Gênesis 37 - Bíblia

José Hipnawle Piranapni

¹ Jacó wane hwajeta rurni hwajekanaxyawaka Canaã tshijneya.

² Xyekni Jacó piranapni: Dezessete mhaletkalu José maklujitkani, rinotjekanatna hiprane carneiro-ne himoleneyma; rimotsjekanatna Bila, Zilpa ruru hhanunrone whenene; waneya José himolene himtuknu kamrure hinkaklu ruru.

³ Hetanu, Israel whenene ptowruneka yohnika hamotle rixlu José klu tshinanu José rutsruhinixka hwuhenni. Hiyáhoni hkamhalu satu mkatshri howukalu hokanopnalu ptowru hix-yonhatatshri.

⁴ Waneya rexinixkaluna himolene José wanna ptowruneka yohnika hamotle rixlu ruru, rahnanutluna José hiyáhoni hike tokantshi kihleru rumukata tshinretluna José.

⁵ Waneya rupnawatatka José waneya José hinkakna himolene; hiyáhoni wale tshinanu yohnika hahkale rixluna.

⁶ José wane tshinatkana himolene: — Nanjithi xye nupnawle hjemyawakapa.

⁷ Hitaklu wapatjekanata, wostujekanatlu campo-ya waneya nostuptaleru yopkaka hipnata, hyotunotatka seyni hixa hostuptaleru mkoje hapyehitlu nostuptaleru, hyonohiyehitluna nostuptale.

⁸ Waneya wane htshinruna himolene: — Pukchikluhe ptowrexyawakapwu? Halikaklahe wtowutjeryi pixinwa? Hiyáhoni rupnawle tshinanu hiyrunu ptowruka htshinyana tshinanu yohnik-rix-hahkaletluna.

⁹ Waneya rupnawatatnaka José waneya runkakna himolene waneya wla htshinna: — Hiyrun-koxa nupjetlu tkatshi, ksuru hiyrunu onze katahirine yonohyehitno, — htshina.

¹⁰ Waneya José hinkajinixkalu ruru, himolen-koxa, ruru hijretlu wla htshinru: — Klu koxhe pupjejeta pixa? Halikakpaklahe wyanwakatanyi hita, punro, pimolen-koxa hyonohyehixyawakapyina haté tshiji potuko?

¹¹ Waneya himolene hahxatlu seyni ruru himrettokanutlu wale nanwaka.

José Hichanjikowaka Piranapni

¹² Waneya himolene hinotjekanatna rurna prane Siquém tshinikowakaya.

¹³ Waneya Israel hepomhalu José, wla htshinru: — Hi he Siquém tshinikowaka pratshine rinotjexyana pimolene? Punanu, pixa nyokanatanu pimolene nwaka. Waneya José wla tshinru: — Hawu.

¹⁴ Waneya Israel wan-tshinru: — Pyanutka xawakni, petapanu ho kihlenhe pimolene ho hike pratshin-koxa. Wanna pirana pisatkapanu. Waneya hyokanatlu Hebrom kihlemta tshiji waka nwaka hyokanatlu, Siquém nwaka hyamta.

¹⁵ Himolene rujhajeta José campo-ya waneya satu jeji yoptotlu José hiyáhoni repomhalu, wla htshinru: — Klunerhe pujha?

¹⁶ Waneya ruhitlu: — Nomolene nujhajeta; pumukata hinkakletnohe hanhe rinotjexyaluna nomolene pratshine?

¹⁷ Waneya wla htshinru jeji: — Hewi ruchpajyana klu tshinanu njema wan-tshinretna: “Wuya Dotã poktshi nwaka wyanu.” Waneya José himolene hatjini hya waneya rukchikna Dotã poktshistsiya.

¹⁸ Howukako retapyaluna José waneya hi rapokawa José htshanixkakatkana ruylaxyawakapluna.

¹⁹ Wane htshinkakna wannakakluko: — Tujrapatkani jipnawakleru.

²⁰ Wuya wuylateru waneya wuknokanru kapna hitokote waneya wla wtshinanu: “Satu hocha hajeru kmatsyiru nikanru.” Waneya wetanu ho rakanhewhe rupjejekanatanru ho hike.

²¹ Seyni Rúben xye tokantshi hyijnakotatka, hkochpaklu José wanna myoya wane htshina: — Hike, hi wuylatanru.

²² Wane koxa htshinna Rúben: — Hike, hi hiylatanru seyni xye kapna kahnete hwatshri hiknokanru seyni hi hixako hiylatanru. Seyni xye tokantshi wane htshinya Rúben, hkochpajyawakaplu José wanna yehiya, ruru nwaka hsatkapyawakapa José.

²³ Hiyáhoni rapojinixka José himolene yehi, hkonamkalhapkatluna, wale mkalu howukalu hokanopnalu ptowru hix-yonhatatshri rutakjekanatanruni.

²⁴ Waneya ranikluna, kapna ruknokluna, hi kahlu kapna seyni popriru.

²⁵ Waneya wane htuplatatkana hnijyawakapna. Wane rixawana htunohiyhaletna retapna marreteiro-ne ismaelita-nerune, Gileade hichpajikatshine. Wanna prane camelo-ne wunutshri hitjita arômatas, bálsamo, mirra, (phamluhalo hkamhika) Egito tshijne yatshripa.

²⁶ Waneya Judá wane-tshinna himolene: — Hanhe rix-hepixletanwu wuylachaxinri wepuru hiyrunu wyohimaxinri wkamrure?

²⁷ Wuya, ismaelita-nerune wuchanjinri, hi wale hixako hiylatanru klu tshinanu halikakni wimolni, hixako wihit-koxni wale. Waneya himolene xye tokantshi hkojiretna.

²⁸ Riknohinixkana jichanrewaklerune midianita-nerune, José molene kapna tenopnalu hkochpajyaluna José waneya ismaelita-nerune ruchanjiyatkaluna. Vinte proji prata hkayaxyaluna José wenru waneya ismaelita-nerune Egito tshijne ranikluna José.

²⁹ Waneya hsatojinixka Rúben kapna tenopnalu yehi, hi wane rawatka kapna José hiyáhoni hwamonnu tshinanu Rúben suskamkaluxnawa.

³⁰ Waneya hyanwakatna himolene waneya wla htshina: — Mturu honra hi wanetka. Ha hita xawakni hanhe nutukanutka?

³¹ Waneya José mkalu kakoje yonhalu ranikna waneya satu bode ruylatna, wale hraha hsahatluna José mkalu.

³² Waneya mkatshri kakoje yonhalu ranikanwakatluna rurna waneya wane htshinruna: — Xye wukchikatka. Petpotutanru ho pituru mkallahe ho hike.

³³ Rimathetatkalu waneya wla htshina: — Hehe, xye noturni mkalni! Satu nijewlu kmatsyiru nikanatkalu José-ni halikakni wale kopalhitutanatkalu.

³⁴ Hiyáhoni Jacó suskamkaluxnawa hwamonnu tshinanu saco hmakaxyanawa hiturni pohwaka tshinanu hiyrunu hixo mhale potuko hwamonuwna hiturni tshinanu.

³⁵ Waneya hiwhenene jejine, suxon-koxa yanwakatlu ruykoxyawakluna seyni wale hi yijnakotlu ruykoxikolu seyni wla htshinahonuka: — Hi nutuk-wamonnutanu haté nyanwakaxinri noturni, nupninpatka. Hiyáhoni Jacó tshiyahpohwakatanru José-ni.

³⁶ Seyni wane pchinika midianita-nerune hichankalu José Egito tshijneya. Potifar tshinkaluru ruchanjiyaluna José. Potifar, phuru Faraó towreru, tsru hitakkalurni. Phuru Faraó hinotatshine towutjerni.