Gênesis 17 - Bíblia

Hoyakalu Hehiwakaxyawaklu Abrão Piranapni

¹ Noventa e nove mhale rixinixka Abrão, Tsru Hixikatshriwa Hoyakalu hakanhayehitlu waneya wane htshinru: — Hita Ptowru Himukata Kamhaletatshrino Hoyakalno; Hitayma pyanu potuka hchinikanupyi.

² Nuchinkapkakanyi pixa nixolewkakanyi hixolune pixyawakapa.

³ Waneya Abrão yoptsojitamtatka tshij-hoho waneya Hoyakalu wan-tshinru:

⁴ — Hita wan-tshinyi pixa; pixa hixo nerune kakojerune hirupyi.

⁵ Xawakni hi Abrão-patkayi phiwakpatkani Abraão klu tshinanu nkamhatkayi hixonerune hiru pixyawakpatka.

⁶ Nkamhanyi pixolewniywakapa, pix-yehi ruchpajinna hixonerune hiyrunu pix-yehi ruchpajinna phurune.

⁷ Hita wane ntshinanyi numlujyayi hikeklu hohne hnikawnanu numluklewle. Pixaymano hiyrun-koxa piklopichaneymano, pixa whenene hapkatatatshinepa koxa ymapno. Pixa Poyakalutno hiyrun-koxa piklopichane Hoyakalutepno.

⁸ Canaã tshiji psoluka, pwajexyawaka, pa neru tshijneya nenekanyi pixa hiyrun-koxa piklopichane, ptowru hohneruka mnikawnakatupa hixa hwalerupa. Wanna Hoyakalutepno.

Cão Piranapni

⁹ Wane pnute htshinru Hoyakalu Abraão: — Xawakni pix-xako pkahwakpiratanru ntshinyatkayi mitshi, pixa hiyrun-koxa piklopichane.

¹⁰ Hiyáhoni nunkakajyatkayi pixa ruchinkapkakanyi hita pixayma, piklopichane koxa hichinkapanru hiyrunu rimretanru xako: Ptowru mturu jeji hixa tskala matuxikatshri histakaptojimtatko.

¹¹ Hiptojimta rustajiko; waneya xyekni hekhitanru nuchinkapkaklewle Hita, hixayma.

¹² Ptowru jeji, ptowru piklopichane oito hohne rixini rustakko. Ptowreru pixasko matuxikatshri hiyrun-koxa paneru hanjixikolu yehi hwatshri wane hixko.

¹³ Pjiprojhaptojitanru ptowru jeji pixasko matuxikatshri hiyrunu katukta ptiyiroteyma panjireru wane hixko. Hiyáhoni ruchinkapko ntshinreru hix-mane hikeklu hohne mnikawnakatupa.

¹⁴ Seyni wale jeji hma jiprojhaptojimtatkonuklunupa, wale jeji konhiwekletko wane hmixkonuklunupa hmajnakowaxyalu Hoyakalu towyehre.

Hoyakalu Hehiwakaxyawaklo Sarai Piranapni

¹⁵ Waneya wane koxa htshinatkalu Hoyakalu, Abraão: — Phanunro Sarai xawakni wane pnute hohnepatka hi Sarai ptshinanro seyni Sara.

¹⁶ Kihlewaka ntshinanwakatanro hiyrunu piwuhenewatanro; halikaka kihlewaka ntshinanro hiyáhoni pa nerkaka hichpajinro, pa nerkaka tsrukakalune hichpajinro.

¹⁷ Waneya Abraão tshij-hoho hyotshrijrotatatka, rutsolhiwata waneya wane htshinnawa: “Rumukata wuhenewlethe sat-jeji cem mhalerututka, Sara koxa noventa mhaletka, tumukata wuhenewlethe?”

¹⁸ Waneya Abraão wan-tshinru Hoyakalu: — Hoo rumukatkamka noturu Ismael ptshinyawaka pixka rixanumka.

¹⁹ Waneya wane htshinru Hoyakalu: — Hike seyni Sara, phanunro wuhenewatanu jejipni. Putakhiwakatanru Isaque; wale Isaque numlukanu xye numluklewle nkamhinru, nunkaklexinna koxa Isaque klopichane, hikeklu hohne mnikawnakatupa.

²⁰ Nyijnaktokanutatkayi Ismael tshinanu, hiyáhoni kihlewaka ntshinanru, nixolewkakanru hixpotpakna hiwhenene; hiyrun-koxa hwuhenetanna tsru phurune doze-pna hiyrun-koxa wale nuchpakajinri satu neruko hixolunpotpako.

²¹ Seyni Isaque potuko nuchinkapkakanu ptowru nunkakletleru pirana. Sara honra matkajinyi Isaque pa kata hetkoko xyeklu papkokotnaka.

²² Waneya Hoyakalu hali hiynumsalexinri Abraão, Abraão yehi ruchpajyatka tenhohne hyatnaka.

Abraão Jiprojhaptojixyawaklu Mturu Piranapni

²³ Waneya wale hohneko Abraão haniklu hiwhene Ismael hiyrunu ptowru htowrene walestsi matuxikatshine hiyrunu ptowru yine ranjirene tiyiroya hiyrun-koxa ptowru yineru jeji wanna hanikajite walestsi matuxikatshin-koxa waneya satkaka pejnu hjiprojhaptojita, hanukta htshin-towutletlu Hoyakalu.

²⁴ Abraão noventa e nove mhaletkalu hjiprojhaptojrewatatka.

²⁵ Hiwhene Ismael treze mhaletkalu hjiprojhaptojimtatkatka.

²⁶ Abraão, hiwheneymako walerutu hohne hjiprojhaptojimtka.

²⁷ Hiyrunu koxa hjiprojhaptojitkana ptowru jejine Abraão-pji hajene, htowrune koxa walesko matuxikatshine hiyrunu ranjirene howuka hichpajikatshri.