Gênesis 30 - Bíblia

¹ Waneya texinixka Raquel tma michiwpiraxyawakanu Jacó-yma thahxatlo tomole. Hiyáhoni wla ttshinru Jacó: — Piwuhenewatanno yáholu nupnanu.

² Waneya Jacó hahkalo Raquel waneya wla htshinatka: — Hoyakallahe pikahwakno hita hatatjewa hitakni himaletyi pma michiwaxyawakanu?

³ Waneya wla ttshinatka: — Haté hehe twukni ntowrero Bila. Walatshi pumumkanu hiyáhoni hitasko tmatuwhenexini, numukata wuhenewletanu hit-koxa wala hiwakaya.

⁴ Hiyáhoni teneklu ttowrero Bila tshinkaluro hhanunroxyawakapa. Waneya Jacó himumkatkalo.

⁵ Waneya tmichiwatatka Bila. Mturu jeji tmatkajyatkalu Jacó.

⁶ Waneya Raquel wla tshinatka: — Hoyakalu hetahchinikanyehitatkano, nanjire hjematka, mturu jeji renekno. Hiyáhoni Dã thiwakatlu.

⁷ Waneya Bila tshinkaluro Raquel towrero michiwatatnaka waneya mturu jeji tmatkakatka hepi rixinri towhene.

⁸ Waneya wla ttshinatka Raquel: — Tsru yahtaletlu neta nomole suxoyma nyahtaletkatka. Seyni nallitanatkalo. Hiyáhoni Naftali tutakhiwakatlu.

⁹ Seyni texinixka Lia tutuka twuhenewlexyawaka, ttowrero Zilpa twapa, teneklu Jacó hhanunroxyawakaplo.

¹⁰ Waneya Zilpa tshinkaluro, Lia towrero mturu jeji tmatkajyalu Jacó.

¹¹ Waneya Lia wla tshina: — Hixolunepatkani. Hiyáhoni thiwakatlu Gade.

¹² Waneya Zilpa tshinkaluro matuwhenetatnaka jejni hepi rixinri whene.

¹³ Waneya Lia wla tshina: — Poyikowatatshrono! Potukalno ntshinko suxoneya. Hiyáhoni Aser tutakhiwakatlu.

¹⁴ Waneya trigo-ji hamikolu klu papkotkani, Rúben campo yatka waneya hejnuji mandrágoras rukchika. Runro, Lia nwaka ranikatkalu. Waneya Raquel wla tshinatkalo Lia: — Mandrágoras psoji piwhene hwapleru penekanno.

¹⁵ Seyni tuhitlo, wla ttshinro: — Pixahlahe nhanuru pkoniywakno pikahwakanru noturu hwapleru mandrágoras koxa paluka konretno? Seyni Raquel wla tshinatkalo: — Pixa himumkanru Jacó xye yetshno pituru hwapleru mandrágoras penejinipno.

¹⁶ Waneya kayi rixinixka Jacó campo ruchpajiniklunutka Lia wane ya tyoptoxyawakaplu waneya wla ttshinru: — Pujhalu pumumjiywakno klu tshinanu nanjitatkayi noturu mandrágoras hwapleru wenru tshinanu. Hiyáhoni wale yetshno rimumkatkalo.

¹⁷ Waneya Hoyakalu yijnaktokanutlo Lia hiyáhoni tmichiwatatnaka, mturu jeji cinco rixinri tmatkajyatkalu Jacó.

¹⁸ Waneya Lia wla tshina: — Hoyakalu wenutatkano klu tshinanu ntowrero nenekatkalu nhanuru rimwiywakaplo. Thiwakatlu Issacar.

¹⁹ Waneya tmichiwatatnaka Lia waneya mturu jeji seis rixinri tmatkajyatkalu Jacó.

²⁰ Waneya Lia wla tshina: — Henekachalu kihleru renekno Hoyakalu. Halikakni xawakni nhanuru hitaymalutukotnakni hetkopa klu tshinanu seis whenene jejine nmatkajyalu. Hiyáhoni tutakhiwakatlu Zebulom.

²¹ Waneya wane pnutetka suxo tmatkakatka. Thiwakatlo Diná.

²² Waneya Hoyakalu hichinikatkalo Raquel. Hoyakalu yijnakotatkalo tanjihohnere hiyáhoni mturu mapa ruhleta.

²³ Tmichiwatatka mturu jeji tmatkakatka. Waneya wla ttshina: — Numtuknukananu hkonyano Hoyakalu.

²⁴ Tutakhiwakatlu José. Waneya wla ttshinatnaka: — Tsru Hixikatshriwa Hoyakalu pajrikawhenetanno satutshi jeji penekanno.

Jacó Pohirewnale Pirana

²⁵ Waneya José tali matletatka Raquel, Jacó wla tshinru Labão: — Pitshitanutkano nuchpajyawaka ntshijne nyanutka.

²⁶ Pitshixinno nhanunrone nkamrurewyehitanune hiyrun-koxa nowhenene pitshixinno. Pitshitanno nyiywakapa klu tshinanu pimatlu kamrurtshi nkamhiyatkayi.

²⁷ Seyni Labão wla tshinru: — Hitshi, nanjityi kihleru paluka hixlexinipno hi pyanutka klu tshinanu netlu hanu rixa hepixletno Tsru Hixikatshriwa Hoyakalu pixa tshinanu.

²⁸ Hiyahokni punkakanno hi psokta paluka pkamrurepa wenru tshinanu klu tshinanu wale nenekanyi.

²⁹ Waneya Jacó wla tshinru: — Pimata hanu nixa kamrurewleta pixa tshinanu hanu nix-hislahlepratyi.

³⁰ Klu tshinanu nmapokkanuklunuwa hi hixo pra pixapa seyni xawakni pixolewapratatka hiyrun-koxa Tsru Hixikatshriwa Hoyakalu hepixatkayi napokyehixyawakyi tshinanu. Hiyáhoni hikluhe hitanuko nukchikanutka nopji hajene hepixatshripa?

³¹ Waneya Labão wla tshinru: — Haté hehe klunerhe nenekanyi? Waneya Jacó wla tshinru: — Hike penekanno halikaka xye tsonu ntshinanyi piprane nohlutanutnaka, nuslahapratanyi hiyrunukotnaka.

³² Wla nixanu. Xye hohne piprane yehi nyapamtanu carneiro-ne yehi, ptowru pratshine kayonalo tseyo pkolhalo ksajiro nkotspalatanu. Hiyrun-koxa ptowru cabra kayonalo tseyo pkolhalo nkotspalatanu. Walekakpakni nwenuxikolupa.

³³ Hinamtatshri hohnepa rimathetko nuhlenu pixa hetanuya ptowru katako nkamrure wenru hikolukle pejnutjetokanuta. Hiyáhoni pratshine ho cabra kayonalu hmixkanu ho carneiro ksajiro hmixkanu hanuruktako hit-yehi hikchijikoklunupa tshowhururni.

³⁴ Waneya Labão wla tshinru: — Hikamturu ptshinyawaka pixka rixyawaka.

³⁵ Waneya wale hohneko Labão hwapatkana bode-ne kayonalune hiyrun-koxa rawapatkana cabra-ne kayonalone, ptowruka klatlune kahnete rutaklu. Hiyrun-koxa ptowru carneiro ksajiro rawapa waneya hiwhenene hislahjexyawaka rutakatkana.

³⁶ Waneya map-hohne yanru pchini hkotspalkajyanru Jacó-nu hiprane tshinanuya. Waneya Jacó hohlujetatkana Labão prane wane hitukatshine.

³⁷ Waneya Jacó hahajekaka herotu estoraque muna, amêndoa muna hiyrun-koxa plátano-je rawapa. Waneya wale-je hchichpita kayona tshrathakaka rixa chichpiretlu.

³⁸ Waneya hahmunajekaka chichyaluru pratshine hirjexyawaka rutaka. Hiyáhoni pratshine hapojini ruryawakapna honha ratskokajiniklunupna hahajestsiya hmichiwaxinpatkana pratshine.

³⁹ Waneya pratshine michiwatatka hahajestsiya. Waneya hmatkakluna pratshine kayonalune, ptowru hix-yonatatshri kahapotsyonhalu, kyotmohleru, kayonalu.

⁴⁰ Waneya Jacó kanipretatkana carneiro whenene waneya Labão prane hyopukhakakna pratshine kayonalune nwaka hiyrun-koxa pratshine ksajirune nwaka hyopukhakakatkana. Seyni waleko hiprane kahnete rutaka, hi Labão praneyma rutakna.

⁴¹ Waneya hiklukta pratshine pomtalune potu michiwapirata Jacó hahajekaka rutaka wanna yhale sreta hirawaka yehi hmichiwaxyawakapna pratshine hahajeyehiya.

⁴² Seyni pratshine mpomtanestsi hi rutaklu hahajekaka. Hiyáhoni pratshine mmixkone Labão pranepatka seyni Jacó prane hixkolunpatka.

⁴³ Jacó pohirewnapotutatka. Hixo pratshine rimwatka, towretshrone hixolune rimwatka, towrertshine hixolune rimwatka, camelo-ne hixolune rimwatka, jumento-ne hixolune rimwatka.