Gênesis 33 - Bíblia

Jacó, Esaú Yoptoxyawaka Piranapni

¹ Waneya htunohiyhalexinixka Jacó retlu tujrapatkani runamtatka Esaú quatrocentos jejine ymamnuru. Hiyáhoni mturune hkanipretatka Lia sreta, Raquel sreta, htowrerone hepi sreta hkaniprexyana.

² Htowrerone hiwhenennayma hyihapkakatka, waneya hapkatamtatshro Lia towheneneyma rutaka waneya hapkatamtatshro potuko Raquel rutaka towhene José-yma.

³ Waneya Jacó hiknohatkana, hyonohiyehitlu sete kata tshiji rutspakhojitatka haté himole hapokastsitlu.

⁴ Waneya Esaú hasukamtatka wale nwaka hsaprikatkalu, Jacó noji hsaprikatka, ramlutlu. Waneya wanna hepi tshiyahatatka.

⁵ Waneya Esaú tunohiyhaletatka retna suxone, mturuneyma. Waneya wla htshinatka: — Katnihe wanna pixaymalune? Waneya Jacó wla tshinru: — Wanna honukla nowhenene Hoyakaluko ruhlenu tshinanu renejyano hita ptowrerno.

⁶ Waneya Jacó towrerone wale nwaka rapokatkana wanna hiwheneneyma. Hyoptsojityehitluna.

⁷ Waneya Lia towheneneyma hapokanwakatlu koxa. Hyoptsojityehitluna. Waneya José hiyrun-koxa Raquel hapokanwakatlu. Hyoptsojityehitluna.

⁸ Waneya Esaú hepomhalu, wla htshinru: — Kluhe paluka tshinkakletlu hejnune nyoptojemtanune? Waneya Jacó wla tshinatkalu: — Wale honukla kihle yoptole pimixyapno pixa nutsrukatyi.

⁹ Waneya Esaú wla tshinru: — Seyni nomole hejnu hixo waneyno. Hiyáhoni xawakni pimwalerutka pumutukanu.

¹⁰ Waneya Jacó wla tshinru: — Seyni hike, puchinikanrexinpakno nanjityi nenekachale pyoptoxinno. Klu tshinanu pix-hoji nexyawaka hatatjewa Hoyakalu hoji netatka hatewa pukchikhihlenutno.

¹¹ Hiyáhoni nanjityi pumutukanru xye pepixjerupa hita henekle klu tshinanu Hoyakaluko ruhlenu tshinanu nimwalu hejnu hixetatshri. Waneya hipokananu hyoptokjixlu renekachale hiyahokni hyoptotlu.

¹² Waneya Esaú wla tshina: — Hayewa, wsatokamtatjewa, nkosekamtanutshi hita.

¹³ Waneya Jacó wla tshinru: — Nutsrukate pimatlu mturune hi tsrukakawana hiyrun-koxa pratshine kowhenerune hitaymakaka. Nmaklutene hipokananu hanjininapna pratshinepni pa hohnepka tshinanu ptowruneka pratshine hipnanuna.

¹⁴ Hiyáhoni xawakni nanjityi pixa nutsrukatyi pkosejinno hita ptowrerno. Waneya hitatshi hihleko yanu pratshine hatjiniyaka, mturune hakota yalexyawaka pa teyakamnupno haté nutsrukate yehi napojinipa Seir tshinikowaka.

¹⁵ Waneya Esaú wla tshinru: — Pitshitanno satkaka nmaklutene hitaymalune pix-yehi nuchomxyawakapa. Seyni Jacó wla tshinru: — Hi nujhalu wane pixyawakno. Npoyahnutyi kihle yoptole pixyawakno nutsrukate.

¹⁶ Hiyáhoni wale hohneko Esaú satokatka hyiywaka Seir tshinikowaka.

¹⁷ Seyni Jacó Sucote tshinikowaka nwakako hyatka. Waneko hpanawaxyatka hiyrun-koxa corral-kaka hkamha hiprane tshinanu. Hiyáhoni Sucote rutakhiwakatka hipoktshi.

¹⁸ Padã-Arã tshinikowaka ruchpajiniklunutka Jacó, Siquém poktshi rapokatka Canaã tshijne hwatshri. Waneya wale poktshi yoptowaka sreta hpokowaxyatka.

¹⁹ Campo psoji nikalumtapji hpokowaxyawaka ranjitatka. Hamor tshinkaluru whenene Siquém hiru ranjitlu. Cem proji pejnu prata kamhikolu hwenutlu.

²⁰ Waneya altar hkamhatka waneya. Hoyakalu Israel Hoyakalute rutakhiwakatlu.