune, tsru hchinikanurune psoluchaka kpohiyna mitshikawni.

⁵ Waneya retlu Tsru Hixikatshriwa Hoyakalu hi psokananru hektutu rapatjererna yine tshijiya hiyrunu rethixanutna yine hektutu tsonu ruchinikanretjetna rajiyna ptowru hohneruka.

⁶ Hoyakalu wan-tshina: — Klukta nikamhana nyi yine tshiji hwatshine hiyrunu nwamonuwahchinikanuta.

⁷ Waneya wane htshina Tsru Hixikatshriwa Hoyakalu: — Nkamhalene yine, tshiji hwatshine, namhakakannuna yine hiyrunu hocha hajeru hiyrunu ptowru hixatshri tshij-hoho yosrolotatshri hiyrunu kamejirune tenhohne yapatshine klu tshinanu nyokmanahchinikanuta nkamhalene tshinanu.

⁸ Seyni Hoyakalu hikchikhihlenutlu Noé tshinkaluru.

⁹ Xawakni Noé piranapni: Noé jeji kihlerni, maylokletni waneklu papko. Noé Hoyakaluyma yana.

¹⁰ Hwuhenene mapa, wannani Sem, Cão, Jafé.

Hoyakalu Hinkakletlu Hahyekachalu Pirana

¹¹ Hektuwaka tsonu hkamhajetna yine tshijiya Hoyakalu yhaleya hiyrunu muhlentshi tsonu tsepotlu tshiji.

¹² Hiyáhoni Hoyakalu hetlu tshiji. Halikaka hektupotlu tshiji klu tshinanu ptowru hiwekatshri rumtukhiweklexnawa psol-tshijneyako.

¹³ Waneya Hoyakalu wan-tshinru Noé: — Xawakni nuchinikanuwata nnikaxyawakaplu ptowru hiwekatshri klu tshinanu ptowru hektutu tsepotlu tshiji wanna htshinanna. Hiyáhoni nnikatanunna wannapni tshijiyma.

¹⁴ Xawakni pkamhanro sato tsro kanawa cipreste chpataya. Waneya totlo hitokote putakanru hihrukokaka. Waneya pyochitanro tsro kanawa chiptshajpalu hitoko sreta, maleka sret-koxa psahatanu.

¹⁵ Hiyáhoni wane pix-kamhaletanro tsro kanawa: cento e trinta e três metros rowuknu pixanro; vinte e dois metros ttsernu, ttennutlo treze metros pixanu.

¹⁶ Kanawapji cinquenta centímetros htennu wane psoji swa pixexini, psoluka hsajrukanu. Waneya hikwansata sreta putakanru satu hiphapto. Pkamhanru kwalkaka, satu kwalu tshiji nwaka hajeru, satu kwalu hanikaji hajeru, satu kwalu teno nwaka hajeru pkamhanu.

¹⁷ Hiyáhoni Hita honha yokanaxinipa xye tshijne nnikaxyawakapa ptowru hiwekatshri hanuruktako hiweka, xye tshijne hinniphaxikatshri, tenhohne hpuko hajeru nnikatanu. Ptowru potuko tshiji hwatshri nikawnanutka.

¹⁸ Noé, nkojiretanyi pixa satu nunkaklexinyi. Hiyáhoni pixa tsro kanawa jihlokanu pixa, piwhenene, pixa hnunro, piwhenene hnunrone koxa tsro kanawa jihlokanu pixayma.

¹⁹ Hiyrun-koxa ptowru hixatshri hiwekatshri, hepkaka ptowru hixatshri, satu jeji, sato suxo ppokotanu tsro kanawaya pixayma, riwejyawakapna pixayma.

²⁰ Ptowru hixatshri kamejirune, ptowru hixatshri hocha hajerune, ptowru hixatshri kammanetkaluru, ptowru hixatshri tshij-hoho yosrolotatshri koxa. Satu nerkaka hepkaka ppokotanu satu jeji, sato suxo hma mupniywakanupna.

²¹ Ppokotan-koxlu ptowru hixatshri niklurupa. Papatjetanru wale hnijyawakapna pixa, wanna koxa.

²² Waneya hanukta htshinru Hoyakalu wane potuko rixa Noé.