Gênesis 18 - Bíblia

Tsru Hixikatshriwa Hoyakalu Hiyrunu Hepi Anjo-ne Hakanhayehixyawaklu Abraão Piranapni

¹ Tsru Hixikatshriwa Hoyakalu hakanhayehitlu Abraão tsru hahmunakakastsi Manre tshinkaluru. Abraão tenda nikalumta kamhikolupji swa htuplahamerekanata.

² Htunohiyhaleta waneya retna mapa jejine walestsi yopkakatshine. Rexinixkana riphaptote swa ruchpak-hasuklemxya, rasukanwakatna waneya hsatómiha haté tshiji.

³ Waneya wane htshina: — Nutsrukate, hektutu yineru pma mikahwakkanuklunupno, nanjityi pma miknohachaxyawakanupno hita ptowrerno.

⁴ Hitshitanno honhatshi nwapakjixanu waneya hixa ptowrunekhi himukata herokalejixitanu waneya xye hahmuna chehi hmana himukata hapnanunrexya.

⁵ Hyanwakatno hita ptowrerno hiyáhoni nwapanru pa hixanu hniklerupa waneya hapnanuyakatanu wane hixatshrihi himukata yaleta. Ruhitna wanna: — Haté hehe, hanukta ptshinanwu wane pixanu.

⁶ Hiyáhoni Abraão chinpotu tenda-pji hya wane htshinro Sara: — Chinipotu, mapa yahotlu trigo pahi pwapanu phayapahiru; pkanyakanru waneya pjimanru pão.

⁷ Waneya rasukanwakatna hiprane, hnuretlu satu boi whene poptshi hitu mukatalu. Waneya reneklu htowreru hiyáhoni Abraão towreru yatka hchireta nijitutletlu boi whenni.

⁸ Ranikkoxlu manteiga, leite, boi whenni halpokojixikolni waneya wale psoluka wannastsi rutaka. Waneko hyopkaka wannastsi hahmuna hmana wanna nikka pchinika.

⁹ Waneya repomhaluna Abraão: — Ha Sara, phanunro, hanhe tya? Waneya ruhita: — Wala hawla tenda-pji twa.

¹⁰ Waneya satu wanna wan-tshina: — Halikaka satu mhale hiknohinipa nsatkapanu pixa nwaka waneya phanunro Sara kwuhenpatka jeji twuhenetanu. Hiyáhoni Sara yijnakotlu hiphaptostsi waletji sreta twakanata.

¹¹ Abraão, Sara tsrutsolejinetkani hixo mhalenetkana hiyrun-koxa Sara hi himtuhajetatka.

¹² Hiyáhoni tutsolhiwatatka Sara wala nanwaka, wane ttshina wala nanwaka: — Tsrotsolejno hita nhanuru koxa tsrutsolejitka halikakpaklahe kowhenepno npoyikowatanu?

¹³ Waneya Tsru Hixikatshriwa Hoyakalu wan-tshinru Abraão: — Haklu tshinanhe tutsolhiwatatka Sara wane ttshina: Halikakpaklahe kowhenepno ntsrotsolejikno?

¹⁴ Rawhe pa hixanu Hoyakalu mumukatanutu? Pa mhale xye papkoko hewi nyapanutnaka Sara matuwhenetanu jejipni.

¹⁵ Seyni Sara pikatka hiyáhoni tweyawatatka. Wane ttshina: — Hike, hi nutsolhiwatatka. Seyni wale wan-tshinro: — Hehe, putsolhiwatatka halikaka.

¹⁶ Waneya jejine wane hpalniyatkana. Sodoma tshinikowaka poktshi nwaka hyihatna. Abraão wannayma mnuru runhamtka pchinikna.

¹⁷ Waneya Tsru Hixikatshriwa Hoyakalu wla tshina: — Nyohimaxyerhe Abraão nkamhapirreru tshinanu?

¹⁸ Klu tshinanu Abraão honukla hixo neru hirupni hiyrunu himukatatshripni hiyrun-koxa ptowru tshijne hajeru kihlewaka htshinkona wale tshinanu.

¹⁹ Klu tshinanu nnuretlu wale hiwhenene ruykoxyawaka hiyrun-koxa nuretlu walepji hajene hinatshripa ruykoxyawakapa Tsru Hixikatshriwa Hoyakalu hatnu hapote romkahixyawakapna, potukalune hiyrunu himata yanatshine htshinkona. Wane hixkalunepni Tsru Hixikatshriwa Hoyakalu himukata hakanhakakletlu ptowru pirana potuko htshinakanaxyawaklu Abraão.

²⁰ Waneya Tsru Hixikatshriwa Hoyakalu wane pnute htshina: — Sodoma, Gomorra muhlenu sejire mixkowatatka. Hmixkowpotutatka rumtuknuna.

²¹ Hiyáhoni wane ntshina nserpikanu, netapanna ho wane pa hektunuklahe rixjetna ho hike nix-jemlesejirexyawakna pixka. Wane hmixkanunklunupna nimatanu.

²² Waneya jejinestsi hyopkakakanaxiniwa Abraão ruprotakamtatkana waneya Sodoma poktshi nwaka hyatkana. Halikaka Abraão hitukatka Tsru Hixikatshriwa Hoyakalu hetanuya.

²³ Waneya Abraão kayehikatkalu Tsru Hixikatshriwa Hoyakalu waneya wla htshinru: — Halikaklahe pnikatanna potukalune, hektuneyma?

²⁴ Cinquenta yine potukalune Sodoma poktshi hwini pnikaterhe wale poktshi cinquenta yine pejnu potukalune tshinanrahe ho puchoterhe?

²⁵ Hikeklu wane pixanru potukalune puylaxyawaka hektuneyma. Potukalune hektune hma kahwajikolupna. Hi koxa wane rixa ptowru mayxaklu hetatshri xye tshijne hajeru seyni pixa potukalu pkamhanu.

²⁶ Waneya Tsru Hixikatshriwa Hoyakalu wla tshinru Abraão: — Cinquenta yine pejnu potukalune nukchijinipa wale poktshiya nuchotanru wale poktshi hajene ptowruneka cinquenta yine potukalune tshinanu.

²⁷ Waneya Abraão yanumatatnaka wla htshina: — Petanno xawakni, nukchiklu Tsru Hixikatshriwa Hoyakalu nyinumaxyawaka seyni hitni kajpa pahi pixkalutuchano ho tshitshi pahi pixkalutuchano.

²⁸ Seyni hmahaxinipa cinco yine potukalune cinquenta hmixkanuklunupna pnikaterhe wale poktshi psoluka cinco mhaxyawak-tshinanu tsonu? Waneya Tsru Hixikatshriwa Hoyakalu wla tshina: — Quarenta e cinco yine potukalune tsonu nukchijinipa waneya hi nnikatanru wale poktshi.

²⁹ Waneya Abraão hiynumatatnaklu wla htshinru: — Ha quarenta yine potukalune tsonu rixini? Waneya Tsru Hixikatshriwa Hoyakalu wla tshinru: — Quarenta pejnu tsonu tshinanu hi nnikatanru.

³⁰ Waneya wla htshinru Abraão: — Ha Tsru Hixikatshriwa Hoyakalu hi pahkanno waneya nyanumatanutnaka. Trinta yine tsonu potukalune wane pukchijinipa pnikaterhe? Waneya wla htshinru: — Hi nnikatan-koxlu trinta tsonu nukchijinipa.

³¹ Waneya wla htshinatka Abraão: — Ha hetanu nutajnawa niynumaxyawaklu Tsru Hixikatshriwa Hoyakalu hiyáhoni xawakni vinte tsonu pukchijinipa? Waneya Tsru Hixikatshriwa Hoyakalu wla tshinru: — Vinte tsonu nukchijinipa koxa hi nnikatanru.

³² Waneya Abraão wla tshinru: — Ha Tsru Hixikatshriwa Hoyakalu hi payokanno xawakni tsonu nyanumatanutka. Ha xawakni dez tsonu wane pukchijinipa? Waneya Tsru Hixikatshriwa Hoyakalu wla tshinru: — Dez tsonu wane nukchijinipa hi nnikatanna.

³³ Waneya hajeyri Abraão hali hiynumletkalu Tsru Hixikatshriwa Hoyakalu yatka waneya Abraão yatka hipjiru.