Gênesis 47 - Bíblia

Jacó Egito Tshijne Rawyawakapa Piranapni

¹ Waneya José hapokanwakatlu phuru Faraó waneya wla htshinru: — Nuru, nomolene hapokatka hipraneyma hiyrun-koxa ptowruka rimwalerna rimapokatkana. Canaã tshijne ruchpajyatkana hiyáhoni xawakni Gósen tshinikowaka rapokatkana.

² Waneya cinco himolene hnureta waneya phuru Faraó rekhitapna.

³ Waneya phuru Faraó hepomhatkana, wla htshinatkana: — Klunernihe hkamrure? Waneya ruhitluna, wla htshinruna phuru Faraó: — Hixa pratshine suslahaklerunwu. Hixa wane wixa kamrureta wutsrukatenni kananuko haté xawakni.

⁴ Hiyrun-koxa wla htshinruna phuru Faraó: — Wkata wuna hewi tshijne wiywakapa. Klu tshinanu peklo hi hwa wiprane tshinanupa klu tshinanu hmixkowata natshi Canaã tshijneya. Hiyáhoni xawakni wanjityi pitshitanwu Gósen tshinikowaka wwiywakapa.

⁵ Waneya phuru Faraó wla tshinru José: — Puru hiyrun-koxa pimolene hapoyehitatkayi.

⁶ Egito tshijne psoluka nitshixyayi. Hiyáhoni tshiji kihlewak-potuko putakanru puru hiyrun-koxa pimolene wane putakanu wane rawyawakapna Gósen tshinikowaka tshiji. Hiyrun-koxa rawyinipa satkaka jmereru wale putakanu noprane hislahatshri towutatshri rixyawakapna.

⁷ Waneya José hanikatkalu ruru. Rutakatkalu phuru Faraó hetanuya. Waneya Jacó kihleru pirana htshinanwakatlu phuru Faraó.

⁸ Waneya phuru Faraó hepomhatkalu Jacó wla htshinatkalu: — Hi pejnu mhaletkayihe?

⁹ Waneya Jacó yanumatatka, wla htshinatkalu phuru Faraó: — Niwejinri hohne pejnu cento e trinta mhale. Hi hixo mhale niwekahoxnawawa hiyrun-koxa tsru kojwaklu neta niweka pchinika. Wanepnawaka hi nutsrukatenni mhale pejnu napkapkawa.

¹⁰ Waneya Jacó kihleru pirana htshinanwakatlu phuru Faraó. Waneya hyatka.

¹¹ Waneya José hitakatkalu ruru hiyrun-koxa himolene rutaka Egito tshijne rawyawakapna. Kihleru tshiji potuko renekna rumutujyawakapluna Ramessés tshinikowaka tshijne renekna phuru Faraó tshinyawaklu pixka.

¹² Hiyrun-koxa rohlutlu ruru hiyrun-koxa himolene, rurupji hajene ptowruneka rohlutatka honantshiya satkaka xkehi hijhaleru pso reneka.

Tsru Natshi Hohne Pejnu Piranapni

¹³ Waneya tsru natshi hakanhatka wale tshijne psoluka klu tshinanu hi rawapa nijittshi. Tsru natshi potu retna hiyáhoni ruhrokna Egito tshijne hajene hiyrun-koxa Canaã tshijne hajene hihrokatka tsru natshi tshinanu.

¹⁴ Waneya José tiyiro ptowruka rapatjetatka honantshi hanjixikolu tiyiro Egito tshijne hajene tiyiroteya hiyrun-koxa Canaã tshijne hajene tiyiroteya. Waneya wale tiyiro ranikatka phuru Faraó-pji nwaka.

¹⁵ Waneya yine Egito hajenni tiyirote mahatatka hiyrun-koxa Canaã tshijne hajenni mahatiyirotetanatka waneya yine yanwakatlu José waneya wla htshinruna: — Honantshi penekanwu! Hi petachatanunwu wupniywakapa tiyiro mahle tshinanu.

¹⁶ Waneya José wla tshinatkana: — Haté hehe hiprane henekanno waneya nijittshi nenekanhi hiprane kachrijru.

¹⁷ Hiyáhoni hiprane ranikanwakatluna José. Waneya José honantshi renekna cavalo-ne kachrijru, ovelha-ne kachrijru, boi-ne kachrijru, jumento-ne kachrijru renekna honantshi. Wale mhale psoluka rohlutatkana honantshi hiprane kachrijru.

¹⁸ Waneya wale mhale hiknohatka waneya hepi rixinri mhale hsatokanwakatluna José, wla htshinruna: — Hi wyohimayehitanyi pixa wutsrukate tiyiro wmahaxya, wiprane koxa pumutukatka pixa wutsrukateyi hiyáhoni hike potuko wumutukatka seyni wimanepka wimwatka hiyrun-koxa wtshijne tsonu, seyoka.

¹⁹ Hiyáhoni kluhe wimetachatko wnikaxikowakapa hixa hiyrun-koxa wtshijne nikaxikowakapa pixa hetanuya? Hiyáhoni panjitanunwu hixa hiyrun-koxa wtshijne panjitanu honantshi kachrijru waneya phuru Faraó towrenepatkawu. Hitataji penekanunwu wiwejyawakapa, wma mupniywakanupa natshi tshinanu, tshiji mutakletu hmixyawakanupa.

²⁰ Hiyáhoni wane rixa José hanjixyalu Egito tshijne psoluka phuru Faraó tshinanupa klu tshinanu egito-nerune ptowruneka hichanjiyatkalu wannako h-campo-tna klu tshinanu tsru natshi retna wanna ptowruneka hiyáhoni wale tshijne ptowruka rimwatka phuru Faraó.

²¹ Hyokmakatkana yine kahnete hwakanatatshine haté ptowru sreta Egito tshijne mahle sreta hwakanatatshine, poktshi rawyawakapna.

²² Sacerdote-ne tshijne tsonu hi ranjitatka klu tshinanu wanna phuru Faraó kotnujyatkana hnikanrupna. Hiyáhoni hi ruchankaluna htshijnena.

²³ Waneya José wla tshinna yine: — Hetanu, xye hohne hixa nanjitatka phuru Faraó tshinanupa hiyrun-koxa hixa tshijne nanjitatka phuru Faraó tshinanup-koxa. Seyni hewitkalu hitataji, hixa tshinanupni. Wala tataji hitakanru tshiji.

²⁴ Hiyahpakni rixowlewninipa psoji satupka cinco psojite phuru Faraó henekanu seyni quatro psojite hixanpatkani hitataji hitaklerupa tshinanupni, hnijitu tshinanu koxni, hixapji hajene niklerupa tshinanupni hiyrun-koxa hiwhenene niklerupa tshinanupni.

²⁵ Waneya wanna wla tshinru: — Piwekkakatkawu. Hiyáhoni pixa wutsrukatyi pukchikhihlenuxyawakwu tshinanu phuru Faraó towrertshinepatkawu.

²⁶ Waneya José satu towuwlu hkamha Egito tshijne hajene tshinanu. Satupka cinco-te rutaklena renejikowakapa phuru Faraó seyni sacerdote-ne tshijne tsonu hi phuru Faraó renekapsojitetko. Wane rixa towuwleta Egito tshijne haté xawakni.

Jacó Hanjire Ralipre Piranapni

²⁷ Waneya Israel Egito tshijne rawatkana Gósen tshinikowaka tshijne. Hejnu rapatjeyehixnawana, hwuhenewatna, rixowlepotutatkana.

²⁸ Egito tshijne riwejyatka Jacó dezessete mhale pejnu hiyáhoni riwejinri mhale pejnu cento e quarenta e sete.

²⁹ Waneya rupnakastsi Jacó, hituru José repukatka waneya wla htshinru: — Pukchikhihlenuxinno nanjityi pimyo noskota putakanu, punkakanno kihleru pixanno, hi Egito tshijne pkapnatanno ptshinanno.

³⁰ Hiyahokni nomanni panikanu Egito tshijne malekate nurunni yomle nwaka wannani hinaple nkapnaxikowakapa. Waneya José wla tshinru: — Ptshinakanaxyawaka nkamhanu.

³¹ Seyni Jacó wla tshinru: — Ptshinanno pixyawakapno. Waneya José hinkaklu rixyawakaplu pa hohne. Waneya Israel yonohita rukoluhawakleya.