Gênesis 20 - Bíblia

Abraão Gerar Tshijne Pohire Hyokwixyawaka Piranapni

¹ Waneya wane ruchpajya Abraão. Neguebe tshinikowaka tshijne nwaka hyatka. Cades tshinikowaka, Sur tshinikowaka hanikajite rawatka. Gerar tshinikowaka rutakpjitatka.

² Waneya Abraão wan-tshinyehitlo hhanunro Sara: — Walani nomole suxo. Hiyáhoni Abimeleque, Gerar tshinikowaka pohire hwapjixatkalo Sara.

³ Seyni Hoyakalu yanwakatlu Abimeleque rupnawleya waneya wla htshinru: — Pixa halikaka hipnatshripyi klu tshinanu suxo pwapjixlero wala honukla khanururo.

⁴ Seyni Abimeleque hi hapokmanetawalo wala. Waneya wla htshinru: — Ha Tsru Hixikatshriwa Hoyakalu pnikaterhe noneru hike hektuwaka mkamhakatuko?

⁵ Klu tshinanu hi he wale potuko wan-tshinatkano repuro tixyawaka? Hiyrun-koxa wala potuko wan-tshinno tomole rixyawaka. Xye nkamhatka seyni hi hektutu chinikantshiyma wane nixa hiyrun-koxa hi hektutu nkamhapirle tshinanu wane nixa.

⁶ Waneya Hoyakalu wla tshinru rupnawleya: — Hehe nimatlu pixa halikaka xye pkamha hike mixkatuyi. Seyni hit-honra himaletatkayi hektutu pma kamhiywakanupa hit-yehiya. Wale tshinanu nimaletatkayi pma yotnejyawakaplo.

⁷ Hiyáhoni psatkakanro thanuru nwaka klu tshinanu thanuru honukla Hoyakalu tokanu hinkakletatshrini. Ranjihohneyehitanyi piwejyawakapa. Seyni pma satkakkanuklunuplo pimatanu pupnanuna pixa hiyrun-koxa ptowruneka pimwalene hipnanuna.

⁸ Hiyáhoni yetshpotukawa ruptekatka Abimeleque. Htowrene ptowruneka repukatka. Xye pirana runkakatkana. Hpikpotutatkana.

⁹ Waneya Abimeleque hepukatkalu Abraão. Waneya wla htshinatkalu: — Kluhe pixannatkawu? Klunernihe numtuknu pixanwaka hapokatshri wane pa hektunu pakanhakakyehixyawakno hita, ntshijne koxa hakanhayehitatshri? Hike yineru mixlewaxyawakanu pixatkano.

¹⁰ Abimeleque wla htshinkoxlu Abraão: — Klu hikoluklu tshinanhe xye pkamhatka?

¹¹ Waneya Abraão wla tshinru: — Halikaka nkahwakatkalu hewi hike kahwakpiraxyalu Hoyakalu hiyáhoni ruylatanona nhanunro hkonyawakapnona.

¹² Seyni halikakni nepuro tixyawaka klu tshinanu nurni wuhenni wala seyni hi nunro wuhenni wala. Hiyáhoni nhanunrotlo.

¹³ Waneyakni Hoyakalu halujyawaka tshinanu nyinuwaka yanachaletatka mitshi wla ntshinatkalo: “Xye kihleru xako pkamhinno ptowru wyapawaka yehi. Wla xako ptshinjetanu, Wale yeye ntshinreru.”

¹⁴ Waneya Abimeleque carneiro-ne hwapa, boi-ne rawapa, towrertshine rawapa, towretshrone rawapa waneya Abraão reneklu. Hiyrun-koxa hhanunro Sara hsatkajyatkalu.

¹⁵ Waneya Abimeleque wla tshinatkalu: — Hetanu ntshijne psoluka nitshixinyi. Hanuktako paluka hwaleta wane pwanu.

¹⁶ Waneya wla htshinro Sara: — Hetanu mil proji prata kamhikolu neneklu yeye ptshinreru. Walekni nixpiranyehixyawaka nikatatshripa pix-yehiya hiyrun-koxa pixaymalune ptowruneka tshinanupa. Hiyáhoni ptowruneruka hetanuya hike mixkanepwu.

¹⁷ Waneyakni Abraão hanjitlu Hoyakalu Abimeleque tshinanu. Hiyahokni Hoyakalu hitskalakatkalu Abimeleque, hhanunro rutskalakatka hiyrun-koxa htowrerone rutskalakatka. Hiyáhoni hwuhenewatatnakna suxone.

¹⁸ Klu tshinanu Hoyakalu hi wuhenewakakatkana Abimeleque-pji hajene ptowruneka Sara hikolukle tshinanu.