Gênesis 48 - Bíblia

Jacó Kihlewaka Htshinanwakaxyawaklu Manassés Hiyrun-Koxa Efraim Piranapni

¹ Waneya hi hix-hohnewani runkakka José, wla htshinka: — Puru hima yeyixa. Hiyáhoni hyanwakatlu retapyawakaplu. Hiwhenene jejine hepi ranikatka Manassés tshinkaluru hiyrun-koxa Efraim tshinkaluru.

² Waneya runkakka Jacó, wla htshinka: — Pituru José hinatka rexyawakapyi. Waneya Israel mixkoxnawa hpalnatka rukoluhakanaxyawakaya htuplaxya.

³ Waneya Jacó wla tshinru José: — Hoyakalu Ptowru Potuko Himukatatshri hakanhayehitno Luz tshinikowakaya Canaã tshijne. Wanekni kihlewaka htshinanwakaxyano.

⁴ Wla htshinatkano: “Nwuhenewakakanyi, nixolewkakanyi satu neru hixolune nixkakanyi. Xye tshiji nenekanyi pimwiywakaplu pixa hiyrun-koxa piklopichane pixa hatjini hakanhatshinepa nenekanru rumutujyawakapluna tshiji hike rixiniko mnikawnakatupa.

⁵ Hiyáhoni xawakni piwhenene jejine hepi pmatkaklene Egito tshijneya pix-yehi nmapokkanuklunuwa Egito tshijneya wanna hitanni Rúben hiyrun-koxa Simeão nimwiywaka pixka rixna.

⁶ Piwhenene wanna hapkatatatshine pixanpatkani. Seyni wanna himolene hiwaka himaxikolupna hyoptoxyawakapluna htshijne hyoptolerupna.

⁷ Padã nunya mitshi tsru wamonnu neta Raquel-ni hipnale tshinanu Canaã tshijneya wunamxinixka mitshi hatnu hapoya. Hi tsru mahatatka Efrata tshinikowaka wapojyawaka tupnanatka. Waneya nkapnatatkalo hatnu hapoya Efrata nwaka hapo. Walekni Belém tshinikowaka.”

⁸ Waneya Israel hexinixkana José whenene jeji repomhalu, wla htshinru: — Katu whenene nyi?

⁹ Waneya José hihitlu, wla htshinru: — Nyi nowhenene jejine Hoyakalu henejyano hewi tshijneya. Waneya Israel wla tshinru: — Panikanna hita nwaka kihleru ntshinanwakaxyawakapna.

¹⁰ Israel hi hapkathojipotutatka rutsruknu tshinanu. Waneya José hanikatkana walestsi. Israel hamlutatkana hsaprikatkana.

¹¹ Waneya Israel wla tshinru José: — Hetanu hi nkahwakatkalu pixa nexyawakatnaka seyni Hoyakalu tshinanu hi pixa tsonu netatnaka seyni piwhenene koxa netatka.

¹² Waneya José Israel hikwakananrene hiwhenene hkochtsheka waneya hyonohiyehitlu tshiji rutspakhojitatka.

¹³ Waneya José hiwhenene hepi ranikanwakatlu ruru Efraim hpotukle sreta rutaklu, Israel pastate sreta. Waneya Manassés José pastate sreta hwa Israel potukle sreta rutaklu. Wane hixatshine Israel-stsi potuko hyatka.

¹⁴ Waneya Israel hyosurukamyotatka. Seyni himyo potukle Efraim jiwu hoho rutaka, pasta sreta myo Manassés jiwu hoho rutaklu. Manassés-mka whentshi tsrujru seyni Israel hipekomyotatka.

¹⁵ Waneya kihleru htshinanwakatlu José, wla htshinru: — Nanjitlu Hoyakalu nurunni Abraão-ni, Isaque-ni homkahleru, nohlutjeru niwejinri pchinika haté xawakni,

¹⁶ Hiwejikaluru tenhohne hajeru nepixjeru ptowru hektutu niknohkakjeru nanjita kihleru rixyawakapna maklujine. Hita hiwaka hhiwakaxikolupna hiyrun-koxa nurunni hiwakkaka Abraão-ni, Isaque-ni hhiwakaxikolupna. Htseruxikowakapna hixolune rixikolupna tshiji hanikajiteya.

¹⁷ Waneya rexinixka José ruru Efraim jiwu rutakamyoxyawaka hpotukle myo, hi rukchikhihlenutlu. Waneyakmakni himyo rimaletpirata hyahota yokmaklemyotmaklu Efraim jiwu hkochtshekamyoxyawakamkaplu Manassés jiwu hohomka rutajyawakaplu.

¹⁸ José-mka wla tshinru ruru: — Papa, hi wane pixanu klu tshinanu xyekni tsrujru. Ppotukle myo Manassés jiwu hoho putakanru — htshinmaklu.

¹⁹ Seyni ruru hi kajnakotka. Wla htshinru: — Ha noturu nimatmaka. Wale koxa pa neru ptohi hixikowakapa yineru tsru kahwakpiratkalurupni seyni repuru wale yohnika tsrunupni. Wale whenene hixo nerune hakanhinri.

²⁰ Wla rixa kihlewaka tshinyehitna wale hohne: — Hixa tshinanu kihleru htshinyehitkona israel-nerune, wla hima htshinkona: “Hoyakalu Efraim, Manassés rixyawaka koxa rixanhi hixa.” Hiyáhoni Efraim rutaka mitshikananu rixyawaka Manassés hapkatatatshri rutakatka.

²¹ Waneya Israel wla tshinru José: — Nupnanu hita seyni Hoyakalu pixaymalu hiyrun-koxa ranikanyi purunni tshijne pyiywakpatnaka.

²² Hiyrun-koxa pixa pimolene yehi yohnika tsruyyi hiyáhoni pixa nenekanru tshiji teno mrijiwaka amorreu-nerune nkonrere tshiji. Wale tshiji hitako konyanatkana nkatshraleyma hiyrun-koxa nkachretwayma nkonyanatkana wale tshiji.