Gênesis 46 - Bíblia

Jacó, Egito Tshijne Hyokmanyawakapa Piranapni

¹ Waneya Israel wane hichpajyatka, hyatka rimwaleru ymakananuko. Waneya Berseba rapokatka. Waneya waneko henekachalkaka renejyalu rurni Isaque-ni Hoyakalute.

² Waneya Hoyakalu hiynumatlu Israel hoyetshno rupnawleya, wla htshinru: — Jacó, Jacó. Waneya wla htshina: — Hewino hita.

³ Waneya wla htshina: — Hitni Hoyakalu, purni Hoyakalutno. Hi ppika Egito tshijne nwaka yaletanu. Satu neru hixkolune nixkakanyi waneya.

⁴ Egito tshijne nwaka nyanu pixayma. Hiyrun-koxa pa hohne wane nkochpakkajinyi. Pupninipa José hichyayhaletanunyi himyoya.

⁵ Waneya Jacó Berseba hichpajya. Hiyáhoni Israel whenene hanikatkalu rurna Jacó, hwuhenenna, hhanunron-koxa ranikamtna, carro-ne hyapna phuru Faraó yokanrero Jacó ranijyawakapna.

⁶ Ranik-koxna hiprane hiyrunu ptowruka rimwalerna Canaã tshijne rukchijinruna ranikna. Hiyáhoni Jacó klopichane ptowruneka Egito tshijne yatka.

⁷ Jacó hanikna waleyma haté Egito tshijne, hwuhenene, himekahine, hwuhenene suxone, himekahyone, hiklopichane ptowruneka ranikamta.

⁸ Xyekni Israel whenene Jacó klopicha Egito tshijne nwaka yatshine hiwakkaka: Rúben hiwakatletatshri, Jacó whene tsrujru.

⁹ Xyekni Rúben tshinkaluru whenene hiwak-pirana: Enoque, Palu, Hezrom, Carmi hiwakatletatshine.

¹⁰ Xyekni Simeão tshinkaluru whenene hiwak-pirana: Jemuel, Jamim, Oade, Jaquim, Zoar, Saul hiwakatletatshine. Saul tshinkaluru suxo canaã-nero whenni.

¹¹ Xyekni Levi tshinkaluru whenene hiwak-pirana: Gérson, Coate, Merari hiwakatletatshine.

¹² Xyekni Judá tshinkaluru whenene hiwak-pirana: Er-ni, Onã-ni, Selá, Perez, Zerá hiwakatletatshine. Er-ni tshinkalurni hiyrun-koxa Onã-ni tshinkalurni Canaã tshijne rupniyana. Perez tshinkaluru whenene hiwaka Hezrom hiwakatletatshri, Hamul hiwakatletatshri.

¹³ Xyekni Issacar tshinkaluru whenene hiwak-pirana: Tolá, Puá, Jasube, Sinrom hiwakatletatshine.

¹⁴ Xyekni Zebulom tshinkaluru whenene hiwak-pirana: Serede, Elom, Jaleel hiwakatletatshine.

¹⁵ Lia tshinkaluro whenene jejine wane pnute towhene Diná tshinkaluro tmatkajyatkalu Jacó Padã-Arã tshinikowaka tshijneya nyikatkani wanna. Hiwhenene Lia matkaklen-pejnu trinta e três.

¹⁶ Xyekni Gade tshinkaluru whenene hiwak-pirana: Zefom, Hagi, Suni, Esbom, Eri, Arodi, Areli tshinkalune.

¹⁷ Xyekni Aser tshinkaluru whenene hiwak-pirana: Imna, Isvá, Isvi, Berías tshinkalune. Wanna mole suxo Sera tshinkalúroni. Berías tshinkaluru whenene Héber, Malquiel tshinkalune.

¹⁸ Nyikaka Zilpa tshinkaluro Labão tshinkaluru towrero renejyalo hiwhene Lia whenene hiwak-pirana tiwuhenexyalu Jacó. Toklopichane pejnuni dezesseis.

¹⁹ Jacó hnunro Raquel tshinkaluro wuhenetlu José, Benjamim.

²⁰ Waneya José hnunro Azenate tshinkaluro, Potífera tshinkaluru Om tshinikowaka sacerdote-te whene whenetlu Manassés, Efraim.

²¹ Benjamim whenene Belá hiwakatletatshri, Bequer hiwakatletatshri, Asbel hiwakatletatshri, Gera hiwakatletatshri, Naamã hiwakatletatshri, Eí hiwakatletatshri, Rôs hiwakatletatshri, Mupim hiwakatletatshri, Hupim hiwakatletatshri, Arde hiwakatletatshri.

²² Nyikaka Raquel whenene jejine tmatkajyatkalu Jacó, quatorze pejnuna.

²³ Dã tshinkaluru whene Husim htshinka.

²⁴ Naftali whenene jejine pejnu Jazeel, Guni, Jezer, Silém.

²⁵ Nyikni Bila tshinkaluro Labão tshinkaluru towrero renejyalo hiwhene Raquel whenene jejine hiwakkaka tmatkajyatkalu Jacó, sete-na.

²⁶ Ptowruneka yine raptowrurna Egito tshijne yatshine Jacó-yma Jacó whenene hnunrone mutakyahojikowakanu pnawaka sessenta e seis yinetkana.

²⁷ Hiyrun-koxa José whenene hepi Egito tshijne matuxikatshine. Hiyáhoni Jacó himwalune Egito tshijne hapokatshine ptowruneka setenta yine pejnu.

José Ruru Hyoptoxyawaka Piranapni

²⁸ Jacó yokanatlu Judá hyihapyawakaplu José nwaka rekhixyawakaplu Gósen tshinikowaka nwaka ya hapotatshri. Waneya Gósen tshinikowaka rapokatkana.

²⁹ Waneya José halpokotatkalu h-carro-te cavalo kosleru hyoptoxyawakaplu ruru Israel Gósen tshinikowaka rapojinpatka. Hyanwakatlu Israel hsaprikatkalu hihoji wale thana rutspakatka wane hixatshri hotshiyahle rixa ruru thanaya.

³⁰ Waneya Israel wla tshinru José: — Xawakni numukata hipnaletanu klu tshinanu piwekawa hiyrun-koxa pix-hoji netpotutatka.

³¹ Waneya José hiynumatatkana himolene, wla htshinatkana wanna hiyrun-koxa wla htshinna rurupji hajene: — Phuru Faraó yehi nyanu nuphujexinwa wale yehi hiyrun-koxa nunkakanru nomolene hiyrun-koxa nurupji hajene Canaã tshijne hwakanatatshine hapokyehitno.

³² Nunkakanru: “Wanna jejine pratshine suslahaklerunni hiyáhoni hkamrurnina pratshine rohluxyawakna. Ranikapratatkana ptowruka hiyrun-koxa ptowru rimwalerna ranikatkana.”

³³ Hiyáhoni phuru Faraó tomhiniphi, repomhiniklunuphi klu kamrurtshi kkamhaklerunhihe htshininiphi,

³⁴ Wla htshinanru: “Hixa ptowrerunwu pratshine suslahaklerunwu wmatureyakawa haté xawakni. Hixa wane wixjeta wutsrukatenni klukananuko haté xawakni.” Wane htshinanru ritshixyawakaphi Gósen tshinikowaka hwiywakapa klu tshinanu pratshine hislahikolu malukkotu kamrurtshi hkahwaka egito-neruneya.