Gênesis 39 - Bíblia

Potifar Hnunro Kamnixyawaklu José Piranapni

¹ José Egito tshijne ranikka. Waneya satu Egito hajeru tsru hitakkaluru Potifar tshinkaluru phuru Faraó towreru, phuru Faraó hinotatshine towutjeru hanjitlu José. Ismaelita-nerune José hanikatshine hichanjiylu Potifar.

² Seyni Tsru Hixikatshriwa Hoyakalu José-ymalu wale tshinanu ptowruka kihle hixownale. Htowutjeru Egito hajerupji rawjeta.

³ Potifar hetlu Tsru Hixikatshriwa Hoyakalu José-ymalu hiyrun-koxa ptowru potuko hkamhini José Tsru Hixikatshriwa Hoyakalu kihle kosekle rixkaklu.

⁴ Hoyakalu heneklu José kwamon-rixyawakapa htowutjeru Potifar yhaleya hiyáhoni Potifar heneklu José walepji psoluka htowuxyawakapa hiyrun-koxa ptowru rimwaleru rinoxyawaka reneklu.

⁵ Waneya José Potifar-pji psoluka rinotatka. Hiyahokni Tsru Hixikatshriwa Hoyakalu hepixlu Egito-nerupji Tsru Hixikatshriwa Hoyakalu hamoxyawaklu José tshinanu. Ptowruka Potifar himwaleru repixka pantshi hajeru, campo hajer-koxa.

⁶ Potifar ptowruka rimwaleru reneklu José rinoxyawaka hiyáhoni José hislahle tshinanu hike ruslahatka Potifar seyni hnikleru tsonu ruslahatka. José koxa kihle rixmaneta hiyrun-koxa kihle hojru.

⁷ Waneya wane pnutejiji José towutjeru hnunro het-tsotanutatkalu wane ttshinru: — Wuya pkatshpekapanno!

⁸ Seyni wla htshinro: — Hike. Nuslahle tshinanu ntowutjeru hike hkojwajnawa pantshi hajeru psoluka, ptowruka rimwaleru hitamyo rutaka.

⁹ Hikeni wane pnute tsru hitakkaluru, hita tsonu hewi pantshiya. Ntowutjeru hike htshipexyano hewiya seyni pixa tsonu htshipexyano klu tshinanu pixa hhanunroyi. Hiyáhoni hanhe nixyawaka wane pa himtukalutu nkamhanu nektuwatanu Hoyakalu yehiya?

¹⁰ Yáholu tiynumsajetlu José ptowru hohneruka seyni hi hkatshpeklo, hi koxa walastsi rutuka.

¹¹ Waneya pa hohne pantshi hjihloka hkamrurewaxyawakapa seyni hi satukna wane kamrurewaxikatshri pantshi hitokote hwakanata.

¹² Waneya tkachimkalutlu, wla ttshinru: — Wuya pkatshpekanno. Seyni wale hichomtlu himkalu wala myoya, rasuka pantshi maleka sreta hyatka.

¹³ Waneya texinixkalu pantshi maleka hyatka rasujyatkalo seyni himkalu wala myo hwatka.

¹⁴ Ttomhatkana jejine, pantshi hwatshine, waneya wla ttshina: — Hetanu, nhanuru hanikanwakatwu xye hebreu-neru rapnokaxyawakapwu. Rapyehitno hita hkatshpejyawakapno seyni hipokananu nsaplewatatka.

¹⁵ Seyni hyijnakoxinixkalu tsru tokanu nix-saplewleta, ruknokamkalumtatka hitastsi waneya rasuka, maleka hyatka.

¹⁶ Waneya timretlu wale mkalu walastsi haté hsatokatka José towutjeru.

¹⁷ Waneya tunkaklu wale pirana hiyrunukotnaka, wla ttshinru: — Wtowreru hebreu-neru panikleru walekni yanwakatno rapnokaxyawakapno.

¹⁸ Seyni nsaplewaxini tsru saple potuko, ruknoklu himkalu hitamyoya waneya rasukatka, maleka hyatka.

¹⁹ Waneya José towutjeru xye tokantshi hyijnakoxini ttshinyawaklu hhanunro wla ttshinatka: — Wla rixno ptowreru. Hjihekanuwpotutatka Potifar.

²⁰ Waneya José towutjeru kachitlu, preso-pji ruknoklu. Wane rutakka preso-pji tsru phuru towrene hitakjexikowaka.

²¹ Seyni Tsru Hixikatshriwa Hoyakalu José-ymalu hiyáhoni kihleru reta hiyrun-koxa preso hinotatshri hetwamonutatkalu.

²² Hiyáhoni preso hinotatshri towutlu José ptowru preso hajene ruslahyawakapa hiyrun-koxa htowutlu ptowru potuka preso hajeru kamrurtshi ruslahyawakapa.

²³ Waneya preso hinotatshri hike ruslahyatka klu tshinanu ptowruka José-myo yatka klu tshinanu Tsru Hixikatshriwa Hoyakalu José-ymalu hiyáhoni repixlu José wale ptowruka hkamhaleru.