Gênesis 40 - Bíblia

José Hipnawlu Hinkaklexyawaka Piranapni

¹ Waneya wane pnut-hohnetka Egito tshijne pohire hirkaluru jetumhakleru hiyrun-koxa h-pão-te kkamhakleru hahkkakatka htowutjerna Egito pohireya.

² Phuru Faraó, htowrene hepi rahkatka. Hirkaluru jetumhaklerune chefe-te rahka hiyrun-koxa pão kkamhakleru chefe-te rahka.

³ Hiyáhoni preso rutakna phuru hinotatshine chefe-te preso-ne hitakjexikowakapjiya, José preso hwakanaxyawakapji.

⁴ Waneya phuru hinotatshine chefe-te José hislahle rutakna. Hiyáhoni José hinotatkana. Wane rawatkana pchini hohnejiji.

⁵ Waneya wanna hepi hipnawatatka walerutu yetshno rupnawatatkana. Egito pohire hirkaluru jetumhakleru preso hwatshri hipnawle satuko hiyrun-koxa pão kkamhakleru preso hwatshri hipnawle satuko.

⁶ Waneya wale prika José jihlokyehitna, retna. Hwamonuwatna.

⁷ Waneya repomhatkana phuru Faraó chefe-tekananune waleymalune htowutjerupjiya, wla htshina hepomhaletna: — Haklu tshinanhe hwamonuwata xye hohne?

⁸ Waneya wla htshinruna: — Wupnawata seyni hike yineru wukchika hyokkajyawakaplu wimatjemyawaklu. Waneya José wla tshinatkana: — Hi he Hoyakalu ptowru pirana himat-yokkakatshrini wale? Hiyáhoni hitatshi hinkakanhi hipjereru.

Phuru Hirkaluru Jetumhakleru Chefe-te Hipnawle Piranapni

⁹ Waneya phuru hireru jetumhakleru chefe-te hinkaklu José rix-hipnawlexyawaka wla htshina: — Uva-tsa nupjeta.

¹⁰ Hahapitsa mapa skitatsalu nupjeta. Hhiwuwaphutata, chinipotukawa ralixatka, hsahiwatatka uva-hawa rixnawa.

¹¹ Phuru Faraó copa-te stono nkachihipnakanata. Uva nkachita, nkatsohatlu Faraó hirapre stonoya waneya phuru Faraó-myo nutakastonotlu nupnawleya.

¹² Waneya José wla tshinru: — Wlakta raluk-tshinreta. Mapa plu map-hohne hyapkakleta.

¹³ Hiyáhoni map-hohnepka mahata phuru Faraó hitajyawakapyi pixakanaxyawaka pixyawakatnaka. Phuru Faraó hirapre stono putakanu wale myoya pixjekanaxyawaka pixanutnaka wale hirkaluru hetumhatshri pixakanaxyawaka pixka.

¹⁴ Nanjityi xye kihleru hakanhayehixiniklunupyi puchinikanunno, kihlewaka pkamhininno, nkochpajikowakapa xye preso-ya.

¹⁵ Klu tshinanu hit-honra hebreu-nerun-yehi nwapachaxika hipokananu hike himatyehitno. Hiyrun-koxa hewi nwiywaka hike hikolukle minjene preso nutakka.

Pão Kamhatshine Chefe-te Piranapni

¹⁶ Waneya pão kamhatshine chefe-te rexinixkalu hipnawlu ruphujtaxikowaka kihle pirana rixyawaka wla htshinru José: — Ha hit-koxa hipnawata mapa chiwatu nutseptahihipnamta pão klatalu yehi.

¹⁷ Chiwatu yoptowaka hwamtatshri ptowru hixatshri kamhajpalu wane hwamta phuru Faraó tshinanupa. Seyni kamejirune runna hnikapluna kamhajpalu chiwatu hwatshri nojiwu hoho nanikamxinri.

¹⁸ Waneya José wla tshinru: — Wlakta raluk-tshinreta pupnawle. Mapa chiwatu yapkakletlu map-hohne.

¹⁹ Hiyáhoni map-hohnepka mahata phuru Faraó kastakanojixyawakapyi waneya pimanni hahmuna hiwrolekkako. Kamejirune pihitni nikanu.

²⁰ Waneya map-hohne hiknohinixka, phuru Faraó hohneru, tsru niklu hkamha htowrene tshinanupa. Wale hohneko Faraó hitakatnaklu hirkaluru jetumhaklerune chefe-te hiyrun-koxa pão kamhatshine chefe-te rutakatnaka htowrerune tskalaya.

²¹ Hirkaluru jetumhaklerune chefe-te rutakatnaka pnute hkamhiywakaplu hkamhajekanatanru. Hiyáhoni copa stono rutakatnaka phuru Faraó-myoya rixjekanaxyawaka.

²² Seyni pão kamhatshine chefe-tni hostuplatkanatka rix-hipnawlexyawakni hyokajyawaka José pixka rixanatka.

²³ Seyni hirkaluru jetumhaklerune chefe-te hi hichinikanretatkalu José seyni ruherukatkalu.