Gênesis 25 - Bíblia

Abraão Klopicha Quetura Tshinkaluro Hichpajikatshine Piranapni

¹ Waneya Abraão hhanunrowatatnaka. Quetura tshinkaluro hhanunrota.

² Wla pejnu tmatkakatka, Zinrá, Jocsã, Medã, Midiã, Isbaque, Sua.

³ Jocsã tshinkaluru whenetlu Sabá, Dedã. Sabá tshinkaluru whenetlu Assurim, Letusim, Leumim.

⁴ Midiã whenetlu Efa, Efer, Enoque, Abida, Elda. Nyi pejnu Quetura tshinkaluro whenene.

⁵ Seyni Abraão ptowruka rimwaleru hiwhene Isaque tshinkaluru reneklu.

⁶ Wanepnawaka Abraão hiwuhenewachalero whenene henekachalkaka tsonu renekatkana Abraão. Waneya riweka pchinikawa Abraão hyokanatna tkatshi hichpajyawaka sreta nwaka hyiywakapna hiwhene Isaque-stsi hma mwiywakanupna.

Abraão Hipnale Piranapni

⁷ Wla pejnu mhale riwekatka Abraão cento e setenta e cinco mhale riwekatka Abraão.

⁸ Waneya rupnanatka Abraão, tsrutsoleji potniko hix-hohne potuko riwekniwa rupnanatka. Himolenni hipnatshinni nwaka hyatka.

⁹ Waneya waleniko hwuhenene Isaque, Ismael kapnatanru Abraão-ni hipjita hwapanatatshri Macpela tshinikowaka Efrom heteu-neru campo-te hwatshri Manre tshinikowaka hinapleya.

¹⁰ Xye campo ranjitnixka mitshi Abraão Hete whenenenu. Wanekni hkapnatkana Abraão-ni hiyrun-koxa hhanunroni Sara-ni wane hkapnatkanna.

¹¹ Rali hipnaletanatka Abraão-ni Hoyakalu kihlewaka htshinru Isaque, Abraão-ni whene. Isaque Beer-Laai-Roi tshinikowakastsi hwatka.

Ismael Klopichane Piranapni

¹² Xyekni Ismael, Abraão-ni whene Sara-ni towrero Hagar tshinkaluro egito nero whene Abraão-ni mitshi titshixya Sara-ni whene klopicha pirana.

¹³ Rix-matlexyawakna Ismael whenene piranni xye. Ismael whene mitshikananu matutatshri Nebaiote tshinkaluru, wanestsi hajeru Quedar tshinkaluru, Abdeel, Mibsão,

¹⁴ Misma, Dumá, Massá,

¹⁵ Hadade, Tema, Jetur, Nafis, Quedemá seyoka.

¹⁶ Xyekakni Ismael whenene hiwaka, nyi satkaka wannako rawyawakna poktshi rawna. Doze neru rakankakanna nyi jejine doze.

¹⁷ Wla pejnu mhale riwekatka Ismael cento e trinta e sete mhale. Hnikawna hiwekletatka. Rupnanatka Ismael-ni, himolenniyma rapatjesamenrutatka.

¹⁸ Ismael klopichane hi hipxakna Isaque klopichane seyni rawyawakna Havilá tshinikowaka haté Sur tshinikowaka egito tshijne yoptowaka sreta hwatshri tshijne Assíria tshijne nwaka yahapotatshri sreta rawatkana. Rutspalkajyana Isaque klopichane.

Jacó, Esaú Pirana

¹⁹ Xyekni Isaque, Abraão whene klopicha pirana. Abraão-ni whenetlu Isaque.

²⁰ Waneya Isaque quarenta mhaletkalu hhanunrotlo Rebeca, Betuel whene, arameu-neru whene, Padã Arã tshijne hajeru, hiyrun-koxa Rebeca Labão arameu-neru-mole piranni.

²¹ Waneya Isaque hapohchinikanutlu Tsru Hixikatshriwa Hoyakalu hhanunro Rebeca tshinkaluro tshinanu, klu tshinanu mwuhenewaklétoni. Waneya Tsru Hixikatshriwa Hoyakalu yijnakotlu ranjihohnere hiyáhoni Rebeca, hhanunro, michiwatatka.

²² Waneya hyahotkakna mturune wala nanwakaya hiyáhoni wane ttshina: — Haklu tshinanhe wane hixyehitno? Hiyáhoni tya tepomhaplu Hoyakalu.

²³ Waneya Hoyakalu wan-tshinro: — Hepi nerukta pixa nanwaka hitokote hwa hiyáhoni hepi nerune kotspalatko pixa nanwakaya; satu ner-potu yohnika mixkonupa hiyrunu hepurtshi towutanru tsrujru.

²⁴ Waneya rapokpapkolutatka tmatuwhenexyawaka wanena mturune hepirune mturu-mapa hitokote rawna.

²⁵ Mitshikananu matutatshri seromtalni hiyrun-koxa wale mane psoluka mkatshri kapixiru kamhikolu pixka rixmaneta; hiyáhoni rutakhiwakatlu Esaú.

²⁶ Waneya repuru matutatka, himyo hkachikanaxyalu Esaú stsihjixi. Hiyáhokni hhiwakatka Jacó. Isaque sessenta mhaletkalu Rebeca matkajinixkana wanna hepirune.

²⁷ Waneya htseruwnana mturune, Esaú kyahkakleru kihleru rixapa, campo kyapaklerni seyni Jacó hi kyanakle, tenda pjikaka rawhohnejeta.

Esaú Hnijitu Hipekoxyawaklu Mitshikananu Matutatshri Kaylerumkapa Piranapni

²⁸ Isaque nikalu heru hiyahokni ramotlu Esaú seyni Rebeca hamotlu Jacó.

²⁹ Jacó hiwlalewakanata rujpatewakanata, waneya rapokatka Esaú campo ruchpajya, ruhroka natshi tshinanu.

³⁰ Waneya Esaú wan-tshinru Jacó: — Wuya, pchiretanu penekannotshi xye hiwlalu psoji! Hiriyahok-nnatshineta. Waneya sero jpalu nnalu wale. (Wale tshinanu Edom hiwakatka koxa).

³¹ Seyni ruhitlu Jacó: — Hike, seyni mitshikananhapka pixa mitshikananu matutatshri kaylerumkapa pitshixinno tsrujru nkahwajikolupa.

³² Waneya Esaú wan-tshinru Jacó: — Petanno nupnapirata hiyáhoni xawakni hanhe rix-hepixletanno hita mitshikananu matutatshri kaylerumkapa?

³³ Seyni Jacó wan-tshinru Esaú: — Hike seyni punkaklexinno. Hiyáhoni Esaú hinkakletlu waneya mitshikananu matutatshri kaylerumkapa ritshixyatkalu.

³⁴ Waneya Jacó heneklu Esaú pão hiyrun-koxa hiwlalu lentilhas kamhikolu reneklu. Esaú nika, rura waneya hpalnatka, hyatka. Hiyáhoni Esaú heyikatkalu mitshikananu matutatshri rixyawakatka.