Gênesis 49 - Bíblia

Jacó Kihlewaka Htshinanwakaxyawakna Hiwhenene Piranapni

¹ Waneya Jacó hepukatkana hiwhenene, wla htshina towutletna: — Hapatjexinwa hit-yehi nunkajyawakaphi klu hkanhayehitanhi hinatshripa hohne.

² Jacó whenene hapatjetatka hjemyawakapluna rurna Israel tokanu.

³ — Rúben pixni nowhene tsrujruyi, pixni nmixkonyi. Nmixkowle himathexikolu yinuwakle pixni. Tsru kahwakpiratkalurumkapyi, tsru himukatatshrimkapyi.

⁴ Mpokokotu honha pixka pixa. Hiyáhoni hike pkochpakanu Klu tshinanu puru hnunro pyoknachayehita, nhanunro papokmanetatka, nojeko pumtukatka.

⁵ Simeão, Levi moletkakatshinetka. Hyohlolewapre hiylakaklu tsonu ruchinikanreta.

⁶ Wanna hchinikanu hi homkahitanu, Hiyrun-koxa hi himapatjetanna klu tshinanu hmatsyinna tshinanu rahnannu tshinanna yine ruylachatatkana. Raluka hixlechaxyawak-tshinanna boi-ne koxni rustajikotsamtna hmayanyawakanupna.

⁷ Hahnanuwle kamakatkalurupni klu tshinanu kmatsyipotlu Hjihekanunna himtuklewata Hiyáhoni Jacó tshijneya nkaniprexinna hiyrun-koxa Israel hajene yehi nupalkajinna.

⁸ Judá pixa himalwutko pimoleneya. Pkamnitjene hi pallirijixinwa. Puru whenene yonohiyehitanyi.

⁹ Judá leão whene mtserutuwa pixkalutni. Pkamnireru, puylaleru yehi psatjetanu, noturu. Leão pixka pixa hikoluhleta, pukóluha leão tsruru pixkalutyi hi rawa pkamnitjeru.

¹⁰ Phuru hi hmahatanu Judá klopichaya hiyrun-koxa hi hmahatanu towutatshri hiklopichaneya hma mapokkanu pchinika Towutatshri Potuko. Waneklu ptowru yineru kajnakolunepa wale yehiya.

¹¹ Hipra jumento htsatanu rutakle uva-tsaya hiyrun-koxa rutakle uva-ptshetsa herotu htsaxinri hipra jumento whene. Wale mkalu herokakotka vinho-haya, himkalu vinho-ha serohaluya rerojiko.

¹² Hiyhale hi rapkathojixini vinho-ha tshinanu hiyrun-koxa hiyhi leite yohnika hlatnuplu.

¹³ Zebulom mar powha wnaha hwanu. Hiyáhoni tsro kanawa yopjewaklepatkani. Haté Sidom tshinikowaka htshijnepatka.

¹⁴ Issacar jumento hixkolu pixkalutupni. Ptowru sretako hwunuxikolu jimukluhaklerupni wale.

¹⁵ Retlu rimapnanwunruchaxini hikamtúholu hiyrun-koxa retlu htshijne hikamtu rixahotlu. Wunutshri rutjipichata hike htshina. Hiyáhoni htowutko, hkamrurewachatanu hike hwenutko.

¹⁶ Dã himatshwahanna himolene neru xkehi israel-neru ptohikaka hma mikahwajikowakanupa.

¹⁷ Dã himnu hatnu hapo kwakleru pixkalutupni, himnu kamaklewatatshripni yine yapawakle hapo hwatshripni. Cavalo jixi rachkatanu, hiyáhoni hjijrukanru cavalo tji yapatshri.

¹⁸ Ha Tsru Hixikatshriwa Hoyakalu hektuntshi yehi nuchokakjeryi pixa. Xyekni nkahwakjekanata.

¹⁹ Gade kamnitko seyni wale potu hallitanunna wannapni. Waleko hkamnitjene hatjini hyanu.

²⁰ Aser nikawakle nijittshi hwapotutanu. Rutakanru nijittshi phuru nikleru.

²¹ Naftali kchoteru hichotkaluru pixkalutupni. Kihle tokanuplu, tokantshi hepixlewatatshri htshinanu.

²² José hahmuna kwakleru pixkalutupni. Hahmuna hakophastsi hitakkaluru pixkalutupni. Hiplukaka cerca pa sreta rontapluxini.

²³ Runokakjenemka kamnipotutatkalu, rinokamkatkaluna katshraluya, rahnanutmakluna.

²⁴ Seyni wale koxa hi rimenuwakatshraleta, hiyrun-koxa himyo mixkowatatka Jacó Hoyakalute myo hixkolu himukatleyma. Suslahlewakleru hiwaka tshinanu, israel-nerune sotle.

²⁵ Puru Hoyakalute tshinanu, pepixjeru. Ptowru himukatatshri tshinanu pserutjerni wale tenhohne hajeru teno hwatshri, pserutjerni tenohalu hitokha hwatshri. Pserutjerni whenewluya hiyrun-koxa ptowru hixatshri matutatshri pserutjerni wale.

²⁶ Puru tserutjeru nowhenene tserutatshri yohnika, teno mrijiwaka mnikawnakatupa pa tserutle hixlewatatshri. Waleko htserutjeru José jiwu hoho hwanu, himolene jiwu hoho rawanutka satu sahyi pixka.

²⁷ Benjamim lobo yahakatshri pixka rixanu. Yetshpotukawa hnikanru hkachireru. Kayi sreta ritshetleru rapsalewatanu.

²⁸ Nyikaka doze xkehna israel-nerune. Xye tokantshi tserutlewatatshri htshinanwakatna rurna. Satkaka yoptotatkalu waleko htserutjeru pirana ruru tserupiranaxyana.

Jacó-ni Hipniywaka Piranapni

²⁹ Waneya hiwhenene htowutatka. Wla htshinatkana: — Hi howukchini nomolenni yehi napatjexinitka hiyáhoni kapna hipjita jitoxikolu Efrom hitita-neru campo-te hwatshri nurunni kapnaxikowaka hkapnatanno hita.

³⁰ Kapna hipjita jitoxikolu campo Macpela tshinikowaka, Manre tshinikowakastsi hwatshri Canaã tshijneya Efrom tshinkaluru hitita-neru ranjixya yomletshi rixyawakapa wane hkapnatanno.

³¹ Wanekni hkapnatkana Abraão-ni, hhanunro Sara-ni wane tkapnatkana, Isaque-ni wane hkapnatkana, hhanunro Rebeca-ni wane tkapnatkana. Wane koxakni nkapnatanro Lia-ni.

³² Wale campo hanjitkaluru hiyrun-koxa kapna hipjita jitoxikolu hitita-nerune hanjitkaluru.

³³ Waneya rali wane tshinretna hiwhenene rukoluhatka rupnanatka. Himolenni yehi rapatjexyatka.