Gênesis 22 - Bíblia

Isaque Henekachalu Yoxikkaluru Rixyawakamkapa Piranapni

¹ Waneya pnut-hohne Hoyakalu yahtaletlu Abraão. Wla htshinru: — Abraão. Waneya Abraão hihitlu wla htshinru: — Hewino.

² Waneya Hoyakalu wan-tshinru Abraão: — Panikanru piwhene satupkalutu, Isaque, pamotler-potuko. Pyanwakatanru Moriá tshinikowaka tshijne. Waneya wane henekachalu yoxikkaluru pixkakanru pituru npohixyawaka mriji potuko.

³ Waneya wale prika yetshpotukawa ruptekatka Abraão. Hiprane jumento-ne ralpokotatka. Ranikamtna waleyma hepi htowrene hiyrun-koxa hituru Isaque. Rali hitshimletatka hpoyahtapyawaka mukata hjimlewaxinripa hyatka. Abraão yanwakatlu Hoyakalu tshinyawaklu mriji nwaka.

⁴ Map-hohne hyaninixka Abraão htunohitatka retlu hipjita runkajyalu howukawalu.

⁵ Waneya Abraão wan-tshinna htowrene: — Tuka wyaka pchinika hewitshi hwanu jumento-yma, hita noturuyma tsonu hawla yanu. Hoyakalu wimalwutapanu waneya wsatkapanu.

⁶ Waneya Abraão tshitshi kochtshekatka, henekachalu yoxikkalurupa tshinanu, Isaque rutjikakatka seyni Abraão haniklu tshitshi katalu, peixeira koxa. Wane hixatshine hepi yatka.

⁷ Hyamtka pchinikna Isaque hepomhalu Abraão wla htshinru: — Papa. Waneya ruhitlu Abraão wla htshinru: — Klunhe noturu? Isaque wla tshinru: — Jitshimamnuwu, tshitshchichri koxa seyni hanurhe carneiro whene wyoxjererupa?

⁸ Abraão wan-tshinru: — Hoyakalu henekanwu carneiro whene wyoxiklerupa, noturu. Waneya wanna hepi yanamtna.

⁹ Rapojinixkaluna Hoyakalu tshinyawaklu yehi Abraão sotlu rapatjeta waneya ruhlepokotlu tshitshi wane hohoya. Waneya rostutatkalu hituru Isaque waneya tshitshi hoho rutaklu Isaque.

¹⁰ Waneya hyosurukkanotatka Abraão, peixeira hkochtsheka ruylaxyawakaplu hituru.

¹¹ Seyni waneklukawa potuko Tsru Hixikatshriwa Hoyakalu towreru tenhohne hajeru hiynumatlu Abraão hipokananu tenhohneya wla tshinatshri: — Abraão, Abraão. Waneya Abraão hihitlu wla htshinru: — Hewino.

¹² Hi puylatanru piwhene, — htshina Hoyakalu towreru tenhohne hajeru. — Hike pixanru. Xawakni nimatlu Hoyakalu pkahwakpiratatka klu tshinanu hi ptshipetlu pituru, pituru satupkalutu.

¹³ Waneya Abraão heknojtata waneya retlu satu carneiro ratjiniyaka sretaya kamxihiru hachtshekahwatatshri. Waneya Abraão kachitlu carneiro walekni henekachalu yoxikkaluru hkamhiyatka hiwhene Isaque kachrijru.

¹⁴ Hiyáhoni Abraão henekachalu yoxikkaluru yehi hiwakata Tsru Hixikatshriwa Hoyakalu hikchikanru mahatatshri htshinru. Haté xawakni wane htshinka: “Tsru Hixikatshriwa Hoyakalu himriji hoho mahatatshri hikchijyawak-mitshi.”

¹⁵ Waneya Tsru Hixikatshriwa Hoyakalu towreru tenhohne hajeru hipokananu hiynumatatnaklu Abraão tenhohne ruchpaktokanuxya.

¹⁶ Wla htshinru: — Halikakalutu nunkaklexyayi hitako nhiwakaya, xye pkamhaleru tshinanu hi ptshipexyano piwhene satupkalutu tshinanu.

¹⁷ Hita halikaka nuhlehchinikanutanyi hiyrun-koxa nkamhanna pixa piklopichane katahiri tenhohne hajeru pejnu rixyawakapna, hiyrunu ksatuji mar powha wnahlu hajeru pejnu rixyawakapna. Piklopichane konpoklutanna hkamnixjene.

¹⁸ Hiyrun-koxa piklopichane tshinanu kihlewaka ntshinanwakatanna ptowruneruka tshij-hoho hwatshine hihlehchinikanutko klu tshinanu ntokanu pomkahitatka.

¹⁹ Waneya Abraão satokanwakatna htowrene yehi waneya ptowruneko satokatka Berseba nwaka rawjexyawaka. Waneko rutukatka Abraão.

Naor Tshinkaluru Whenene Piranapni

²⁰ Waneya xyekaka ptowruka hiknohinixka runkakluna Abraão wla htshinruna: — Milca hiwuhenewjetatkalu pimole Naor jejinni.

²¹ Mitshikananu matutatshri Uz tshinkaluru. Walestsi hajeru Buz tshinkaluru waneya Quemuel tshinkaluru matutatka Arã hiru.

²² Waneya Quésede matutatka waneya Hazo tshinkaluru matutatka. Wanestsi matutatshri Pildas tshinkaluru waneya Jidlafe matutatka waneya Betuel matutatka.

²³ Betuel tshinkaluru matkaklo Rebeca tshinkaluro. Nyi oito-ne Milca tshinkaluro hwuhenetlu Naor tshinkaluru, Abraão mole.

²⁴ Hiyrun-koxa Reumá tshinkaluro riwuhenewjechalero whenene pejnu jejine: Teba tshinkaluru, Gaã tshinkaluru, Taás tshinkaluru, Maaca tshinkaluru.