Gênesis 2 - Bíblia

¹ Hiyáhoni Hoyakalu hali kamhaletatkalu tenhohne, tshiji, ptowru potukotka.

² Sete hohne rixinri ptowru potuko hkamhaleru rali kamhaletatka waneya rutuk-kamrurewletatka ptowruka hkamrureya.

³ Waneya Hoyakalu kihlewaka htshinanwakatlu sete hohne rixinritka. Hoyakalu hitaklu sete hohne hapnanuxikalur-hohne rixyawaka klu tshinanu wale hohne potuko wale hkamrure rapnanuxyatka tshiji hkamhinixka mitshi.

Hoyakalu Hiyakoxyawaklu Jeji Piranapni

⁴ Wane rix-kamhaletlu Hoyakalu tenhohne, tshiji.

⁵ Hnikata kamhalexinixkalu hohne Tsru Hixikatshriwa Hoyakalu tenhohne, tshiji koxa, waneklu papko hikewani hitaklu, hike hiptshekawa klu tshinanu hi hyokanatawalu Hoyakalu hina. Hiyrun-koxa hike kamrurewaxyawalu tshiji.

⁶ Seyni yatsinu tshiji tshikle hakanha hiyáhoni ruhakatkalu tshiji psoluka.

⁷ Waneya Tsru Hixikatshriwa Hoyakalu kajpapahi kamhiylu jeji waneya jeji jripna rajpoka Hoyakalu hinnipha, rinniphakajyalu riwejinri hiyahokni jeji yinuwakatka riwejyawaka.

⁸ Waneya Tsru Hixikatshriwa Hoyakalu hitaklu satu hitaklucha Éden tshinikowaka, tkatshi hichpajyawaka sreta, waneya wane rutaklu jeji hkamhaleru.

⁹ Hoyakalu wan-hixkaklu ptowru hixatshri hahmuna kihleru sahiwhihlenutatshri hitaklucha hiptshejyawaka. Hitaklucha hanikajite rawa hahmuna hiwejikaluru heneklewatatshri hiwakatletatshri. Wanekoxlu satu hahmuna himaxyawakaplu kihleru hektut-koxa hiwakatletatshri.

¹⁰ Wane koxlu satu wenu Éden hichpajikatshri, waleni hitaklucha hihakatshri, wanekni quatro skithayatkalu.

¹¹ Mitshikananu skitha hiwakni Pison. Walekni psol-tshijneko Havilá hyoliwjeta ouro hwiywaka tshijne.

¹² Wale tshijne hikamtuylo ouro. Wane koxlu phamluhalo hijhakaluro bdélio tshinkaluro hiyrunu sotlukaka kwenuru ônix tshinkaluru.

¹³ Wenu wanestsi hajeru hiwakni Giom tshinkaluru. Walekni sajrukatkalu Cuxe tshijne.

¹⁴ Wenu wanestsi hajeru hiwakni Tigre tshinkaluru. Xyekni Assíria tshijne tkatshi hichpajyawaka sreta hichpajikatshri. Wenu wanestsi hajeru Eufrates tshinkaluru.

¹⁵ Waneya Tsru Hixikatshriwa Hoyakalu haniklu jeji waneya hitaklucha rutaklu, hitaklu ruslahyawakapa.

¹⁶ Waneya Hoyakalu towutatkalu jeji wane htshinru: — Ptowruk-hitaklu yehi hwatshri pnikanu, hike rixa,

¹⁷ seyni hahmuna pimaxyawakaplu kihleru, hektutu hiwakatletatshri sahi hi pnikanu klu tshinanu pnijinihohneplu pimatanu pupnanutka.

Hoyakalu Hiyakoxyawaklo Suxo Piranapni

¹⁸ Hiyrunu wane htshina Hoyakalu: — Hi kihleru jeji walepka rixyawaka, nkamhanro suxo repixjeropa rumuklo potuko ptowru tshinanuko.

¹⁹ Waneya rali kamhalexinixkalu tshiji ptowruka campo hajeru, ptowruka kamejiru teno hajeru, ranikna nikalune Adão nwaka, rexyawakapna kna hiwaka htshinanna. Ptowruneka nikalune Adão hitakhiwakata hiyáhoni wale hiwakakotkani.

²⁰ Jeji hiwakatlu ptowruka hejnune kammanrerupa, ptowruk-kamejiru teno yapatshri, ptowruka pa hixanu hocha hajeru, ptowruka hejnune retatka seyni hikeni rimotslo.

²¹ Waneya Tsru Hixikatshriwa Hoyakalu hixkajyawaklu tshinanu rixapnewatatka jeji. Waneya hi rakot-hixapneta. Waneya rumkaka pchinika Hoyakalu kochpaklu hikwansathapu. Waneya hihitu ruchyamtatnaklu.

²² Hikwansathapu hkostshejyalu jeji Hoyakalu, walekni suxo hkamhiya Hoyakalu. Waneya Adão nwaka raniklo suxo.

²³ Waneya wane htshina Adão: — Ye! Twutkani suxo! Haptshi nohapu kamhikolo, tohitu nohitu kamhikolu. Thiwaka suxo klu tshinanu suxo, jeji psojitni.

²⁴ Wale tshinanu jeji hichotlu ruru, runro, hiyáhoni satumanepkaplu hhanunroyma.

²⁵ Wanna hepi malechkopirune jeji, suxo seyni hi hpatewkajyana.