Gênesis 29 - Bíblia

Jacó, Raquel Hyoptoxyawaka Piranapni

¹ Waneya Jacó yatnaka, hyakananumta haté Mesopotâmia tshinikowaka rapoka.

² Waneya reknojtamta retlu hakopha campo hwatshri waneyakni retlu mapa ptohi pratshine carneiro-ne hakopha-stsi hikoluhatshine klu tshinanu wale hakophakni rurjetna carneiro-ne. Seyni satu tsru sotlu rupleta hakopha.

³ Wane rapatjexyatkana pratshine carneiro-ne ptohikaka. Waneya sotlu hakopha hichyatatshri hkotpukatkana carneiro-ne hislahatshine. Waneya honha rutakyehitkana carneiro-ne waneya sotlu rutakatnakna hakopha ruchyatatnakna.

⁴ Waneya Jacó wla tshinatkana: — Nomolene, hanu hajenhihe? Waneya ruhitluna, wla htshinruna: — Hixni Harã tshinikowaka hajenwu.

⁵ Waneya Jacó hepomhatkana, wla htshinatkana: — Hixaklahe hetjejetlu Labão tshinkaluru, Naor whene? Waneya wla htshinatkaluna: — Hehe, wetjejetlu.

⁶ Waneya wla htshinatkana: — Pomtalhe? Waneya ruhitluna wla htshinruna: — Hehe, pomtalu seyni petanu tojrapatkani wale hchitsho Raquel tshinkaluro pratshine carneiro-ne tanikamta.

⁷ Waneya wla htshinatka Jacó: — Hetanu hanikaj-hohnekowani hiyáhoni hi rapokpapkolutawa pratshine hapatjexikowak-papko. Hiyáhoni honha hitajinna pratshine carneiro-ne waneya hohlutapana.

⁸ Seyni ruhitluna, wla htshinruna: — Hma mapatjetkanu pchinikna pratshine hiyrun-koxa sotlu hakopha hichiyale hma kotpukkonuklunu hi wumukata. Halikaka hkotpukkoklunupa tsonu honha wumukata hitletanna pratshine.

⁹ Waneya wannayma riynumsakakakanatawa Raquel hapokatka turu prane carneiro-ne yma. Wala honukla pratshine suslahaklero.

¹⁰ Rexinixkalo Raquel, Labão tshinkaluru, runro mole whene hinamtatshro pratshine carneiro-ne Labão prane yma, wala yehi hyatka Jacó. Sotlu rerutatka hakopha hichyale waneya honha rutajyana Labão, runro mole prane.

¹¹ Waneya Jacó hamlutatkalo Raquel, htshiyahatatka Jacó.

¹² Waneya Jacó hinkakatkalo turu mole whene rixyawaka, Rebeca tshinkaluro whenni. Waneyakni tasukamtatka, xye pirana tunkakatkalu turu.

¹³ Waneya hjeminixka Labão, himole suxo whene hapojyawaka pirana rasukamtatka hyoptoxyawakaplu. Hsapriklu, ramlutlu waneya ranikatkalu hipji nwaka. Waneya Jacó hinkakatkalu Labão xye pirana ptowruka.

¹⁴ Waneya Labão wla tshinru: — Halikakni pixa nomolyi nohapu, nohityi. Waneya Labão yma rutukatka pa ksuru pchinika.

Jacó Hanunrowaxyawaka Piranapni

¹⁵ Waneya Labão wla tshinru Jacó: — Nomole pixyawaka tshinanu hi pumukata kamrurewlechaxini hike mkayatkatukyi. Hiyáhoni punkakanno hi psohe palukanu?

¹⁶ Labão hepi whenru suxone. Tsrojro hiwaka Lia, hepúrotshi hiwaka Raquel.

¹⁷ Lia tshinkaluro kihle swahayhalerni seyni Raquel kihle manero, kihle hojiro potuko.

¹⁸ Jacó hamotpotutatkalo Raquel. Hiyáhoni Jacó wla tshina: — Nkamrurewatanu sete mhale pejnu Raquel, piwhene hepúrotshi tshinanu.

¹⁹ Waneya Labão wla tshinru: — Kihlepot-hetkolu wala nenejyawakapyi pixa hi satuko yineru nenekanro. Hiyáhoni hitayma putukanu.

²⁰ Hiyáhoni Jacó kamrurewatatka sete mhale pejnu Raquel tshinanu. Seyni waleho ho hepi ho mapa hohne pejnu tsonu hkamrurewata wala tshinanu klu tshinanu ramotpotutatkalo.

²¹ Waneya Jacó wla tshinru Labão: — Penekanno nhanunro numumjiywakaplo klu tshinanu nali kamrurewletatka wala tshinanu.

²² Waneya Labão hapatjetatkana wane hajene jejine ptowruneka waneya tsru niklu hkamhatka.

²³ Seyni wale yetshno hiwhene tsrojro rawpatka Jacó nwaka ranikatkalo waneya Jacó himumkatkalo.

²⁴ Hiyrun-koxa Labão heneklo hiwhene Lia, htowrero Zilpa tshinkaluro ttowrero tixyawakapa.

²⁵ Seyni rumrerejinixka tkatshi Lia-ktani. Hiyáhoni Jacó hepomhatkalu Labão, wla htshinru: — Kluhe pixno? Hi he nkamrurewatatka Raquel tshinanu? Hiyáhoni xawakni kluner-tshinanhe pyokwijetatkano?

²⁶ Waneya Labão hihitlu, wla htshinru: — Seyni wale hi hixa wixannu hewi wtshijneya. Hepúrotshi hi himukata hnuruwlehapkata.

²⁷ Hiyáhoni xawakni xye semana hapkatshi pnikatanu phanunro phanunroxinritka tshinanu waneya satoko wenekanutnakyi nkamrure pkamhinixnakno sete mhale pejnu wala tshinanpatnaka.

²⁸ Waneya wane rixatka Jacó. Wale semana ruknokakatka Lia hhanunroxyawaka tshinanu. Waneya Labão henekatnaklu richitsho Raquel hhanunroxyawak-koxa Jacó.

²⁹ Waneya Labão heneklo richitsho Raquel, htowrero Bila tshinkaluro ttowrero tixyawakapa.

³⁰ Hiyáhoni Raquel koxa rimumkatka Jacó. Raquel ramotatka Lia ramoxyawaka pnute. Waneya hiyrunu sete mhale pejnu hkamrurewatatka Labão yehiya.

Jacó Whenene Piranapni

³¹ Waneya Tsru Hixikatshriwa Hoyakalu hetlu tkamnitkatka Lia, hmatuwhenekakatkalo seyni Raquel mwuhenewaklétoni.

³² Hiyáhoni tmichiwata Lia, mturu jeji tmatkaka. Thiwakatlu Rúben klu tshinanu wala wla tshina: Halikakni Tsru Hixikatshriwa Hoyakalu hetlu nsalewnale hiyáhoni xawakni nhanuru hamothetkotanno.

³³ Waneya tmatuwhenetatnaka, jejikotnakni. Waneya wla ttshina: — Tsru Hixikatshriwa Hoyakalu hetlu tshijicha nutajikolu hiyáhoni xye mturu koxa renekno. Waneya thiwakatlu Simeão.

³⁴ Waneya tmichiwatatnaka, jeji tmatkakakotnaka. Waneya wla ttshinatnaka: — Xawakni hetko hita hijhakalurotkano nhanuru hetanuya klu tshinanu mapa whene jejine nmatkajyatkalu. Wale tshinanu thiwakatlu Levi.

³⁵ Waneya tmichiwatatnaka, mturu jeji tmatkakatnaka. Tsru Hixikatshriwa Hoyakalu nimalwutanu xawakni. Hiyáhoni Judá tutakhiwakatlu. Waneya tutuka wuhenewletatka.