Gênesis 50 - Bíblia

Jacó-ni Hipniywaka Piranapni

¹ Waneya José hiknojnawa rurni hoho, htshiyahahohotanru, ramlutanru.

² Waneya kpinrewaklerune htowrene htowuta hpinimanexyawakanruna hma mujpahiywakanunapa rurni Israel. Waneya hpinitluna hma mujpahahapkaxyawakanupa.

³ Quarenta hohne pejnu hpinimanjetanruna hma mujpahahapkaxyawakanupa klu tshinanu hmujpahahapkaxyawaka hipnatshri pinixikolu quarenta hohne pejnu ralukka. Waneya egito-nerune hitshiyahatanru setenta hohne pejnu.

⁴ Waneya riknohinixka htshiyahaxyawakna hohne pejnu José hiynumatna phuru Faraó-pji hajene, wla htshinna: — Nanjithi, hikchikhihlenuxinipno, Faraó jemanu wla htshinanu,

⁵ “Nurni mitshi towutno nunkaklexyawaklu ranjire nkamhiywakapa. Wla mitshi htshinrewatni: Hetanu nupnakastsitkani hiyáhoni yomletshi njitotjixleru Canaã tshijneya pkapnaxinno. Hiyáhoni nanjityi hitshitanno nyiywakapa nurni nkapnatapyawakapa. Waneya nsatkapanu.”

⁶ Waneya phuru Faraó hihitlu, wla htshinru: — Wanetshi pyanu, purni pkapnatapanu ptshinyawakatka mitshi.

⁷ Waneya José hichpakatka hkapnatapyawakanaplu rurni. Phuru Faraó hchinikanu hepixatshine, hipji hajene hiyrun-koxa egito tshijne towutatshine ptowruneka himotsatlu.

⁸ José-pji hajene ptowruneka wane yatka, himolene ptowruneka, rurni pji hajene ptowruneka wane yatka. Mturune, ovelha-ne, boi-ne tsonu hi wane yatka seyni Gósen tshinikowaka ruknokamtna.

⁹ Hiyrun-koxa carro-ne cavalo kosleru waleyma wane yatka hiyrun-koxa yine cavalo yapatshine himotsatlu. Hiyáhoni rimotsatjene hixolune potuko.

¹⁰ Pa hixanu hiplokjexikowaka Atade tshinikowaka rapokatkana Jordão wennestsi hwatshri hwamonuwnatkana tsru tshiyahlu rixatkana. José hitaklu hwamonuwaxinri hohnena sete hohne pejnu rurni ruchinijinri hohne.

¹¹ Waneya wane hajene Canaã tshijne hajene hexinixkalu tshiyahlu pa hixanu hiplokjexikowaka Atade tshinikowakaya wla htshinatkana: — Halikaka egito-nerune wamonuwnapotuta. Hiyáhoni pa hixanu hiplokjexikowaka Jordão wennestsi hwatshri Abel-Mizraim rutakhiwakatluna.

¹² Waneya Jacó-ni whenene rixa towutlekanaxyawakatkana rixna.

¹³ Hiwhenene jejine hanikanru Canaã tshijne nwaka waneya hkapnatanruna himriji hwapnatatshri Macpela tshinikowaka campo-teya Manre tshinikowakastsi hwatshri. Xye campo mitshi Abraão-ni hanjixyalu Efrom tshinkaluru hitita-neru yomletshi rixikowakapa.

¹⁴ Waneya rali kapnaletanruna rurni José, himolene hiyrun-koxa ptowruneka rimotsatjene rurni hkapnatapyawakna satokatka Egito tshijne nwaka.

José Hamtakahchinikanyehixyawakna Himolene Kamnixyawaklu Mitshi Piranapni

¹⁵ Waneya José molene hexinixkalu rurnina hipniywakatka wla htshinatkana: — Xawakni pa katako José hahnanutanwu, wale hetko hapnutanwu hektutu ptowruka wkamhiywaklu tshinanu.

¹⁶ Waneya yonawahlo hyokananwakatluna José wla htshinruna José: — Purni mitshi hma mupnaknuklunuwa htowutyi.

¹⁷ Wla htshinakjixatkawu wtshinyawakapyi mitshi: “Nanjityi pamtakahchinikanyehixyawakapna pimolene hektunu, hkamhiyatkayina mitshi.” Hiyáhoni wanjityi puru Hoyakalute towrerune hektunu puknokyehixinwu. Waneya wanna tokanu hjeminixka José htshiyahatatka.

¹⁸ Waneya himolene potuko yanwakatlu hyoptsojityehitluna tshiji rutspakhojitatkana waneya wla htshinruna: — Hetanu pixa towrerunekwu hixa.

¹⁹ Waneya José wla tshinatkana: — Hi hpikanu. Hkahwakluhe Hoyakalno hita?

²⁰ Hix-honra haluka hektuwaka kamhalexyamkano mitshi seyni Hoyakalu halukatkalu kihleru rakanhakajyawakapa, hixo yine riwekkajyawaka wexyawakapa haté xawakni hohne.

²¹ Hiyáhoni hi hpikanu. Nohlutanhi hixa hiyrun-koxa hixa whenene nohlutanu. Waneya rapnanuhchinikankakatkana. Kihlewaka htshinatkana.

José-ni Hipniywaka Piranapni

²² José hiyrun-koxa rurni pji hajene Egito tshijne hwatka. José hiwekatka cento e dez mhale pejnu.

²³ Efraim whenene whenene retatka José. Hiyrun-koxa Manassés whene Maquir tshinkaluru whenene hyoptota hatatjewa wale wheneneko rixyawakna.

²⁴ Waneya hma mupnaknu pchinika José, José hinkakna himolene, wla htshinna: — Nupnakastsitkani. Seyni Hoyakalu halikaka hiphujewnayehitanhi hiyrun-koxa xye tshijne hkochpajiniphi, ranikanhi tshiji runkaklexyalu Abraão-ni, Isaque-ni, Jacó-ni nwaka.

²⁵ Waneya José towutna Israel whenene runkaklexyawakluna, wla htshinatkana: — Halikaka Hoyakalu hakanhayehitanhi waneya waneklu papko nohapu hewi tshijne hanijini.

²⁶ Waneya rupnanatka José-ni. Cento e dez mhaletkalu. Hpinitluna hmujpahyawakanunapa waneya kapajiru rutakmanetanruna Egito tshijneya.