Gênesis 38 - Bíblia

Judá Hiyrun-Koxa Tamar Piranapni

¹ Waneya waneklu papko Judá tshinkaluru hichotna himolene. Hyatka satu yineru adulão-neru Hira hiwakatletatshri pji hwatka.

² Judá hetlo sato suxo canaã-neru whene Suá tshinkaluro. Hhanunrotlo.

³ Tmichiwata, jeji tmatkakatka. Er rutakhiwakatlu.

⁴ Waneya tmichiwatatnaka, tmatuwheneta jejni. Onã tutakhiwakatlu.

⁵ Waneya tmichiwatatnaka, jeji tmatkakanatka. Selá tutakhiwakatlu. Quezibe tshinikowaka hmatuxyatka.

⁶ Waneya Judá makloji rukchika Tamar hiwakatletatshro hiwhene tsrujru tshinanupa Er tshinkaluru hhanunroxyawakaplo.

⁷ Seyni Tsru Hixikatshriwa Hoyakalu hetanu hektutni Judá whene tsrujru Er tshinkaluru. Hiyáhoni Tsru Hixikatshriwa Hoyakalu hiylatanatkalu.

⁸ Waneya Judá whene Onã tshinkaluru htowuta, wla htshinru: — Pimoleni hnunro phanunrotanu pwuhenewkakanro pimolni whene hkahwajikolupa.

⁹ Seyni Onã hahxatlu himolni klu tshinanu rimaxnawa tmatkaklerumkapa hi wale whene hkahwakko. Hiyáhoni ptowru katako pnu rixyaholexinmaklo himolni hnunro tshijiko pnu rixkajnawa, whentshine hma menejyawakanuplu himolni.

¹⁰ Seyni xye hkamhaleru hi rukchikhihlenutatka Tsru Hixikatshriwa Hoyakalu hiyáhoni wale koxni ruylatatka.

¹¹ Waneya Judá wla tshinro Tamar himekanunro: — Hipnahnurutatshro pixinwa purupji pya haté htseruwninipa noturu Selá. Wane htshina klu tshinanu hpikatka xye hiwhene koxa himukata hipnaletanu. Hiyáhoni Tamar yatka, turupji twatka.

¹² Waneya wane pnuteyaka Judá hnunro Suá tshinkaluru whene hipnanatka. Waneya riknohinixka hwamonuwnale Judá kankatka ovelha-ne jiwchitatshine Timna tshinikowaka nwaka rimatletleru Hira tshinkaluru adulamita-neruyma.

¹³ Waneya tunkakka Tamar wla ttshinka: — Haha hetanu phimatjiru kankatka Timna nwaka hiprane ovelha-ne hjiwchixyawakapa.

¹⁴ Waneya hipnahnurutatshro hitakleru mkatshri tkochpaka. Temkatatka kasamalu tuchyahojixnawa waneya mkatshri tsapowajnawa. Waneya Enaim tshinikowaka jihlokawakle hinaple ttuplatatka Timna tshinikowaka hwahapotatshri stsi. Wane tixa klu tshinanu tetlu tsrutkalu Selá seyni hi tenekka thanuruxyawakaplu.

¹⁵ Waneya rexinixkalo Judá waleho kapoklewakleroni wala klu tshinanu tuchyahojixnawa.

¹⁶ Hi rimathetlo himekanunro tixyawaka hiyáhoni wala nwaka hyatka hatnu hapoya waneya wla htshinro: — Puna, nkatshpekapanyi. Seyni wala wla tshinru: — Klunerhe penekanno pkatshpejyawakapno?

¹⁷ Waneya wale wla tshinro: — Ovelha whene noprane xkehi hajeru satu nyokananwakatanyi. Waneya wala wan-tshinru: — Penejenohe satu pa hixanu punkakletleru nma yoptotkanu pchinika?

¹⁸ Waneya wale wla tshinro: — Klunerhe nenekanyi nunkakletleru himaxikolepa? Waneya wala wla tshinru: — Phiwaka marca-tyehi penekanno hitsluymako hiyrun-koxa pkanojere panikamtanru penekanno. Waneya walekaka reneklo. Waneya hkatshpeklo, tmichiwata waleyma.

¹⁹ Waneya tpalnatka, tyatka. Tohoji hichyale tkochpakatka hiyrun-koxa tomkalu hipnahnurutatshroko hitakleru tutakatnaka.

²⁰ Waneyakni Judá satu ovelha whene hyokanata rimatletleru adulamita-neru ymamka hyoptoxyawakamkapatkalu hiwaka marca-tyehi hiyrunu hkanojere renejyalo mitshi seyni hi rukchiklo.

²¹ Waneya wale poktshi hajene repomhayehitlo, wla htshina: — Hanurohe kapoklewaklero Enaim nwaka ya hapotatshristsi tuplajekanatatshro? Waneya wanna wla tshinru: — Seyni hewi hi twa kapoklewaklero.

²² Waneya hsatokatka Judá nwaka waneya wla htshinatkalu: — Hi nukchiklo hiyrun-koxa jejine wale poktshi hajene hinkakno kapoklewaklero hikeklu wane hwatka.

²³ Waneya Judá wla tshina: — Haté hehe nenejyalo tumutukanutka wma patetjekajyawakanupa. Klu tshinanu halikaka hit-honra ovelha whenemka nyokananwakatlo seyni hi pukchiklo.

²⁴ Waneya três ksuru hetko hiknohinixka runkakka Judá, wla htshinka: — Pimekanunro Tamar hapoklewatatka hiyrun-koxa timichitkatka tapoklewle tshinanu. Waneya Judá wla tshina: — Panikanro maleka tyoxijikowakapa.

²⁵ Waneya maleka tanikkoklunutka thimatjiru nwaka tyokantokanuta, wla ttshinakjixa: — Xye hejnunkatetatshrikni michitno. Punkaklewaxinno xye hiwaktshi marca-tyehi hitsluyma katunnihe hiyrun-koxa xye kanojertshi katunni?

²⁶ Waneya Judá wan-tshina walenu rixyawaka waneya wla htshina: — Wala hita yohnikpotuknuro klu tshinanu hita hi heneklo noturu Selá thanuruxyawakapa. Waneya Judá hikeklu rumumkatkalo.

²⁷ Waneya tmatkakpiraxinixkana towhenene hepirune tosat-hajene.

²⁸ Waneya ttshinowaxinixka satu hapka matumyota waneya tshinowatatshro hislahatshro serolu tsalu tostumyonotatlu. Walamka wla ttshinatka: — Xyekni mitshikananu matutatshri.

²⁹ Seyni hkoskanotatka waneya himole matutatka. Hiyáhoni wla ttshinatka: — Hanhe pixa hikchikaswaleta puchpajyawaka? Hiyáhoni xawakni pixako ptshinanu. Wale tshinanu Perez rutakhiwakatka.

³⁰ Waneya wane pnute himole serolu tsalu hostukanruru matutatka. Wale Zerá hitakhiwakatka.