Gênesis 15 - Bíblia

Hoyakalu Himlujyawaklu Abrão Piranapni

¹ Wane pnute xyekaka Tsru Hixikatshriwa Hoyakalu tokanu hapyehitlu Abrão, satu rupnawleya waneya wane htshinru: — Hi ppikanu, Abrão. Hita pixa hinokakaklu himaletyehitatshrino hiyrunu pixa tsru pumlujikolu yoptotatshripyi.

² Waneya ruhitlu Abrão: — Tsru Hixikatshriwa Hoyakalu klunerhe wane pnuteko pumukata henekletno hi he mwuhenewakletno hita? Hiyáhoni Eliézer, Damasco hajeru yoptotanru npohirewaxinri?

³ Hiyrunukotnaka wane htshina Abrão: — Hi penekawhenetno hiyáhoni satu ntowrerucha, hitasko hwatshri yoptochatanru npohirewaxinri.

⁴ Waneya Tsru Hixikatshriwa Hoyakalu tokanu hapyehitlu: — Xye jeji hi yoptotanru ppohirewaxinri seyni pixa piwheneko jeji, pixa maneko hichpajikatshri yoptotanru ppohirewaxinri.

⁵ Waneya maleka raniklu Tsru Hixikatshriwa Hoyakalu Abrão waneya wane htshinru: — Teno pyihatanu, putakyahokanro katahirine, pumukata hitakyahoklexiniplo putakyahokanro. Waneya Hoyakalu wan-tshinru: — Katahiri pejnuplu piklopichane.

⁶ Waneya Abrão halixlu Tsru Hixikatshriwa Hoyakalu hiyáhoni ralixle tshinanni Tsru Hixikatshriwa Hoyakalu powratlu Abrão potukalu rixyawaka.

⁷ Wane pnuteko htshina: — Hita Tsru Hixikatshriwano Ur, Caldeu-nerune poktshi kochpajijerukno hita, nenejyawakapyi xye tshiji pumlujikolu.

⁸ Waneya Abrão hepomhalu: — Tsru Hixikatshriwa Hoyakalu, hanhe nixa himatletanru nyoptoxyawakaplu?

⁹ Waneya ruhitlu: — Panikanwakatanno sato waka, sato cabra, satu carneiro, satkaka mapa mhalerutu panikanwakatanno; satu kamowa, satu pombo koxa.

¹⁰ Waneya nyi nikkalune ptowruka ranikatka Abrão rutshrajetna, ruhlepokjetlu, rutamakanru seyni kamejirune hi rutshrajeta.

¹¹ Waneya kamejirune nikalu herune hapokatka seyni Abrão hakakna.

¹² Rimxikpiraxinri tkatshi, hi rakota hixapneta Abrão waneya mapchahalu tsru hamlehtaklewatatshri hapyehitlu Abrão.

¹³ Waneya Tsru Hixikatshriwa Hoyakalu wan-tshinru: — Pimatanru pixa klopichane pa neru tshijne hyinipna hi rimathetkonna. Pa neru towutanunna, hsalewnanunna quatrocentos mhale pejnu.

¹⁴ Seyni napnokatanunna hsaletjenepni waneya wane pnute ruchpajinrinna tsru pohirewnaleymana.

¹⁵ Seyni pixa Abrão putsrukatenni yehi pyanu hike mixkatupyi. Pixa putsruknu kamakaxin-potukyi pkapnatko.

¹⁶ Quatro hatjirtshine pnutpatka hewi hsatkapanna piklopichane klu tshinanu hi hektupotu wanna amorreu-nerune.

¹⁷ Wane rixa hiphujewnaletatka rimxijinixka tkatshi, mapchahatkalu waneya rakanhatka satu hachhaji wale hitokote ruchpajya tshitshipha hiyrun-koxa hahaje katalu yanamta nikalutshraji hanikajite hyapamta.

¹⁸ Wale hohneko Tsru Hixikatshriwa Hoyakalu hchinkapkaklu Abrão wane htshinru: — Pixa klopichane nenekanru xye tshiji haté Egito wenne ruchpajya haté tsru wenu Eufrates tshinikowaka ruchinita.

¹⁹ queneu-nerune tshijne, quenezeu-nerune, cadmoneu-nerune,

²⁰ heteu-nerune, ferezeu-nerune, refains-nerune,

²¹ amorreu-nerune, cananeu-nerune, girgaseu-nerune, jebuseu-nerune.