Gênesis 45 - Bíblia

José Hiphujexnawakwa Himolene Yehiya Piranapni

¹ Waneya José hi rakota wamonnutatka htowrene hetanu hiyáhoni hsaplewatatka: — Hichpajinixkano ptowruneka hita hojiya. Hiyáhoni hike José yehi hitukatka ruphujexnawa rimathetatkaluna himolene.

² Waneya tsru tshiyahlu rixatka José. Egito-nerune yijnakotlu haté Faraó-pji hajene koxa yijnakotlu htshiyahaxyawaka.

³ Waneya José wan-tshinna himolene: — Hitni José-no! Riwekawhe nuru? Seyni himolene hi himukata hihretlu klu tshinanu hpikpotutluna José klu tshinanu hihoji sreta rawakanatna.

⁴ Waneya José wla tshinna himolene: — Hinanu hitastsi. Waneya wane rixna waneya José wla tshinna: — Hita hixa molno, José-kno hita, Egito tshijne hichanjinrikno hita!

⁵ Hiyáhoni xawakni hi hkojwakahchinikanutanu hiyrunu hi hahjinwa wkata hichanjiywakno tshinanu klu tshinanu Hoyakalu hixkajyawakno hewi napokahnaputhi yine riwekajyawakapa.

⁶ Hepi mhale tsru nattshi hwa tshiji psoluyaka hiyrunu cinco mhale pnute hike hsana hitakanu, hikepni honantshi.

⁷ Seyni Hoyakalu yokanatno hixa pnute rimrexyawakaphi satkaka yineru hixetatshri tshijiya riwekkajyawakaphi tsru hiwekluya.

⁸ Hiyáhoni hi hixa hewi yokanatno seyni Hoyakalu yokanatno wkata haté Faraó hiru pixka nixa hiyrun-koxa Faraó-pji psoluka ntowuxyawaka Egito tshijne koxa psoluka ntowuta.

⁹ Hiyáhoni hchiretanu nuru yehi hsatkapyawakapa wane htshinanru nuru: — Wane rix-hinkaklekjixwu pituru José: “Hoyakalu hitakno tsru hixikatshriwa nixyawaka Egito tshijne psoluyaka hiyáhoni pchireta serpiklenwakatanno. Hi hohamokapyi.

¹⁰ Gósen tshiji pwanu, hitastsi pwanu pixa, piwhenene, pimekahine, piprane, piprane wakane hiyrun-koxa wale ptowruka pimwaleru hitastsi hwanu.

¹¹ Wane nuslahinyi klu tshinanu hmahatawa cinco mhale tsru nattshi. Nma muslahakanuklunupyi pixa, pixa pantshi hajene, payinetene koxa tsru potuko mahaxini.”

¹² Hix-honra hetlu hiyhale potuko hexyalu hiyrun-koxa nepuru Benjamim yhale potuko hetlu hitni, nonama potuyako niynumsaxyahi.

¹³ Hiyáhoni xawakni nuru hinkakanu hi pa himukatlukananno Egito tshijneya hiyrun-koxa hinkakanru ptowru hetleru pirana. Hchiretanu nuru hanijyawakapa wkata.

¹⁴ Waneya hsapriknojitatkalu repuru Benjamim, htshiyahata. Hiyrun-koxa Benjamim saprikatkalu wale, htshiyahatkoxatka wale.

¹⁵ Hiyrun-koxa pimrine himolene ptowruneka ramlutatka, hix-hohne hmexyawakanna pohwaka tshinanu htshiyahatatkana. Waneya wane pnutetka himolene hiynumatlu.

¹⁶ Waneya José molene hapojyawaka pirana pohiwatatka haté phuru Faraó-pji rapokpiranatatka klu tshinanu runkakkatka, wla htshinruna: — José molene hapokatka. Xye pirana poyikotpotutlu phuru Faraó.

¹⁷ Waneya Faraó wla tshinru José: — Punkakanna pimolene wla ptshinanna: “Wla hixanu, h-jumento-tene hwunutanu, Canaã tshijne nwaka hyanu.

¹⁸ Waneya hiru hiyrun-koxa hixako hipji hajene hwapanu, hanikanna wkata hita nwaka. Tshiji nenekanhi kihle tshijiwaka Egito tshijneya nenekanhi wane hixatshinephi tsru honantshi xye tshijne hwatshri hnikanu.”

¹⁹ Ntowutatkahi hiyáhoni carro-kaka boi kosereru Egito tshijne hajeru hanikanu hwapyapatkana hiwhenene mtserune, hhanunrone tshinanupa koxa wane hixatshinephi hiru hanikanu.

²⁰ Hiyrun-koxa hejnu himwaleru hiknokanu klu tshinanu hejnu kihleru Egito tshijne hwatshri ptowruka hixanpatkani.

²¹ Hiyáhoni Israel whenene wane hixatka. José henekatkana carro-ne boi kosereru phuru Faraó tshin-towutlexyawaklu pixka. Hiyrun-koxa hitaphalna hyanrena tshinanupa renekatkana.

²² Wanna ptowruneka mkatshri herotu kihleru renekatkana pa mkalkaka renekkatkana satkaka seyni Benjamim reneka trezentos proji prata hiyrun-koxa cinco mkatshri kihler-potuko reneklu.

²³ Hiyrun-koxa hyokananwakatlu ruru dez jumento-ne hejnu kihlekakalu Egito hajeru hwunutkana hiyrun-koxa hyokanatlu dez jumenta-ne honantshi trigo-ji hiyrun-koxa nikalhitu wunutamtatshine runamxinipna tshinanu koxa.

²⁴ José hiykotatkana wla htshinatkana: — Xako hi hyahotkakanu hatnu hapoya. Waneya himolene hyokanata hyiywakapna. Waneya hyatkana.

²⁵ Waneya Egito tshijne ruchpajyana José molene, rurna, Jacó nwaka hyana Canaã tshijne nwaka.

²⁶ Waneya wane htshinruna rurna: — José hiwekawa! Haté Egito tshijne psoluka towutatshrini. Waneya rimyekhajita Jacó. Hi ralixatkana.

²⁷ Seyni runkajinruna ptowruka htshinyawakna José hiyrun-koxa rexinixkalu carro-ne José yokanreru hwapyawakaplu José nwaka hpoyikowatatka rurna Jacó.

²⁸ Waneya Israel wla tshina: — Ha xawakni nalixlu! Noturu José hiwekawa. Netanru nmupnaknukawa.