Gênesis 14 - Bíblia

Quatro Phurune Yahoxyawakna Cinco Phurune Piranapni

¹ Wane rixa hakanhaleta waneklu papko Anrafel Sinear poktshi pohire, Arioque, Elasar poktshi pohire, Quedorlaomer, Elão poktshi pohire hiyrunu Tidal, Goim poktshi pohire.

² Hyahotkakna Bera, Sodoma poktshi pohire, Birsa, Gomorra poktshi, Sinabe, Admá poktshi pohire, Semeber, Zeboim poktshi pohire hiyrunu Belá poktshi pohire koxa (xyekni Zoar).

³ Nyi phurune hapatjekakyehita hyahotkajyawakapna kihlemta tshijiwaka Sidim tshinikowaka xyekni, mar powha ktuwreru tshinkaluru.

⁴ Doze mhale Quedorlaomer towutna nyi cinco phurune seyni doze mhale nikawnini wane hapkatatatshri mhale hmajnakowayehitluna nyi cinco phurune.

⁵ Waneya treze mhale nikawnini wale hapkatatatshri mhale, rapoka Quedorlaomer waleymalune phurune koxa hallitanna refains-ne, Asterote-Carnaim poktshi hajene, rallitanna zuzin-ne, Hã poktshi hajene koxa, rallitanna emin-nerune Savé-Quiriataim poktshi hajene koxa,

⁶ rallitanna horeuso-nerune hipjita Seir hajene koxa haté El-Parã, popriwakastsi hajeru poktshini.

⁷ Waneya hsatokamtna En-Mispate tshinikowaka riknohamtna (Cades koxa tshinikowaka) waneya rallitanna psoltshiji hajenniko amalequita-nerune, amorreu-nerune koxa Hazazom-Tamar tshinikowaka hwatshinni.

⁸ Hiyáhoni hyana Sodoma pohire, Gomorra pohire, Admá pohire, Zeboim pohire, Bel pohire (xyekni Zoar tshinikowaka) nyi halpokotatkalu hyahotkajyawakna wanna kihle tshijiwaka Sidim tshinikowaka.

⁹ Hyahotkajyawakapna Quedorlaomer-yma, Elão poktshi pohire, Tidal-yma, Goim poktshi pohire, Anrafel-yma, Sinear poktshi pohire, Arioque-yma, Elasar poktshi pohire; quatro phurune yahotna cinco phurune.

¹⁰ Hetanu Sidim kihle tshijiwaka rawapa hixlu (betu-ne knaha); waneya Sodoma pohire Gomorra pohire koxa hasukatka, satkaka yineru tshijipna hijruka, pimrine hixetatshine hipjita hya hasukletna.

¹¹ Waneya hkonna psoluka Sodoma, Gomorra hejnunkate, psoluka nikkaluru waneya hyatkana.

Ló Kachixikolu Piranapni

¹² Hkachitkoxluna Ló, Abrão hepuru whene, Sodoma poktshi rawajekanaxini. Rejnunkate koxa ranikna. Waneya hyatkana.

¹³ Waneya satu hasukamta Abrão hebreu-neru nwaka runkajyawakaplu xye pirana. Walekni tsru hahmunastsi hwajekanatatshri Manre, amorreu-neru yehi, Escol, Aner tshinkalune mole, nyi Abrão hepirenni wanna yehi.

¹⁴ Waneya hyijnakoxinixka Abrão hituru himole whene hkachixikowakatka, htomhana trezentos e dezoito jejine walestsi matuxikatshine, nyiyma romkahitna Ló kachimtatshine haté Dã tshinikowaka.

¹⁵ Hoyetshnotkani Abrão kanipretna pa ptohkaka waleymalune waneya Abrão wannayma yahotkaka rakakna, romkahitna haté Hobá tshinikowaka, Damasco-stsi hajeru poktshi.

¹⁶ Hsatkaklu rejnunkatna psoluka, Ló Abrão turu koxa ptowruka rejnunkate, suxone koxa hiyrunu ptowruneka Ló-yma kachitkalune satkapatka.

¹⁷ Waneya yahotkaklu ruchpajinixka Abrão, Quedorlaomer-ni hkayaxya hiyrunu phurune waleymalunni, hkayaxya Abrão hiyáhoni hyamtatka Abrão Sodoma poktshi, kihlemta tshijiwaka Savé tshinikowaka pohire yanwakatlu Abrão. Phuru kihlemta tshijiwakate hyoptokajyana.

Melquisedeque Kihlewaka Htshinyawaklu Abrão Piranapni

¹⁸ Waneya Melquisedeque, Salém poktshi pohire, haniklu pão, vinho-ha koxa; xyekni Tsru Hixikatshriwa Hoyakalu sacerdote-te.

¹⁹ Kihlewaka htshinru Abrão, wla htshinru: “Kihle hchinikanuplu Abrão, htshinyi Tsru Hixikatshriwa Hoyakalu, tenhohne, tshij-koxa towutatshri;

²⁰ Himalwutkalurni Tsru Hixikatshriwa Hoyakalu pkamnitjene hamtakkakatshri.” Waneya Abrão ptowru rimwaleru psojitkaka reneklu Melquisedeque.

²¹ Waneya wane htshinru Abrão Sodoma poktshi pohire: — Penekanno xako nayinetene seyni pixa himutukanru ptowruka rejnunkatna.

²² Seyni Abrão hihitlu: — Nyotukamyoyehitanru Tsru Hixikatshriwa Hoyakalu tenhohne potu hajeru, tenhohne tshiji koxa kamhatshri;

²³ hiyáhoni hikeklu hohne nalukanru pixa himwaleru, hi satuknako tsapu, hi sandalha-tsako hiyáhokni hi wane ptshinanno: “Abrão pohirewata hita tshinanu.”

²⁴ Hike naluka hita seyni nmaklutene nikanru tsonu naluka. Halikaka nimotsane jejine Aner, Escol, Manre, wanna halikaka ranikamtanruna rumukata himutukletna.