Gênesis 32 - Bíblia

Jacó Halpokoxnawakwa Hyoptoxyawakaplu Esaú Piranapni

¹ Waneya Jacó yamtatka waneya hiwejikalune Hoyakalu towrerune tenhohne hajene yoptotlu.

² Waneya rexinixkana hiwejikalune Hoyakalu towrerune tenhohne hajene Jacó wla tshinatka: — Nyi hixolune Hoyakalu soldado-tenni. Waneya wale poktshi rutakhiwakatlu Maanaim.

³ Waneya Jacó runamxyawaka pirana hinkakletatshine hyokanata hkosejyawakapna himole Esaú nwaka, Seir tshinikowaka, Edom tshijne hwatshri nwakaya.

⁴ Htowutna, wla htshina: — Wla htshinanru nutsrukate Esaú. Ptowreru Jacó wla tshina hinkaklekjixwu, “Ptowreru Jacó-no, Labão-sko nwatka, waleymakananno haté xawakni.

⁵ Kapranno boi-ne, jumento-ne npurata, carneiro-ne npurata, cabra-ne npurata. Ktowrerno suxone, jejin-koxa. Xye pirana nyokananwakaxyawakyi pixa nutsrukatyi kihleru pixa yoptolexinipno.”

⁶ Waneya wale pirana hanikatshinemka satokatka Jacó nwaka waneya wla htshinatkaluna: — Pimole Esaú nwakamka wapokatka seyni wale koxa pixa nwaka hyamta hyoptoxyawakapyi jejineyma, quatrocentos pejnu.

⁷ Waneya Jacó pikpotutatka, hkojwakahchinikanutatka. Hkanipretatkana yine waleymalune, pratshine hkanipretatka, carneiro-ne, cabra-ne, boi-ne, camelo-ne hkanipretatka hepi xkehi rixyawakapna.

⁸ Waneya wla htshina Jacó: — Hiyahokni Esaú pa xkehipni rapkapinipa, ruylaxiniplu waneya pa xkehi hixetatshripa himukata hasukleta.

⁹ Waneya Jacó wla tshina hanjireta: — Ha Hoyakalu, nurni Abraão-ni Hoyakalute, nuru Isaque Hoyakalute, Tsru Hixikatshriwa Hoyakalu honukla nunkaklexijeru wla ntshinjeru: “Ptshijne nwaka psatkapanu, pimolene nwaka. Wane hixatshripyi nepixanyi kihleruya.”

¹⁰ Seynimka hita hi hijhakalurpotno pepixle tshinanuya, hi napkaplu halikakalutu pirana puphujetleru hita ptowrerno yehiya. Klu tshinanu hit-mitshi Jordão wenne nkopruhaxyatka nkanojereymatka tsonu seyni xawakni hepi xkehi mnutkano.

¹¹ Hiyáhoni xawakni nanjityi pepixyawakapno, pkochpakanno nomole Esaú myoya. Klu tshinanu npiklu klu tshinanu pa katako runanu hita ruylaxyawakapa hiyrun-koxa runrona ymakananu mturune ruylatanu.

¹² Seyni mitshi pixa wan-tshinno: “Kihlewaka nkamhinyi. Ksatuji mar powha hwatshri pejnu pixka nixkakanyi, ptshinno mitshi hixolunpotpakyi mpoyaho hitakyahoklexikowakanu pejnupyi.”

¹³ Waneya waneko rawatka wale yetshno. Waneya rimwaleru hkanipretatka henekachalu himole Esaú tshinanupa.

¹⁴ Pratshine hkaniprelene pejnu wla pejnuna, duzentas cabra-ne, vinte bode-ne, duzentas ovelha-ne, vinte carneiro-ne,

¹⁵ trinta camelo-ne suxone hiwheneneymana hkanipretatka, quarenta wakane, dez touro-ne, vinte jumenta-ne, dez jumento-ne. Wale pejnu hkanipretatka.

¹⁶ Htowrerune rutaka satkaka pratshine hislahatshripa rixyawaka. Wale nerupka ranikka. Waneya htowutna htowrerune, wla htshinatkana: — Hkoseka kopruhalexinno, hohatjiniyakkaka hwakakamxini pratshineyma.

¹⁷ Waneya pratshine hikosekatshri htowutatka, wla htshinru: — Nomole Esaú yoptoxinipyi, repomhiniklunupyi katu towreryihe ho hanhe pyanu ho katu prannihe nyi, htshina hepomhalexinipyi,

¹⁸ Waneya punkakanru, wla ptshinanru: “Ptowreru Jacó pranni nutsrukate Esaú henekachaxikolunepni. Hixa hatjini runamta wale,” ptshinanru.

¹⁹ Waneko pixka htshinru satu hapkatamtatshri hepi rixinri, mapa rixinri koxa waneko pixka htshinru wale koxa. Waneko pixka htshinatkana wanna ptowruneka pratshine xkehkaka hanikatshine. Waneya Esaú hyoptoxinipa waneko pixka htshinanru.

²⁰ Wane pnute htshinanru, wla htshinanru: — Ptowreru Jacó hita hatjiniyaka hinamtanu. Wla htshina towutletna klu tshinanu wla rixahchinikanuta, “Pa katako numukata yokwiretlu hejnu nkosekkakleruyma tshinanu waneya nohoji potuko rexiniklunupa pa katako kihle yoptole rixanno.”

²¹ Hiyáhoni renekachalepa wenu hkopruhatatka. Seyni wale rumajeruko riknokak-yetshnoxyatka.

Jacó Hoyakaluyma Yahotkajyawaka Piranapni

²² Waneya wale yetshno hpalnatka hhanunrone hepi ranikatka, htowrerone hepi ranikatka hiyrun-koxa hiwhenene onze-ne ranikatka waneya Jaboque hapha hkopruhawaka hkopruhaxyatka.

²³ Ranikatkana, hkopruhakakatkana wanna hiyrun-koxa rimwaleru ptowruka hkopruhakakatka.

²⁴ Waneya rapaluchatatka Jacó. Waneya wanekni satu jeji yahoxyalu haté rumrerekatka tkatshi.

²⁵ Rexinixka jeji hi rakota yahotletlu Jacó, Jacó tpali hapu yokle hyotnekatka hpixkonuyma hiyáhoni Jacó tpali hapu yokle himtuwnatka hyahotkakka pchinikna.

²⁶ Waneya jeji wla tshinru: — Puchotanno nyiywakapa klu tshinanu hohistsitkani. Seyni wla htshinatka Jacó: — Hi nuchotanyi kihlewaka pma tshinanwakatkanuko pchinno.

²⁷ Waneya Jacó repomha: — Klu hiwakyihe? Waneya ruhitatka, wla htshinru: — Nhiwaka Jacó.

²⁸ Waneya jeji wan-tshinru Jacó: — Xawakni hi Jacó phiwakatko seyni Israel phiwakatko klu tshinanu Hoyakaluyma pyapretaklu, yineyma koxa pyapretaklu hiyáhoni pyoptotlu.

²⁹ Waneya Jacó wla tshinru: — Klu hiwakyihe pixa, punkakhiwakatanno? Seyni wale wla tshinru: — Klu tshinanhe paluk-himatka hiwakatno? Wanekni kihlewaka htshinanwakaxyatkalu.

³⁰ Waneya wale poktshi rutakhiwakata Jacó. Peniel hhiwakatlu klu tshinanu wla htshinatka nethojitlu Hoyakalu seyni hi nupnatka.

³¹ Waneya hkopruhaxinixkalu Peniel ronotatka tkatshi seyni hitpali tshinanu hyohtetatka.

³² Wale tshinanu israel-nerune hitpali hapu yokle hi hnika haté xawakni klu tshinanu Jacó tpali hapu yokle himutskirhalerutkani hyotenkoklunutka mitshi.