Gênesis 23 - Bíblia

Sara-pni Hipniywaka Piranapni

¹ Cento e vinte e sete mhale tiweknixka Sara-ni.

² Waneya tupnanatka. Quiriate-Arba tshinikowaka Hebrom poktshi Canaã tshijne hwatshri tupniyanatka. Rapoka Abraão Sara-ni ritshiyahaxyawakapa hwamonuwaxyawaka walani pohwaka tshinanu.

³ Waneya hpalnatka Abraão hipnatshroni yehiya waneya Hete tshinkalurni whenene riynumsatatka, wla htshinatkana:

⁴ Hitni pa nerno hix-yehi hapkapachatatshrino hiyáhoni xawakni tshiji penekanno nkapnaxyawakanapna pa hohne hipnatshinni nkapnaxyawakanaplo hipnatshroni nhanunroni nma metjejexyawakanu yehi, nkapnataninro.

⁵ Waneya Hete whenene wla tshinru:

⁶ — Ha wutsrukate pjemanwu hixa. Pixa honukla tsrukakalyi Hoyakalu yehiya hixa hetanuya. Hiyáhoni pixako nuretanru hanukta paluka hitakletanru phanunroni pkapnaxyawaklo yomle. Hi satuknakwu hixa tshipexinyi yomletshi putakpiraxyawaka pkapnaxyawakanaplo phanunroni.

⁷ Waneya Abraão yotunotatka, hyoptsojityehitna wale tshijne hajene, Hete-ni tshinkalurni whenene yehi.

⁸ Waneya wla htshinatkana: — Hixa hali hitshrexyatkano nkapnaxyawakanaplo nhanunroni nma mayapjejexyawakanu waneya hit-koxa hjemanu. Efrom tshinkaluru Zoar tshinkaluru whene napohchinikanuthi hixa.

⁹ Hanjitanru hipjita hwapnatatshri Macpela tshinikowaka Efrom campo-te mahle sreta hwatshri renejyawakapno Efrom. Hixa hetanuko ritshixinno yomletshi rixyawakpatka hita tshinanu. Ralujyawaka pso potuko nwenutanru.

¹⁰ Seyni Efrom Hete-ni whenene hanikajite tuplakanata. Waneya Efrom tshinkaluru heteu-neru yanumatatka wla htshinru Abraão Hete-ni whenene jemanu, ptowruneka hipoktshirna jihlokawakle yapatshine jemanu wla htshinru:

¹¹ — Ha hike nutsrukate pyijnakotanno. Campo nenekachatanyi hiyrun-koxa hipjita hwapnatatshri nenekachatan-koxyi. Nonerune whenene hetanuko wale nenekanyi pupnayehitjéroni pkapnaxyawakapa.

¹² Waneya Abraão yoptsojityehitatkana wale tshijne hajene hetanu.

¹³ Waneya Abraão Efrom riynumatatka wale tshijne hajene hetanu, wla htshinatkalu: — Campo-mka penekachapiraxyano nwenutanyi. Tiyiro nenekanyi campo wenru tshinanu. Wala ntiyirote panikanu waneya nupnayehitjéroni wane nkapnatanu.

¹⁴ Waneya Efrom yanumatatka wla htshinru Abraão:

¹⁵ — Nutsrukate pjemanno. Wale campo wenru quatrocentos proji prata hpoyahotamka. Seyni klunerhe hkochpaka wane psojiji tiyiro hita, pixayma? Hiyáhoni pkapnatapanro pupnayehitjéroni.

¹⁶ Waneya Efrom tokanu romkahitatka Abraão. Rutakyahokatkalu prata htshinkajyawakna wenru pso Hete-ni tshinkaluru whenene jemanu, quatrocentos proji prata pejnu hwenutlu jichanrewaklerune pixka rixkakna.

¹⁷ Hiyáhoni Efrom tshinkaluru campo-te Macpela tshinikowaka hwatshri hiyrun-koxa hipjita hwapnatatshri campo hwatshri, hahmuna wane hwatshri hiyrun-koxa ptowru potuko wale campo hwatshri Abraão-nutka.

¹⁸ Abraão renekka Hete-ni whenene hetanuya hiyrun-koxa ptowru yineru poktshi jihlokawakle jihlojikatshine heta yoptoletlu Abraão.

¹⁹ Waneya Abraão kapnatanro hhanunroni Sara-ni hipjita hwapnatatshriya Macpela campo-te hwatshri Manre tshinikowaka hinaple hwatshri Hebrom poktshiya, Canaã tshijne hwatshri.

²⁰ Wane rix-himutukletlu Abraão campo hiyrun-koxa hipjita hwapnatatshri yomletshi rixikowakapa. Hete-ni whenene mixkopotutatkalu wane pnute.