Gênesis 28 - Bíblia

Jacó Hasujyawaka Piranapni

¹ Hiyáhoni Isaque tomhalu Jacó. Kihleru htshinanwakatlu waneya htowutlu: — Hi phanunrotanro suxo canaã-nero.

² Padã-Arã tshinikowaka nwaka pyanu. Betuel tshinkaluru, punro hirupji nwaka pyanu waneya waneko suxo Labão tshinkaluru, punro mole whene phanunrotanu.

³ Hoyakalu Ptowru Potuko Himukatatshri hepixanyi, rixoletanyi, hixolunepyi, hixo nerunepa rixkakanyi.

⁴ Hoyakalu hinkajyalu Abraão-ni rixkakanyi pixa hiyrun-koxa piklopichanepa wane rixkakanu pyapyawaka tshijne pyoptoxini Hoyakalu henejyalu Abraão-ni mitshi tshijne.

⁵ Waneya Isaque-yma runhakakna Jacó. Hiyáhoni Jacó yatka Padã-Arã tshinikowaka nwaka Labão tshinkaluru, Betuel tshinkaluru whene nwaka, Jacó, Esaú hinro mole nwaka hyatka.

⁶ Hiyáhoni rexinixka Esaú, Isaque kihlewaka htshinanwakaxyawaklu Jacó hiyrun-koxa Padã-Arã tshinikowaka nwaka hyokanaxyawakatkalu Jacó, wane hnurtapyawakaplo suxo waneya hiyrun-koxa rimaxinixka kihleru htshinanwakaxyawakatkalu, wla htshin-towutletlu: — Hi phanunrotanro suxo canaã hajeru whene.

⁷ Rimaxinixka Jacó yijnakotatkalu ruru, runro tokanu hiyáhoni Padã-Arã nwaka hyatka,

⁸ hiyrun-koxa rexinixka Esaú, ruru Isaque suxone canaã-nerune whenene hi rukchikhihlenuta

⁹ Esaú yanwakatlu Ismael. Waneko suxo rawapya hhanunroxyawakaplo Maalate tshinkaluro, Ismael, Abraão-ni whene whene Nebaiote mole suxo.

Jacó Hipnawaxyawaka Piranapni

¹⁰ Waneya Jacó Berseba hichpajya, Harã hyamta.

¹¹ Waneya rapoklu rumkamxyawakapa wane rumjiyatka klu tshinanu rutshpokatka tkatshi. Satu sotlu wane hwatshri hkachitatka wale hoho rutspanojiwuta, rukóluha wane rumjiyatka.

¹² Waneya wane rupnawaxyatka, escada rupjeta tshiji hyopkaka, escada jiwu tenhohne hapoka; escada hyapakanatna Hoyakalu anjo-tene, ratskotna, hserpikna.

¹³ Escada teno nwaka rawakanata Tsru Hixikatshriwa Hoyakalu waneya wane htshina: — Hita Tsru Hixikatshriwano Abraão Hoyakalutno, Isaque Hoyakalut-koxno. Xye tshiji pukoluhyawaka, nenekanyi pixa hiyrunu piklopichane koxa.

¹⁴ Pixa klopichane ksatuji pejnupna; rupalatanna ptowru sretako. Pixa tshinanu, Jacó, piklopichane tshinan-koxa ruhlehchinikanyehitkona ptowruneruka tshij-hoho hwatshine.

¹⁵ Halikaka pixaymano, pixa ninotanu hanukta pyanu, wane koxa nwanu hita hiyrun-koxa nkamhanru xye tshiji psatkapyawakapa klu tshinanu hi nuknokanyi haté nunkajyawakyi nnikat-kamhaletanu.

¹⁶ Waneya ruyojinixka Jacó rupnawleya wla htshina: “Halikakni hewiru Tsru Hixikatshriwa Hoyakalu seyni hi nimatyehikanatlu.”

¹⁷ Hpikatka waneya wla htshinatka: “Hi pa hamlenukananru xye poktshi! Xye poktshi halikaka hi poktshichani seyni Hoyakalu hwiywaka potúkoni. Hewiktani tenhohne hiphaptote jihlokawakle.”

¹⁸ Waneya wale prika yetshpotukawa Jacó yotunotatka. Sotlu hyostanojrekananu hkachitatka hyotupaklu. Waneya azeite-ha ruyokhohotlu.

¹⁹ Rutakhiwakatlu wale poktshi, Betel htshinru. Mitshikananu Luz htshinka.

²⁰ Hiyrun-koxa Jacó Hoyakalu runkaklexyalu rixannu, wla htshinatka: “Hoyakalu hitaymalutu rixinpakni, repixanno xye nyanre hapoya, rohluxinipno, mkatshri rukchijinipno,

²¹ haté nurupji nwakako nsatojinipa kihle hwachalepno waneya Tsru Hixikatshriwa Hoyakalu wale Noyakalute hkahwakko hitaya.

²² Hiyáhoni xawakni xye sotlu nyotupakleru histsihi rixinixkawa Hoyakalu pjipatkani. Hiyrun-koxa ptowruka penejyano xyekaka dez penejyano psojite nsatkajinyi halikaka.”