Gênesis 42 - Bíblia

José Molene Egito Tshijne Rapojyawakna Piranapni

¹ Waneya rimaxinixka Jacó rawatka honantshi Egito tshijne wla htshinna hwuhenene: — Haklu tshinanhe hyopukhakakachata hixkakluko?

² Waneya wla htshina: — Nyijnakpiranyehitlu Egito hima rawa honantshi. Wanetshi hyanu, hanjitapanru honantshi wanna yehiya wma mupniywakanupa seyni wiwejyawakapa.

³ Waneya hserpikamtna dez moletkakatshine José molene, honantshi ranjitapyawakapna Egito tshijneya.

⁴ Seyni Benjamim, José hepuru, hi hyokanata Jacó Benjamim moleneyma klu tshinanu wane htshina: Hma mahijewniywakanupa.

⁵ Hiyáhoni Israel whenene pimrine honantshi hanjitapatshineymana hyana klu tshinanu Canaã tshijne rawatka natshi tsru potuko.

⁶ José Egito tshijne hajene towutatshri hiyáhoni walekni honantshi hichanjiyna ptowru tshijne hajeneka. Waneya José molene hapoka, hyoptsojityehitluna hihojna tshiji rutspakna.

⁷ José hexinixkana himolene rimathetna seyni hi runkakna. Riynumatna pokteru tokantshi, repomhiyna wla htshina: — Hanhe hichpajya? Ruhitluna: — Canaã tshijne wuchpajya honantshi wanjitapa.

⁸ José himathetna himolene seyni wanna hi himathetlu.

⁹ José hichinkaplu rupnawle wanna tshinanu hiyáhoni wla htshinna: — Hixa jimaxikoklerunhi hiyáhoni wkata hina hexyawakaplu hanu sreta hi wuslahya.

¹⁰ Seyni wanna wla tshinru: — Hike, wutsrukate, seyni wkata wuna honantshi wanjitapa.

¹¹ Hixa ptowrunekwu satupka jeji whenenwu. Hixa ptowutjenwu jejinwu mayloklenwu hi jimaxikoklerunwu.

¹² Seyni José wla htshinna: — Hike seyni wkata hina hexyawakaplu hanu sreta hi wuslahyalu tshiji.

¹³ Seyni wanna hihitlu José: — Ptowrerunwu hixa. Hixa doze moletkakatshinwu jejine, satupka jeji whenenwu, Canaã hajerni. Hepurtshi hituka wuruyma hiyrunu satni hamhanatka.

¹⁴ Waneya José wla tshinna: — Hi he wane potuko ntshinatkahi, hixa jimaxikoklerunhi.

¹⁵ Hiyáhoni netumhanhi hanu hixatshinhi. Faraó hiwaka tshinanu hi hichpakanatka hmapokkanuklunupa hepuru hewi.

¹⁶ Sat-hixa nyokanatanu rawapyawakaplu hixa mole hepurtshi; seyni hixa pimrinhi preso hyanu rimaxikowaka hixa tokanu ho halikaklahe htshina. Hweyawaxini phuru Faraó hiwaka tshinanu jimaxikoklerunhi halikaka.

¹⁷ Waneya José map-hohne preso rutakna wanna ptowruneka.

¹⁸ Waneya map-hohne rixinri José wla tshinna: — Xye hkamhanu, hiwekanu klu tshinanu Hoyakalu kahwakpiratatshrino hita.

¹⁹ Hixa jejinhi mayloklene hixini, satkaka hixa hewi hitukanu preso yehi seyni hixa pimrinhi hyanu, honantshi hanikanu hixapjikaka hajene tshinanupa, natshitatshine tshinanu.

²⁰ Hma mupniywakanupa hanikanwakatanno hixa mole hepurtshi rimaxikowaka ho halikaklahe hixa tokanu. — Haté hehe, wane wixanu, wwapanru. — htshinna.

²¹ Waneya htshinyawaka hyinuwak-kamhaletatkana, wla htshinkakna: — Hixa halikaka majnakowatatshinwu wimolni wkamnireru tshinanu, klu tshinanu hix-mitshi hetlu hi pa kaheknanukananu rixa wimole ranjitmakwu mitshi wuchoxyawakaplu seyni hi wepixlu. Hiyáhoni xawakni xye tshinanu xye hektutu hakanhayehitatkawu.

²² Waneya Rúben yanumatatka wla htshinatkana: — Hi he hitamka hiykotatkahi mitshi hektuntshi hma mkamhiywakanuplu mturu? Seyni hixa hi kajnakotkahi mitshi. Hiyáhoni xawakni wwenutanru waleni hraha.

²³ José hiynumaxinna tokantshi yokakatshriyma tsonu riynumaxyana. Hiyáhoni hi rimatatkana José himatjematkalu htokanna.

²⁴ Waneya José hiprotakatka ratjini sreta hyihatatka waneya htshiyahatatka. Waneya wanna sreta ruprotakatnaka riynumatatkana waneya himolna Simeão tshinkaluru hnuretatka. Wanna hetanuko rostukjixatkalu.

José Molene Canaã Tshijne Nwaka Hsatojyawakapna Piranapni

²⁵ Waneya José h-saco-nena htsepotakjixlu chiji hiyrun-koxa htowutna satkaka yineru saco-te rutajyawakapluna htiyirotna. Htowutna hitaphalna renejikowakapna hnikamtanrupna. Waneya wane potuko rixkana.

²⁶ Waneya honantshi hiprane jumento-ne hwunutna waneya hyatkana.

²⁷ Waneya satu wanna kotpuka-saco-neta hipra jumento rohluxyawakapa himkawaka yehiya. Waneya retlu htiyirote saco hruko twiywaka.

²⁸ Waneya himolene runkaklu, wla htshina: — Ye, ntiyirotekta hsatkajyahonukno klu tshinanukta n-saco-ne hrukoko twa ntiyirote. Waneya rutukhajpiratna, tsru piklu rixna wla htshinkakna: — Kluhe wla rimixwu Hoyakalu?

²⁹ Waneya hyamtna rapokluna rurna Jacó yehi Canaã tshijneya. Ptowru potuko ruknohjerna pirana runkakluna.

³⁰ Wla htshinruna: — Jeji, wale tshijne towutatshri yanhakwu. Hixa jimaxikoklerunwu hkahwakwu hiyáhoni wane hima wyatka wexyawakaplu hanu sreta hi ruslahyana.

³¹ Seyni hixa wla tshinru: — Hixni hi jimaxikoklerunwu. Hi wuna wkata wexyawakaplu hanu sreta hi hislahyalu tshiji.

³² Hixa doze moletkakatshinwu jejine, satupka jeji whenenwu, Canaã tshijne hajerni. Hepurtshi hituka wuruyma hiyrunu satni hamhanatka.

³³ Waneya jeji wale tshijne towutatshri wla tshinwu: — Rimaxikowaka hixa tokanu ho halikaklahe htshina satu himole hiknokamtanu hewi hitayma hixa pimrinhi honantshi hanikanu hixapjikaka hajene tshinanupa, wane hixatshinhi yanutka.

³⁴ Hwapanru hixa mole hepurtshi, wale hanikanu hita nwaka. Wane hixatshinephi nimathetanhi jimaxikoklerune hmixyawakanu seyni halikaka jejinhi mayloklenhi. Waneya hixa mole nsatkakajinhi, hmaronewatanu xye tshijneya.

³⁵ Waneya ripkakamxiniklunruna h-saco-nena satkaka wanna hikchiklu htiyirotna poyitkaluru h-saco-neyna. Waneya htiyirotna poyitkaluru rexinixkana wanna hiyrun-koxa rurna rexinixkalu hpikna.

³⁶ Waneya rurna Jacó wla tshinna: — Hita hamtakawhenkaka. José-ni hamhanatka, Simeão-ni koxa hamtajyatkano hiyrun-koxa xawakni Benjamim haluka hanikletatnaka. Xyekaka ptowruka kamnitno.

³⁷ Waneya Rúben yanumatatka wla htshinru ruru: — Palujini nowhenene hepi puylatanu Benjamim nma misatkapkanuklunupa pix-yehi. Hita hislahle putakanru hit-halikaka hisatojinyi pixa nwaka.

³⁸ Waneya wla htshinru: — Noturu hi hixaymaplu klu tshinanu himoleni hipnatka hiyáhoni walepkani. Rahijewninipa hatnu hapoya klatajiwuruknotshi hipuktshi nwaka yanu tsru wamontshiyma.