Gênesis 27 - Bíblia

Isaque Kihlewaka Tshinyawakaphutlu Esaú Piranapni

¹ Waneya tsrutsoleji rixinixka Isaque hi rapkathojitatka klu tshinanu rumtuwnayhaletatka. Hiwhene tsrujru htomha waneya wla htshinatkalu: — Noturu. Waneya Esaú hihitlu, wla htshinru: — Hewino.

² Waneya Isaque wla tshinru: — Tsrutsolejitkano. Hi nimatlu nupnale hohnepa hikluktapni.

³ Hiyáhoni xawakni nanjityi pkatshrale hiyrun-koxa pkachretwa panikanu campo pyanu kchoteru punokapinno.

⁴ Waneya nikalhitujpa nannaleru potuko pkamhinno. Wale panijinno nnijyawakako kihleru pirana nunkajinyi nupnale hnapu.

⁵ Seyni Rebeca jemlu Isaque riynumsaxyawaklu hituru Esaú. Waneya Esaú campo nwaka hyatka kchoteru rujhapyawakapa ranijyawakaplu.

⁶ Waneya Rebeca wla tshinru toturu Jacó: — Pjemanu. Puru njema riynumsaxyawaklu pimole Esaú.

⁷ Wla htshinatkalu: “Kchoteru pujhapinno waney-xako pujpatexinno ponikolu nnijyawakapa kihle piranalu ntshinyawakapyi Tsru Hixikatshriwa Hoyakalu hetanuya nupnale hnapu.”

⁸ Hiyáhoni xawakni noturu kajnakopyi ntokanu ntowuxyayi tshinanu.

⁹ Pratshine nwaka pyanu hepi cabra whenene kihlerune panijinno. Wale nkamhinru puru nujpatexinri ponikolu puru hannaleru potuko.

¹⁰ Walejpa puru panijini kihleru piranalu htshinaywakapyi rupnale hnapu.

¹¹ Waneya Jacó wla tshinatkalo runro Rebeca: — Seyni nomole Esaú kapixiru seyni mapixitno hita.

¹² Klu tshinanu nuru kaptshajinipno weyawatatshri hkahwakanno. Wane nixinipa hektutu ntshinanwakatko, hi kihleru ntshinanwakatko.

¹³ Waneya runro wla tshinru: — Hektutu tshinanwakatkaluropno hita noturu. Kajnakopyi pixa nanjixyayi pkamhinno hiyáhoni wane pyanu, pwapinno nepujyayi.

¹⁴ Hiyáhoni hyatka pratshine ranijyalo runro. Waneya runro nikalhitujpa ponikolu ruru hannaleru potuko tkamhatka.

¹⁵ Waneya Rebeca towhene tsrujru mkalu kihleru twatka twiywakapjiya waneya toturu hepurtshi Jacó tmakatlu.

¹⁶ Hiyrun-koxa cabra whenenni mta Jacó myo hoho tostutlu hiyrun-koxa hinoji mapixiwakanu tuchyakaklu cabra-ni mta.

¹⁷ Waneya nikaluhitujpa tkamhaleru ponikolu teneklu, pão koxa teneklu. Toturu Jacó-myo tutaklu.

¹⁸ Waneya ruru yehi rapokatka waneya wla htshinru: — Papa hewitkano hita. Waneya wla htshinru: — Katyihe pixa noturu?

¹⁹ Waneya Jacó wla tshinatkalu ruru: — Hitni piwhene Esaú mitshikananu matutatshrino. Panjixyawakno nkamhatka. Hiyáhoni xawakni ppalnanu hewitshi ptuplatanu kchoteru hitni nkamhalerujpa pnikanu kihleru ptshinaywakapno paluka tshinrexyawakno ptshinanno.

²⁰ Waneya Isaque hiynumatlu hiwhene wla htshinru: — Hanhe pix-hikchiklehapkakanatlu noturu? Waneya wla htshinru: — Nukchikhapkatlu klu tshinanu Tsru Hixikatshriwa Hoyakalu, Poyakalute nyapakanaxyawaka hapo rutaklu.

²¹ Waneya Isaque wla tshinru: — Hitastsi papokanu noturu nkamrujyawakapyi nimaxyawakaplu ho halikaklahe noturu Esaú-kni pixyawaka ho hike.

²² Waneya Jacó ruru Isaque-stsi hyatka. Hkamruklu Jacó waneya wla htshinatka: — Htokanu Jacó tokanu nikahwaklu seyni himyo Esaú-myoni.

²³ Hiyáhoni hi rimata hojirewata Esaú hma mixyawakanu klu tshinanu kapiximyonotlu himole Esaú myonota pixka. Hiyáhoni Isaque kihleru htshinanwakatlu.

²⁴ Waneya repomhalu wla htshinru: — Halikaklahe noturu Esaú-kyi? Waneya ruhitlu, wla htshinru: — Hehe hitakni.

²⁵ Waneya wla htshinatka: — Noturu panikanwakaxyano kchoteru hitu pkamhalerujpa nnijyawakaplu, kihleru pirana ntshinanwakaxyawakapyi. Waneya ranikatkalu wale nwaka. Hniklu. Hiyrun-koxa vinho-ha ranikanwakatlu. Wale koxa ruratka.

²⁶ Waneya ruru wla tshinru: — Hitastsi potuko papokanu noturu, pamlutanno.

²⁷ Waneya walestsi potuko hyatka. Ramlutlu ruru. Ruru hamluphatlu himkalu hiyáhoni kihleru htshinanwakatlu, wla htshinru: “Ha noturu pixapha campo-pha pixka htshinaphata, Tsru Hixikatshriwa Hoyakalu campo hnurreru pixka pixa.

²⁸ Hiyáhoni xawakni Hoyakalu henekanyi yatsunha tenhohne serpijikatshri, tshiji tserutluru pixka pixko. Honantshi hixoyapyi hiyrun-koxa vinho-ha hixoyapyi.

²⁹ Pepixko yineya hiyrun-koxa tshijnekaka hajene yoptsojityehitanyi. Pimolene ptowutanu, rapokanna punro whenene, hyoptsojiyehitanyina. Hiylatkalurupni ptowru yineru pkamnitjerupa seyni ptowru neruka pepixjerupa repixko.”

³⁰ Waneya wla rixa hakanhaletatka. Hajeyri kihlewaka rali tshinretawalu Jacó, hajeyri ruchpajinixka Jacó, ruru Isaque yehiya, rapokatka himole Esaú yahkapatshri.

³¹ Wale koxa hijpatewatatka. Ruru nwaka ranikatkalu waneya wlamka htshinru ruru: — Ppalnanu papa, kchoterni piwhene hiwlale pnikanu, kihlewaka ptshinyawakapatkano.

³² Waneya ruru Isaque wla tshinatkalu: — Katyihe pixa? Waneya ruhitlu wla htshinru: — Hit-honukla piwhene tsrujruno Esaú-no.

³³ Waneya rutatakpotutatka Isaque. Waneya wla htshina hepomhaletlu: — Katyihe? Hiyáhoni kathe hwapyano nikalu ranikanwakaxyanno pmapokkanuklunuwa pixa kihlewaka ntshinanwaklerutka? Seyni halikaka kihlewaka pirana neneklerutka waneko rixanutka.

³⁴ Waneya hjeminixkalu ruru tokanu tsru hixkokte potuko rixamkatka tsru wamontshi potuko rixamkatka Esaú. Waneya wla htshinru ruru: — Seyni papa hit-koxa kihlewaka ptshinanutshi.

³⁵ Seyni Isaque wla tshinru: — Pimole yanwakatno rimata yokwijrewleyma hkonru kihlewaka ntshinyawakamkapyi pixa.

³⁶ Waneya Esaú wla tshinru ruru: — Hi he wale tshinanukni wla htshinahiwakatatka Jacó (konaptaklurewatatshri) klu tshinanu xye ymakananuko, hepi kata rerutatkano. Mitshikananu matutatshri yoptoleru hkonyatnakno. Xawakni kihlewaka ntshinikowakamkapa hkonyatnakno. Hiyáhoni xawakni hi he waneyatkayi satu pa hixanu kihlewaka tshinanwaklewaxinri?

³⁷ Waneya Isaque hihitlu, wla htshinru: — Haha hetanu ptowutjeru rixyawakapa neneklu hiyrun-koxa himolene ptowruneka neneklu htowrerune rixyawakapna. Hiyrun-koxa honantshiyma ntseruxyatkalu vinho-ha ymakananuko. Hiyáhoni xawakni klunerhe hixetatshri nenekanutkayi pixa?

³⁸ Waneya wla htshinru ruru: — Ha papa, hi he waneyatkayi pa himayaka kihlewaka tshinrewaxya? Waneyakni htshiyahpotutatka Esaú.

³⁹ Waneya ruru Isaque hihitlu, wla htshinatkalu: “Pwiywak-tshijne pepixjerumkapa hi pixastsi rawanutka hiyrun-koxa yatsunha tenhohne hichpajikatshri koxa hi hepixanutkayi.

⁴⁰ Hiyrun-koxa pyohlolewapre heneka hiwekletanyi. Pimole towutanyi seyni hixko pixinipa pjiknahanru wunuwapije pinoji hwatshri.” (Xye pirana yapkaklunni.)

⁴¹ Waneya Esaú hahkalu Jacó. Rahkalu klu tshinanu ruru hihlehchinikanyehitlu Jacó. Waneya wla htshinahchinikanuta Esaú: — Hi howukchini ktetshipni nurupni hipniywaka tshinanu waneya wane pnute nuylatanunru nepurupni Jacó-pni.

⁴² Waneya Rebeca timaxinixka tsrujru toturu, Esaú tokanu tjeminixka, tepuklu toturu hepurtshi, Jacó waneya wla ttshinru: — Pinkalu Esaú haluka hiylaletanyi wane rixa halpokolehchinikanuxnawa.

⁴³ Xawakni noturu, pyijnakotanru ntokanu wane ntshinanyi. Xawakni potuko pasukanu nomole Labão Harã hajeru nwaka pya hasukletanu.

⁴⁴ Walesko putukanu haté pimole jhekanu hitujinipa.

⁴⁵ Pimole hahnannu hiknohiniklunupa, rumuklujtaxyayi, nwapakjixanutkayi. Klu tshinanu hi koxa netachatanhi hix-hepi walerutu hohne namtajyawakaphi.

⁴⁶ Waneya Rebeca wla tshinru Isaque: — Hete-neru whenene suxone kojwaklu niwejinri. Hiyáhoni Jacó hanunroxiniplo sato hete-neru whentnaka, xye tshijne hajero, hikeklu poyikpatkanno.