Gênesis 3 - Bíblia

Yineru Himtujnawakwa Piranapni

¹ Seyni himnu jimatkalerni wale pimrine hocha hajeru Hoyakalu kamhalene yohnik-himatkalru, wane htshinro suxo: — Hoyakallahe hi hitshinikletyi ptowruka hitaklu hwiywaka hajeru?

² Waneya tuhitlu suxo: — Ptowruko hejnuji hitaklu hwiywaka hajeru wumukata nikleta, hixanutkani,

³ seyni hanikajpotuko hwatshri hahmuna sahi wane htshina Hoyakalu hi hyotnekanru, hi hnikanru hmupniywakanupa.

⁴ Seyni himnu wane tshinro suxo: — Wale hnijinipa hi hipnanutka.

⁵ Klu tshinanu Hoyakalu himata hiklukta hnikanru waneklu himrekhatanutka, Hoyakalu pixka hixanutka himaxyawakaplu kihleru, hektutu.

⁶ Waneya suxo texinixkalu hahmuna, kihle sahkaka rixyawaka tshinanu pnikkolu tikahwaklu hiyrunu toyhale texyalu kihleru hahmunni tet-sotanutlu pnute timaxyawakhimapa. Hiyáhoni hisahi tkomlaka, tniklu, thanuru koxa tumluka, hnik-koxlu wale.

⁷ Hnijinixkaluna ruslahnatkawana wanna hepi machkopinetkani waneya figueira sure hyots-hatkana himkalupna.

⁸ Kayi potuko mapchahapira Hoyakalu hitaklucha hyotaljetapa waneya hyijnaktokantapinixkaluna Hoyakalu yine, Hoyakalu hoji hyohimaxyatkana jeji, suxo. Hahmuna hmana hyohimatna.

⁹ Waneya Hoyakalu tomhamkalu jeji, repomhalu: — Hanhe pya?

¹⁰ Waneya wale hihita: — Nyijnaktokanutmakyi hitakluchaya seyni npikatka klu tshinanu machkopirno hiyáhoni nyohimata.

¹¹ Waneya repomhalu Hoyakalu: — Ha hanu hixa himatletlu machkopiru hixyawaka? Hnikatkalhe hahmuna sahi nmitshiniklexyahi?

¹² Waneya wane htshina jeji: — Suxo penejyano, nhanunro, hahmuna sahi henekno, nniklewatanu.

¹³ Waneya Hoyakalu wane tshinro suxo: — Kluhe xye pikamha? Tuhitlu suxo: — Himnu yokwijetno wale tshinanu nniklewatanu.

¹⁴ Waneya Hoyakalu wane tshinru himnu: — Hektutu pkamhiywaka tshinanu pimri hocha hajeru, pantshi hajer-koxa yohnik-himtukpatkayi hiyáhokni pisatuko pyannixka ptowru hohneruka tshiji pahi pnikanu.

¹⁵ Himnu, xawakni pkamnitjeropni suxo, pixa koxa hahkanro wala. Hiyrun-koxa himnu piklopichane hahkanro wala hiyrun-koxa suxo klopichaneyma hkamnikakanna, suxo whene hiylajiwutanunyi seyni pixa hachkastsihjixitanru.

¹⁶ Waneya Hoyakalu wan-tshinro suxo: — Psalewnanu ptshinowaxinipa yohnik-tshinpotu petanutshi. Katshinpotpaklu hmatuxinpatka piwhene. Wanepnawaka ptowutjerupni phanuru, pixa kamhanru ptowruka ralukleru.

¹⁷ Waneya Hoyakalu wan-tshinru Adão: — Pixa niklu hejnuji wane ntshinyi hi pnikanru seyni pyijnaktokanutlo phanunro. Hiyáhoni hektutkalu tshiji pixa tshinanu, tsru kamrurtshi potuko pkamhinri pnijinri, ptowru hohneruko piwekka pchinika.

¹⁸ Hiyrunu tshiji ruptshejini ptowru hixatshri kawchiri, pniklerupa hsana hitakkaluru yehi.

¹⁹ Hiyáhoni pihoji ruchpajini puhkokha pnikleru pkochpajyawakapa haté pupnanu psatkapanu tshiji klu tshinanu tshiji kamhikolyi. Kajpapahyi, kajpa pahiko pixinixnakwa.

²⁰ Waneya Adão hiwakatlo hhanunro Eva klu tshinanu ptowru yineru hinropatkani.

²¹ Waneya Tsru Hixikatshriwa Hoyakalu kamhalu mkatshri hocha hajerumtaya, hmakatlerupa Adão hnunro koxa hmakawatatkana.

²² Waneya wane htshina Tsru Hixikatshriwa Hoyakalu: — Jeji hiprotakatka hixa pixka rixyawakpatka, xawakni rimathexyawakpatkalu kihleru, hektutu. Adão, Eva rimaletatka hma yosurukamyoxyawakanpatnaka hiyrun-koxa hma komlajyawakanpatnaklu hahmuna hiwejikaluru heneklewatatshri tshinkaluru sahi, hma nijyawakanuplu, hiweklu phuta hikeklu hohne mnikawnakatupa heneklewatatshri.

²³ Wale tshinanu Tsru Hixikatshriwa Hoyakalu hiknokatkalu jeji hitaklu hwiywaka Éden tshinikowaka hma wiywakanpatka hiyáhoni hkamhikoluko tshiji hjitota Adão rutaklewaxyawakapa.

²⁴ Hiyáhoni maleka hyokanatka jeji. Waneya hma satkapyawakanupa Hoyakalu hitaklu, Hoyakalu towrerune tkatshi hichpajyawaka sreta rutakna Hoyakalu. Hiyrun-koxa rutaklu satu yohlolewapi hitokote ruchpakmeroxya tshitshi, psoluka hsajrukmerota, rinoxyawakaplu hatnu hapo hahmuna hiwejikaluru heneklewatatshri nwak-hapo.