Gênesis 43 - Bíblia

Egito Tshijne Nwaka Hyamxyawaka Hiyrunukotnaka Piranapni

¹ Natshi pnute yamta psoluchaka.

² Rali niklexinixkana Jacó hiwhenene koxa honantshi Egito tshijne rawapinrina waneya wla htshinna tsru: — Wanetshi hsatkapanu psoji hanjitanu hixa wniklerupa.

³ Seyni Judá wla tshina hihretlu: — Seyni jeji honra hipokananu wan-tshinwu: “Hepuru hmanikkanuklunupa hi hetanru nohoji.”

⁴ Pyokanaxiniplu wepuru hixayma waneya wserpikanu honantshi wanjitapanu pixa tshinanu.

⁵ Seyni pma yokanatkanuklunuplu hi wserpikanu. Klu tshinanu wla htshinwu jeji: “Hepuru hma manikkanuklunupa, hi hetanru nohoji.”

⁶ Waneya Israel wla tshina: — Haklu tshinanhe himtukatkano hinkajyawaklu jeji kamole hixyawaka hepurtshi?

⁷ Waneya ruhitluna wla htshinna: — Jeji honra hepomhayehitwu hiyrun-koxa wimolene pirana repomhayehitatka wla htshinwu: “Riwekawhe puru? Kamolhihe satu?” Hiyáhoni repomhale wuhichatatka hanu xawakhe wumukata himatletlu wimole raluka haniklekjixyawaka?

⁸ Judá wla tshinru ruru Israel: — Makluji pyokanatanu hitayma waneya wpalnanu wyanu wma mupniywakanupa seyni wiwekanu hixa hiyrun-koxa pixa hiwekanu, wiwhenene koxa hiwekanu.

⁹ Hitapni ruslahjerno. Pmunanhanno hiyáhoni nma misatkapkanuklunuplu pixa nwaka waneya hitako ntshinanupni wane nixahohnekanatanu.

¹⁰ Klu tshinanu wma mimalethohnekanatkonumka hepi katamka wumukata satkapletatka.

¹¹ Waneya wla htshinna rurna Israel: — Wane hixini wla hixanu. Hanikanru xye tshiji halujikalur-potu h-saco-neya, hanikanru henekachatanru wale jeji bálsamo psoji, wrolha psoji, arômatas, mirra, pistache hanaji, amêndoas koxa henekanru.

¹² Tiyiro koxa hwinro pnute hepi kata hanikanu hiyrunu tiyiro saco hwakanatatshro hsatkakanu pa katako hyokwijexnawana.

¹³ Hixa mole hepurtshi koxa hanikanu, hchiretanu, hsatkapanwakatanru jeji.

¹⁴ Hoyakalu Tsru Himukatatshri henekanhi hetwamonrewlu wale jeji hojiya, hsatkajyawakaplu hixa mole satu hiyrunu ritshixyawakaplu Benjamim hsatkapyawakapa. Seyni hita, namtakawhenexinipa mwuhenetpatkano.

¹⁵ Waneya ranikluna jejine renekachalna, tiyiro hwenru pnute hepi kata hiyrun-koxa Benjamim. Hpalnana Egito tshijne hserpikna, ruphujewnana José yehiya.

¹⁶ José hexinixkalu Benjamim wannayma waneya wane htshinru pantshi hislahatshri: — Nyi jejine nopji panikanu, boi whene puylatanu, palpokotanru ptowruka klu tshinanu nyi jejine hanikaj-hohne hitayma hnikanna.

¹⁷ Waneya José towreru José-pji ranikamtna htowuxyawaklu pixka.

¹⁸ Hpikna ranikkoklunutkana José-pji nwaka. Waneya wla rixahchinikanutna: “Wapokamtkawaka wtiyrote wsatkaklero w-saco-ne wukchijinrotka tshinanu hetkokni wkata wanikkatka. Wane rixa mitshi rukolukanuwnakajyawakapwu hkachixyawakapwu towrertshine wixikowakapa hiyrun-koxa wiprane jumento-ne hkonyawakapwu tshinanupa.”

¹⁹ Waneya José-pji suslahaklerustsi rapokatkana riynumsatluna pantshi jihlokkawakle hinapleya.

²⁰ Wla htshinruna: — Nutsrukate, wehapokle mitshi wkata wuna honantshi wanjitapyawakapa.

²¹ Seyni wipji nwaka wyamxinixka wutukyetshnoxyawaka wkotpuka-saco-nexya satkakwu hixa wukchiklu wtiyirote psoluka saco hrukoya. Wale tshinanukni wanikamtatkalu wsatkajyawakaplu.

²² Hiyrun-koxa pimri tiyiro wimapokatka honantshi wanjixyawakapa. Hi wimata katukta hitakatkalu wtiyirote w-saco-ne hruko.

²³ Waneya wale wla tshinna: — Seyni kihle hchinikanuphi hi hpikanu. Hixa Hoyakalute, hiru Hoyakaluteko pohirewnalu renekatkahi h-saco-ne rutajyahi klu tshinanu hita yoptotlu hixa tiyirote hwenuxyano. Waneya Simeão hkochpaka wanna nwaka raniklu.

²⁴ Waneya suslahakleru hanikatkana jejine José-pji hitokote. Honha rutakyehitna rerokajixixyawakna. Hiyrun-koxa hiprane jumento-ne rohlutatka.

²⁵ Waneya henekachaluru ranikanruna José tshinanupa ralpokohnaputatkalu rapojinipa hanikaj-hohneya. Klu tshinanu hjemna waneko hnijinna.

²⁶ Waneya pantshi rapojiniklunupa José henekachalu ranikanwakatluna himyoyna ranijyaluna pantshi hitokote. Hyonohiyehitluna, hihojna rutspaktshijitna.

²⁷ Waneya repomhatkana wanna pirana hanu rixna, wla htshinna: — Hiru, jeji tsrutsoleji hixa kochtshekleru mitshi, pomtalhe? Riwekawhe?

²⁸ Waneya ruhitluna: — Wuru, ptowreru pomtatka, riwekawa. Waneya hyonohyehitluna, rimalwutluna.

²⁹ Waneya hyotunotatka repuru Benjamim, runroni whene retatka, waneya wla htshinatka: — Xyeklahe hixa mole hepurtshi hinkaklexyano mitshi? Waneya pnuteko wla htshinru repuru: — Hoyakalu hetwamonutanyi noturu.

³⁰ Waneya José repuru wamontakle tshinanu rujhatkalu htshiyahaxyawakapa hiyáhoni hchiretatka wanna hetanu rasujyawakapa. Hiyáhoni waleko hruklu hjihlokatka waneya waneko htshiyahaxyatka.

³¹ Waneya rerokahojixnawa waneya ruchpakatnaka mtshiyahatkatutka waneya wla htshina: — Nijittshi hitakanu.

³² Waneya nijittshi rutakna José tshinanupa hkotspalatluna hiyrun-koxa nijittshi hitakka kahnete José molene tshinanupa hiyrun-koxa nijittshi hitakka kahnete waleyma nikatshinemkapa egito-nerune tshinanu. Klu tshinanu egito-nerune hi himukata himinkaletna hebreu-nerune. Klu tshinanu egito-nerune kahwaklu hebreu-neruneyma hnijyawakna hektutni.

³³ Htuplakakatkana mitshikananu matutatshri haté hapkatmatletatshri potuko wale hetanuya. Hiyáhoni retjeyhalkakna.

³⁴ Waneya nijittshi wale mesa-te hwatshri rutakyehitna. Seyni Benjamim nijitu wale yehi hitakkaluru cinco kata tsruylu nijittshi pimrine hitakyehitkaluru. Waneya hnikna, rurna hpoyikowatna waleyma.