Gênesis 44 - Bíblia

José Hirapre Stono Tshowhuxikowakaphuta Piranapni

¹ Waneya José towutlu hipji suslahakleru wla htshinru: — Jejine sac-ne hsepotanru honantshi rumukata haniklexyawakna pso wane putakanu. Hiyrun-koxa jejine ptowruneka tiyirote h-sac-nena hruko putakanhonuka.

² Hiyrun-koxa nurapre stono prata kamhikolu hepurtshi potu sac-ne rohowakako putakanru. Hiyrun-koxa tiyiro honantshi wenru waneko putakanu. Hiyáhoni ptowru potuko José towuxyalu hkamhatka.

³ Waneya hajeyri rumrerejinixka tkatshi hyokanatkana jejine hyiywakapna hiyrun-koxa h-jumento-tna hyokanata.

⁴ Waneya rali hichpaklexinixkaluna wale poktshi seyni hi howuka hyawana José towutlu hipji suslahakleru, wla htshinru: — Hajewa ppalnanu, jejine pomkahitanu. Papkapiniklunupna wla ptshinanna: “Klu hikolukle tshinanhe kihleru nkamhiyatkahi seyni wanepnawaka hektuwaka hkamhamxyano?

⁵ Hi he xye nutsrukate hirapre stono hinamtatshri rimatahnapupre? Hektutu hkamhatka xye hkamrure tshinanu.”

⁶ Waneya rapkapatkana waneya xye tokantshi pixka potuko htshinatkana.

⁷ Waneya wla htshinruna: — Klu hikolukle tshinanhe wane ptshinanwu wutsrukate? Hoyakalu tshinanu hixa ptowrerunwu hikeklu wane pixkalutu wkamha.

⁸ Tiyiro wukchikleru w-sac-neya wale wsatkaka pixa nwaka, Canaã tshijne wale wumuchpajyalu. Hiyáhoni xawakni hanhe xawaka wumukata hixa tshowhuretlu satu pa hixanu prata kamhikolu ho ouro kamhikolu ptowutjerupji hajeru?

⁹ Hiyáhoni katuymaktako tukchikko ruylatko hiyrun-koxa pitowrene wixikolpatka.

¹⁰ Waneya wla htshina: — Haté hehe htokanu tshinyawaka hixko. Hanuruktako yineruyma tukchikko ntowrerupatkani seyni hixa pimrinhi hi hikolukanuwnanu.

¹¹ Hiyáhoni ptowruneka chireta kosputakletlu h-sac-nena waneya hkotpukluna.

¹² Waneya tsrujru sac-ne ruchpajyatka rujhiywakaplu haté hepurtshi potu sac-ne. Waneya hirapi stono Benjamim sac-ne rukchijyatka.

¹³ Waneya hsuskamkaluxnawana, h-jumento-tna hwunutatnakna waneya tsru poktshiko hsatokatnakna.

¹⁴ Waneya Judá himoleneyma José-pji hapokhonukatnaka waneya José wanekananukowa. Waneya wale hoji sreta hyawniyna tshiji.

¹⁵ Waneya José wla tshinatkana: — Klunernihe xye hkamhaleru? Hi he himatlu satu yineru hita pixkalutu rawya rimaxinri?

¹⁶ Waneya Judá wla tshinru: — Kluhe wumukata tshinretyi wutsrukate, wumukata powratlexnawakwa? Hoyakalu hikchiklu ptowrertshine kamhaleru hektutu. Hiyáhoni xawakni ptowrertshinepatkawu hixa hiyrun-koxa purapre stono hikchijikaluru koxa ptowrerupatka.

¹⁷ Seyni wale wla tshinatkana: — Hoyakalu tshipetlu wane nixyawakapa. Seyni hirapi stono hikchijikaluru tsonu ntowrerupatka. Hixa pimrinhi satokanru hiru nwaka kihle hwachalerunephi.

¹⁸ Waneya Judá walestsi rapokatka, wla htshinru: — Ha nutsrukate, pitshitanno niynumsaxyawakapyi wi potuyako. Nanjityi hi tshi pahkanno hita ptowrerno. Nimatyi pixa phuru Faraó pixkalutyi.

¹⁹ Pixa potuko nutsrukatyi hepomhatkawu hixa ptowrerunwu mitshi, ho jirwuhe ho kamolewuhe, ptshinwu.

²⁰ Waneya wunkakatkayi pixa nutsrukate, wla wtshinatkayi, “Jirwu, seyni tsrutsolejni hiyrun-koxa Kwuhenru, rutsruhinixka hiwhene hi tsruwalu. Himolni hipnanatka hiyáhoni runroni matkaklu walepkatkani hiyahokni ruru hamotlu.”

²¹ Waneya mitshi wla ptshinatkawu hixa pitowrenwu: “Hanikanru hita nwaka nexyawakaplu.”

²² Waneya nutsrukate wla mitshi wtshinatkayi: “Wale mturu honra hi himukata hicholetlu ruru klu tshinanu ruchoxiniplu rupnanuna rurupni.”

²³ Seyni pixa hiykotatkawu ptowrerunwu, wla ptshinatka: “Hepuru hma manikkanuklununapa hi hethojitanno halikaka.”

²⁴ Waneya nuru ptowreru yehi wapojinixka pixa nutsrukatyi tokanu wunkakatkalu.

²⁵ Waneya wuru wla tshinwu: “Wanetshi hyanutnaka honantshi hanjitapinwu.”

²⁶ Seyni wunkaklu, wla wtshinru: “Hi wumukata wane yaleta. Wepuru hma mimotsatkanuklunupwu hi wane wyanu klu tshinanu hi hima wethojitanru wale jeji wepuru hma mimotsatkanuklunupwu.”

²⁷ Waneya nuru ptowreru wla tshinwu: “Hixa himatlu nhanunroni hepi whene jejine tmatkajyano.”

²⁸ Satu wanna hit-yehi hamhiyatka, nijewlu hetko kopalhitutanatkalu, ntshinatka. Waneklu kananuko haté xawakni hi netanatkalu.

²⁹ Hiyáhoni xye koxa hanijinipa, rahijewninipa waneya klatajiwuruknotshi hipuktshi nwaka yanu tsru wamontshiyma.

³⁰ Hatatjewa mturu riwejya nuru hiyáhoni xawakni makluji wmanikkanuklunupa, nuru ptowreru yehi wapojinpatka,

³¹ rexiniklunpatkawu mturu hixayma hmixkanuklunpatka rupnanu nuru. Hatatjewa hixa, pixa towrerunwu yokanatanru nuru klatajiwuruko hipuktshi nwakatshi hyiywakapa tsru wamontshiyma hixa wtshinanupni.

³² Klu tshinanu nutakka mturu nisatkapyawakapa nuru yehi. Klu tshinanu wla ntshinatkal-mitshi: “Nma misatkapkanuklunuplu pix-yehi waneya hitako wenutanyi hikeklu hohne mnikawnakatupni.”

³³ Hiyáhoni xawakni nanjityi pitshitanno hewi nutujyawakapa mturu kachrijru pixa nutsrukate towreru nixyawakapa. Seyni pitshitanru mturu hyiywakapa himoleneyma.

³⁴ Klu tshinanu hanhe xawaka numukata yanwakletlu nuru mturu nmanikkanuklunupa? Hita hi haluka hetletlu hektutu nuru hapokanwakatatshripa.