Gênesis 16 - Bíblia

Sarai Hagar Piranapni

¹ Sarai, Abrão hnunro mwuhenewakleto seyni timwatkalo sato ttowrero egito-nero, thiwaka Hagar.

² Sarai wan-tshinru Abrão: — Tsru Hixikatshriwa Hoyakalu himaletno nwuhenewaxyawakapa hiyáhoni pumumkanro ntowrero hikta wala wuhenewatanu hita kachrijru. Waneya Abrão yijnaktokanutlo wane ttshinyawaka Sarai.

³ Dez mhale Canaã tshijne rawakanata Abrão, Sarai haniklo ttowrero egito-nero, teneklu thanuru Abrão hhanunro tixyawakapa.

⁴ Waneya rumumkaplo Hagar, tmichiwatatka. Waneya timaxnawa tmichiwaxyawakatka Hagar tohchinikanu teyijyalo ttowutjero.

⁵ Waneya Sarai wan-tshinru Abrão: — Pixako ptshinanu xye salewaktshi pixkakno. Pixasko nutaklo ntowrero seyni xawakni timaxnawa tmichiwaxyawakatka hiyáhoni teyikno. Xawakni Tsru Hixikatshriwa Hoyakalu hetahchinikanyehitwu pixa, hita.

⁶ Waneya Abrão wan-tshinro Sarai: — Pixa towre hajerni ptowrero. Hanukta kihlehopyi wane pixkakanro. Waneya Sarai hapnokatlo ttowrero waneya tasukatka Sarai hoji sreta tma wiywakanpatka.

⁷ Waneya rukchijinixkalo Tsru Hixikatshriwa Hoyakalu towreru tenhohne hajeru Hagar, satu hakopha popriwaka tshijne hajeru hakophastsi twakanata. Xye hakopha Sur poktshistsi yaphapotatshristsi rawa.

⁸ Wane htshinro: — Hagar, Sarai towrero, hanhe puchpajya? Hanhe pyanu? Waneya tuhitlu: — Nasuka ntowutjero hoji sreta nmawiywakanupa.

⁹ Waneya wane htshinro Tsru Hixikatshriwa Hoyakalu towreru tenhohne hajeru: — Psatkapanu ptowutjero nwaka, pkahwakpiratanro.

¹⁰ Wane pnute htshina hinkakletlo Tsru Hixikatshriwa Hoyakalu towreru tenhohne hajeru: “Nkamhanru pixa klopichane hixolewniywakapa hix-potuko hi poyaho hitakyahokletanna wanna klu tshinanu hixpotpakona.

¹¹ Waneya pnuteko htshina hinkakletlo Tsru Hixikatshriwa Hoyakalu towreru tenhohne hajeru: “Pmichiwatatka, jeji pwuhenetanu, Ismael putakhiwakatanru klu tshinanu Tsru Hixikatshriwa Hoyakalu yijnakotlu psalewaklu.

¹² Piwhene poro kmatsyiru pixka rixanu. Ptowru yineru hyotnetanu, wale koxa yotnetko hiyrunu rahkanna himolene psolhohneruka riwekka pchinika.”

¹³ Waneya thiwakatlu Tsru Hixikatshriwa Hoyakalu tyinumsatjeru. “Pixa Netjeryi ttshinru Hoyakalu” klu tshinanu wane tixahchinikanuta, “Xawakniklahe netlu Netjeru?”

¹⁴ Wale tshinanu hakopha hiwakatka Beer-Laai-Roi. Waneru hakopha Cades tshinikowaka, Berede tshinikowaka hanikajite rawa.

Ismael Matuxinri Piranapni

¹⁵ Waneya Hagar matuwheneta jejni Abrão whene. Abrão hiwakatlu xye hiwhene, Hagar hiwuhenewaxyalu, Ismael rutakhiwakatlu.

¹⁶ Abrão oitenta e seis mhaletkalu Hagar wuhenetatkalu Ismael.