Gênesis 34 - Bíblia

Jacó Whenene Hiylalewaxyawaka Piranapni

¹ Waneya Lia whene suxo, tmatkajyatkalu Jacó, Dina tshinkaluro, hichpakatka suxone wale tshijne hajene texyawakapa.

² Waneyakni Siquém, Hamor tshinkaluru, heveu-neru, wale tshijne pohire whene hetlo. Hkachitlo, rapokmanetlo, manjitanutoko.

³ Seyni ralukpotutatkalo Dina, Jacó whene suxo. Ruchinikpotutatkalo wala makloji, kihlewaka htshinatkalo makloji.

⁴ Waneya Siquém hanjitlu ruru, Hamor tshinkaluru, wla htshinru: — Twu makloji panjixinno nhanunroxyawakaplo.

⁵ Waneya Jacó jemlu hiwhene suxo, Dina manjitkotoko hapokmanexikowaka pirana. Waneklu papko hiwhenene campo rawakanatna pratshineyma. Hiyáhoni Jacó hike htshina hmapokkanu pchinikna hiwhenene.

⁶ Waneyakni Siquém hiru, Hamor tshinkaluru hichpakatka Jacó nwaka hyatka riynumsaxyawakaplu.

⁷ Waneya hjeminixkana Jacó whenene himolna kamnixikolu pirana campo runyana. Wanna mole, Jacó hchitsho kamnixikolu tshinanu hwamonuwatna. Hjihekanuwpotutatkana klu tshinanu Siquém hektutu hkamha Israel yehiya klu tshinanu wane hixatshri kamrurtshi hi ritshitka wanna tshinanuya.

⁸ Waneyamka Hamor tshinkaluru hiynumsatna, wla htshinatkana wanna: — Nowhene Siquém halukpotutlo piwhene suxo. Hiyáhoni nanjityi walatshi penekanru hhanunroxyawakaplo.

⁹ Waneyakni witshikajini. Hixa whenene suxone henekanwu hixa hiyrun-koxa wwuhenerone hnurutanhi hixa.

¹⁰ Hiyrun-koxa hixayma hwanu hixa. Wane hixatshinephi hike himalexinhi tshiji. Hewi tshijne hwanu hixa, hewi hmaronewjexini, hejnu hikchikanu xye tshijneya.

¹¹ Waneya Siquém wla tshinru turu hiyrun-koxa wla htshinna tomolene: — Nanjithi ntshinyawaka hkamhinno. Wane hixinipno hit-koxa kluktako hanjitanno wale nenekanhi.

¹² Hi pso wenruktako himaluklo ho hatskowenrukajinro nwenutanru hiyrun-koxa halukluro henekachaxikolu nenekanhitshi hi psoktako halukanu. Xye tsonu nanjithi henekanno nhanunroxyawakaplo.

¹³ Waneya Jacó whenene hihitlu Siquém hiyrun-koxa ruru Hamor ruhitatkana seyni hyokwitna wanna klu tshinanu rumtukatkalo himolna Dina.

¹⁴ Wla htshinna: — Hi wumukata henekletlu wimole suxo satu yineru mustakptojitkotu rimwiywakaplo klu tshinanu wale kapatmenuru hixa tshinanu.

¹⁵ Xye tsonni himaletjeru. Hixa pixka hma mixyawakanu ptowruneka jejinhi jiprojhaptojita waneya witshixinyi pimwiywakaplo.

¹⁶ Wane hixini waneya wenekanhi hixa whenene suxone hhanunroxyawaka hiyrun-koxa hixa whenene suxone whanunrotanu. Hixayma wwanu hixa. Pa nerupka wixinwa.

¹⁷ Seyni pmalukkanuklunru wtshinyawakyi wepuro wkonamtanu waneya wyanutka.

¹⁸ Waneya wanna tokanu poyikotlu Hamor hiyrun-koxa hiwhene Siquém hpoyikota.

¹⁹ Xye makluji koxa satu kahwakpiratkalurni rurupji hajeneya ptowruneka. Hiyáhoni hchiretatka hkamhiywaklu htshinyawakluna klu tshinanu ralukpotutatkalo Jacó hchitsho.

²⁰ Waneya Hamor hiyrun-koxa hiwhene hipoktshina jihlokawaka swa hjihlokatkana riynumatatkana jejine hipoktshina hajene.

²¹ Wla htshinatkana: — Nyi jejine kihle hwachalu hijhatshinni. Hiyáhoni xawakni witshitanna hewi tshijne rawyawakna, hewi hmaronewaxyawakna klu tshinanu tsru tshijneru xye tshijne. Hpoyahotna hewi rawyawakapna. Hiyáhoni hiwheneronna whanunrotanu hiyrun-koxa wwuhenene suxone wenekanna wanna, hhanunroxyawakapna.

²² Seyni ptowru jeji hixa tskala hwatshri jiprojhaptojitkoklunu tsonu hima hixa tskala rumukata hwaletna pa nerupka wixinripa tsonu.

²³ Hi he wane wixinipa wanna prane boi-ne hixanpatka, rejnunkatna hixanpatka hiyrun-koxa wanna prane ptowruneko hixanpatka? Hiyáhoni xawakni hkamhakjixlerna wkamhanu hixa tskala rawyawakapna.

²⁴ Waneya ptowru yineru Hamor tokanu hiyrun-koxa Siquém tokanu halukatshine hipoktshi hichpakawakle rapatjexyana. Hiyáhoni ptowru jeji wale poktshi hichpakawakle yapamtatshri jiprojhaptojitka.

²⁵ Waneya map-hohne rixinritka katshinokowalu hichrena Diná molene tsrujrune Simeão, Levi tshinkalune hwaplu hyohlolewaprena. Waneya hike mtshinamtkaneko hjihlokapoktshitna waneya ruylatatkana jejine ptowrunnika.

²⁶ Hamor ruylatna yohlolewapiya hiyrun-koxa hiwhene Siquém ruylatna yohlolewapiya. Waneya Diná hkochpakna Siquém-pjiya waneya poktshi ruchpajyatkana.

²⁷ Waneya pimrine Jacó whenene hiylatkalunni yehi hyapamtatkana waneya wannakatkani pantshikaka hiyrunu poktshini yotkakatshinetka himolna mkahwakpiraxikowakanu poktshini.

²⁸ Wannani pran-kaka ovelha-ne, boi-ne, jumento-ne ranikatkana. Poktshini hwakanatatshine hiyrunu campo hwakanatshine ranikatkana.

²⁹ Hpohirewlena ptowru potuko ranikatkana. Hiwheneninna hkachitatkana, hiyrunu suxone ranikatkana. Hiyrunu pantshi hajer-koxni rapnokatamtna.

³⁰ Waneya Jacó hiwhenene Simeão, Levi riynumatatka wla htshinatkana: — Hixa kojwakatkano. Hixa nahjikowaka hkamhiyno yine hetanuya, cananeu-nerune hetanuya, ferezeu-nerune hetanuy-koxa nahkako. Hix-honra mixonwu hiyáhoni rapatjetanna hkamnixyawakapnona, hnikatannona hita hiyrun-koxa nopji hajenepni.

³¹ Seyni ruhitluna, wla htshinruna: — Wumukata hetachaletluhe wepuro hkamnixyawaka kapoklewaklero pixka tixikowaka?