Gênesis 24 - Bíblia

Sato Suxo Hhanunrowaxyawakapatka Isaque Piranapni

¹ Tsrutsolejitkani Abraão hixo mhaletkalu. Tsru Hixikatshriwa Hoyakalu hepixle ymalu ptowru tshinanuko.

² Waneya Abraão hiynumatatkalu htowreru mitshikawluru rimwaleru ptowruka towutatshri wla htshinru: — Pimyo noskota pyochmakanu. (Wane rixakanatna mitshkawlunni pa pirana renejinpatka klu tshinanu Abraão hipnakastsitkani.)

³ Ptshinanno Tsru Hixikatshriwa Hoyakalu tshiji Hoyakalute, tenhohne Hoyakalute koxa hiwakaya hi xako pwapanro suxo hewi canaã-nerune nero whene nwatkalrene whene hhanunroxyawakaplo, noturu Isaque.

⁴ Naluklu ptshinamxyawakno ntshijne potuko pyanu nomolene nwaka suxo pwapyawakapa noturu Isaque hhanunroxyawakaplo.

⁵ Waneya towrertshi wla htshinru: — Ha suxo mimotspiratkanuklunupno wkata nujhalhe piwhene puchpajyawaka tshijne nyokanaxyawaklu?

⁶ Waneya Abraão hihitlu wla htshinru: — Xako puslahanru hikeklu hohne xako noturu wane pyokanatanu.

⁷ Tsru Hixikatshriwa Hoyakalu, tenhohne hajeru nurni pji nuchpakakjixjeru hiyrun-koxa nmatuxyawak-tshijne nuchpakakjixjeru, hiynumatatkano hiyrun-koxa runkakno, wla htshinatkano: “Xye tshijne nenekanna piklopichane rumutujyawakapluna.” Walekni yokanatanru htowreru tenhohne hajeru pma muchpakkanuklunuwa pixa. Hiyáhoni waneko pwapinro sato suxo hhanunroxyawakapa noturu.

⁸ Seyni wala suxo maluka himotsletkanuklunupyi psatojinipa wkata wane rixinipa ptshinamxyawaka hike kochpakanutka. Halikaka xako noturu hi wane panikanu.

⁹ Hiyáhoni htowreru rutsrukate Abraão skota hyochmakamyota. Runkaklu hkamhiywakaplu xye pirana Abraão hanjixyalu.

¹⁰ Waneya towrertshi hwaplu dez camelo htowutjeru prane hiyrun-koxa rutsrukate hejnunkate kihlekakalu ranikamta klu tshinanu walekni rutsrukate hejnunkate ptowruka towutatshri. Waneya hyatka Mesopotâmia tshijne Naor hwiywaka poktshi nwaka hyatka.

¹¹ Waneya kayi sreta camelo-ne hyoptsojitakjixna satu hakophastsi poktshi malekate sreta. Waneklu papko suxone hichpakatka honha hsajehaxyawakapna rasruha hixlejexyawakna.

¹² Waneya wla htshina: — Ha Tsru Hixikatshriwa Hoyakalu, Abraão Hoyakalute nanjityi penejyawakapno kihle hakanhaleru xye hohne tshinanu, kihlewaka pixanru nutsrukate Abraão.

¹³ Hakophastsi nyotunoxya. Xye poktshi hajene whenene suxone hichpakamta honha hsajehaxyawakapna.

¹⁴ Hiyáhoni xawakni nanjityi makloji hanuroktako niynumatanu wla ntshininplo: “Psajehapre tshiji putakanu honha psajijinno nurrerupa waneya wla ttshininipno: “Haté hehe puranu pixa hiyrun-koxa nsajikhatanu piprane camelo-ne tshinanu koxa,” ttshininipno wala. Walakni pnurrero ptowreru Isaque tshinanupa. Wane hixatshropakni nimatanu puphujexyalu kihleru pkamhiylu nutsrukate Abraão.

Rebeca Tshinkaluro Nurexikolu Piranapni

¹⁵ Waneya hi rutuka yanumletawa, Rebeca tshinkaluro Betuel tshinkaluru hchitsho Milca tshinkaluro Naor-yma himekahyona Abraão mole mekahyo wane tyapamta hachhaji tuthanamta.

¹⁶ Makloji kihle hojiro potukoni, jeji mapokmanetanutowa. Walakni yopikatka hakopha nwaka hachhaji tsepohatlu waneya tkankatka.

¹⁷ Waneya towrertshi hasukamtatka wala nwaka waneya wla htshinro: — Nanjityi putanno honha psojha pachhajre panikamxinruha.

¹⁸ Waneya tuhitlu, wla ttshinru: — Pura nutsrukate. Waneya tchireta kochtshekletlu tothanaya hachhaji tutspakatkalu waneya tutatkalu.

¹⁹ Waneya rali hirexinixka wla ttshinru: — Piprane camelo-ne tshinanu koxa nsajehatanu haté rayokhaxinipna.

²⁰ Waneya tchiretatka tuyokhatlu honha hachhaji hwatshri pratshine hirawakleya waneya tasukamtatnaka hakopha nwaka honha tsajehaxyawaka wale prane camelo-ne ptowruneka tshinanu.

²¹ Seynikta jeji hike mtshinkatuko hislahakanatlo rexyawakaplu tsru hyanre repixijeruplahe hkamhinri Tsru Hixikatshriwa Hoyakalu ho hike.

²² Waneya rali hirretatkana camelo-ne waneya wale jeji satu hisrojretshi ouro kamhikolu cinco gramas e meio pa hinurutu hetkolu reneklo. Hiyrun-koxa hepi pulseira-ne ouro kamhikolu cento e dez gramas pa hinurutu hetkoni tomyonota tutaklerupa reneklo.

²³ Waneya repomhalo wla htshinatkalo: — Katu whenyihe? Hiyrun-koxa wla htshinro: — Punkakanno, kwawaklerhe yineru purupjiya wane wumkapyawakapa?

²⁴ Waneya tuhitlu wla ttshinru: — Betuel tshinkaluru whenno, Milca tshinkaluro whene Naor-yma.

²⁵ Wla ttshinru wane pnutetka: — Pratshine niklerupa hi wmahaxya hiyrun-koxa kwawaklena hpoyaho wane hiknokakleyetshnoxyana.

²⁶ Waneya jeji yoptsojitatka Tsru Hixikatshriwa Hoyakalu rimalwutatka.

²⁷ Wla htshina himalwuretlu: — Kchinikanurni Tsru Hixikatshriwa Hoyakalu nutsrukate Abraão Hoyakalute. Pixa pepixle hiyrun-koxa ppotuknu hi pkonyalu nutsrukate Abraão. Hiyrun-koxa hita ranikno Tsru Hixikatshriwa Hoyakalu nutsrukate Abraão molene nwaka potuko yahapotatshri ranikatkano.

²⁸ Waneya makloji hasukamtatka xye ptowruka hakanhatshri tunkakatkana tunro pji hajene.

²⁹ Twu Rebeca tshinkaluro kamólero Labão tshinkaluru. Xyekni hichpakatka, rasukamtatka hyoptoxyawakaplu jeji hakophastsi hwakanatatshri.

³⁰ Wane rixa klu tshinanu retlu hisrojretshi hiyrun-koxa hikanretshimtakaka reta himole suxo myonota hwakanatatshri hiyrun-koxa hjemlu himole suxo tokanu wla tshinatshri: “Wla htshina hinkakletno,” ttshina. Hiyáhoni jeji yehi rapokatka Labão. Waneko hyopkakakanatawa hakophastsi camelo-neyma.

³¹ Waneya wla htshinatkalu jeji: — Pjihlokanutshi pixa Tsru Hixikatshriwa Hoyakalu nurreryi haklu tshinanhe maleka sretako pyopkakachata? Hit-honra pantshi nalpokohnaputatkayi hiyrun-koxa camelo-ne hwiywakapa nalpokotatka.

³² Waneya jeji pantshi jihlokatka. Waneya Labão kochpirokatkana camelo-ne, peklo kastakkaluru hiyrun-koxa hitataji pratshine nikanru rukchijyatkana. Honha koxa rukchijyalu jeji rerkajixixyawakapa hiyrun-koxa honha rukchika jejine waleymalune herkajixixyawakapa.

³³ Waneya nijittshimka rutakyehitkamka hniklerupa. Seyni wale wla tshinatka: — Hi nnikanu nma munkakkanuko pchinhi klu hikoluklu tshinanu wkata nuna. Waneya Labão wla tshinru: — Haté hehe pyanumatanu.

³⁴ Waneya wla htshina: — Hitni Abraão towrerno.

³⁵ Tsru Hixikatshriwa Hoyakalu hepixpotutatkalu nutsrukate ntowutjeru. Tsru phuru rixkaklu. Pratshine carneiro-ne hixolune reneklu hiyrun-koxa pratshine boi-ne hix-potuko reneklu. Prata, ouro reneklu, towretshine suxone, towretshine jejine reneklu, camelo-ne reneklu, jumento-ne reneklu.

³⁶ Hiyrun-koxa Sara ntowutjeru hnunro jeji tmatkajyatkalu ntowutjeru Abraão tsrotsolejitka. Ptowruka rimwaleru xye hiwhene renekatka.

³⁷ Ntowutjeru yokanatno wla htshinno: — Hi xako pwapanro suxo canaã-nero nwajexyawaka tshijne hajene hhanunroxyawakapa noturu.

³⁸ Seyni nurni poktshi nwaka pyanu, nomolene yehi waneya wane hajero suxo pwapinri noturu hhanunroxyawakaplo.

³⁹ Waneya wla ntshinatkalu nutsrukate ntowutjeru: — Seyni tmaluka himotsletkanuklunupno hanhe nixanu?

⁴⁰ Waneya wla htshinatkano: — Tsru Hixikatshriwa Hoyakalu niyanjereru yokanatanru htowreru tenhohne hajeru pixayma repixyawakapyi pyanreya. Wane hixatshripyi nuruni poktshi nwaka pyanu, nomolene wane hajene yehi waneya waneko suxo pwapini noturu hhanunroxyawakaplo.

⁴¹ Hiyáhoni xawakni nomolene yehi papojinipa seyni wanna tshipexiniplo waneya putneprijyatkalu ptshinamxyano pirana.

⁴² Hiyahokni xye hohne napokatka hakopha yehi waneya wla ntshinatka: — Tsru Hixikatshriwa Hoyakalu, ntowutjeru Hoyakalute pujha hakanhakakletlu wkata nunyawaka tshinanu

⁴³ Nanjityi hakophastsi nyotunoxini makloji hanuroktako niynumatanu wla ntshininiplo: — Halya honhala hachhaji panikhamxinri putanno, ntshininiplo.

⁴⁴ Waneya tuhixinipno wla ttshininipno: “Puranu pixa hiyrun-koxa nsajikhatanu piprane camelo-ne tshinanu koxa,” ttshininipno, waneypakni nimatanutka Tsru Hixikatshriwa Hoyakalu nurreroni ntowutjeru whene tshinanupa, ntshinru.

⁴⁵ Seyni hi nali yanumletawa nohchinikanuya tunatka Rebeca tshinkaluro hachhaji tanikamta tothana tanikamxyalu. Hakopha nwaka tyamta tsajkapyawakapa waneya wla ntshinatkalo: “Halya honhal-putanno.”

⁴⁶ Waneya tchiretatka hachhaji tanikamtanru tutspakatka waneya wla ttshinatka: “Puranu pixa hiyrun-koxa piprane camelo-ne tshinanu nsajkapanu ruryawakapna.” Hiyáhoni nuratka hita hiyrun-koxa camelo-ne turkakatka.

⁴⁷ Waneya nepomhatkalo wla ntshinatkalo: “Katu whenektshikyi pixa?” Waneya wla ttshinno: “Betuel tshinkaluru, Naor tshinkaluru whene Milca tshinkaluro matkakleru whenno hita.” Waneya nutaka hisojretlo hiyrun-koxa hikanretshimta tokano nutakatka.

⁴⁸ Waneya nyonohitatka Tsru Hixikatshriwa Hoyakalu nimalwutatka npoyahnutatkalu Tsru Hixikatshriwa Hoyakalu ntowutjeru Abraão Hoyakalute repixle tshinanu. Klu tshinanu hkosekatkano ntowutjeru mole whene suxo nwaka potuko nanijyawakaplo ntowutjeru whene jeji nwaka.

⁴⁹ Hiyáhoni xawakni paluka kihleru kamhanwaklexiniplu ntowutjeru punkakanno ho pitshiterohe ho hike nimaxyawakaplu hanu nixanutka, hewirhe nutukanu ho pnu sretakla nyanutnaka.

⁵⁰ Waneya Labão hiyrun-koxa Betuel hihitlu, wla htshinruna: — Xye Tsru Hixikatshriwa Hoyakalu kamhalerni hiyáhoni hi wumukata kihlewaka tshinretyi hi koxa wumukata hektuwaka tshinretyi.

⁵¹ Hetanu twukni Rebeca pixastsi. Hiyáhoni panikanro, pyanutka ptowutjeru whene hhanunro tixyawakapa htshinakanaxyawakatka Tsru Hixikatshriwa Hoyakalu.

Isaque Hanunroxyawaka Piranapni

⁵² Hiyáhoni wanna tokanu hjeminiklunutka Abraão towreru himalwutatkalu Tsru Hixikatshriwa Hoyakalu hyonohyehitlu hihoji tshiji rutspaka.

⁵³ Waneya towrertshi hejnu hkochpaka, hejnu prata kamhikolu, hejnu ouro kamhikolu, mkatshri koxa hkochpakatka waneya Rebeca reneklu. Hiyrun-koxa hejnu kwenuru reneklu Rebeca mole jeji hiyrun-koxa tunro reneklu hejnu kwenuru.

⁵⁴ Waneya hnikatka, ruratka wale hiyrun-koxa waleymalune ptowruneka nikatka, ruratkana. Ruknohkakluna wale yetshno waneya wale prika ruptekatkana waneya wla htshinatka: — Pitshitanno nyiywakapa ntowutjeru nwaka.

⁵⁵ Waneya tomole jeji hiyrun-koxa tunro wla tshina: — Pitshitanrotshi makloji pa hohneyaka hix-yehi tutukamxyawakapa haté dez hohne pchinikatshi hewi tutukanu. Waneya wane pnut-hohne tyanutka.

⁵⁶ Waneya wla htshinatka: — Hi himaletanno klu tshinanu Tsru Hixikatshriwa Hoyakalu nyanre repixatka. Hiyáhoni nanjithi hyokanaxyawakapno nyiywakapa ntowutjeru nwaka.

⁵⁷ Waneya wla htshinatkaluna: — Makloji wtomhanu wepomhanro wala potuko hanu potu ttshinanwu.

⁵⁸ Hiyáhoni Rebeca htomhana waneya wla htshinatkalona: — Pixlahe himotsatanru xye jeji? Tuhitatka, wla ttshinatka: — Hehe waleymapno.

⁵⁹ Hiyáhoni hyokanatatkana hyiywakapna, himolna Rebeca hyokanatna, ttowrero hyokanatna, Abraão towreruymatkana hiyrun-koxa jejine waleymalune hyokanatna hyiywakpatkana.

⁶⁰ Kihlewaka htshinanwakaxyawaklona wla htshinatkalona: “Pixni wimole suxyi hiyáhoni xawakni hixolune potu hakanhakakatshropyi, yinepa hixo mil kata mil hakanhakakatshropyi. Hiyrun-koxa pkamnitjenemka htowutanna piklopichanepa!” — htshinrona.

⁶¹ Waneya tpalnatka Rebeca ttowreroneyma, camelo-netji ratskotna waneya wane hixatshrone romkahitluna wale jeji. Hiyáhoni wale towrertshi yoptotlo Rebeca waneya hyatka.

⁶² Waneklu papko Isaque hinakananumta hatnu hapoya Beer-Laai-Roi tshinkaluru hapo klu tshinanu Neguebe tshinikowaka tshijne rawjekanatatka Isaque.

⁶³ Kayi sreta Isaque campo hya ruchinikanuwaxyawakapa. Waneyatka rimrekhatatka camelo-ne retpatka hinamtatshine.

⁶⁴ Rebeca heknojtatatka waneya Isaque texiniklunu camelo-tji tuptejyatka.

⁶⁵ Wane tixa klu tshinanu tepomhiniklunutka towrertshi katnihe jeji hinamtatshri wanna nwaka yamtatshri, runkaklo htowutjeru rixyawaka. Waneya kasamalu tkachita tohoji tuchyapre.

⁶⁶ Waneya towrertshi hinkaklu Isaque ptowruka hkamhalerutka pirana.

⁶⁷ Waneya Isaque haniklo Rebeca runroni Sara-ni tenda-tepji raniklo Rebeca hiyáhoni hhanunrotlo Rebeca. Hiyáhoni wale hanunroni. Ramotlo. Hiyáhoni Isaque hapnanuhchinikanutatka runroni hipnale tshinanu.