Gênesis 13 - Bíblia

Abrão Ló-yma Hitspalkajyawaka Piranapni

¹ Waneya Abrão yatka. Egito ruchpajya Nequebe tshinikowaka tshijne nwaka hyamta. Hhanunro koxa ptowru rimwalene hiyrun-koxa Ló waleymalu.

² Phurupotukni Abrão; rimwana wakane, prata, ouro koxa.

³ Abrão Nequebe ruchpajyatka hyamta pa poktshikaka rutukamta haté rapoklu mitshikananu nikalumta pji hpanaxyawakako rapokatnaka wane potuko hpanawaxyatnaka Betel tshinikowaka hiyrunu Ai poktshi tshinikowaka hanikajiteya.

⁴ Wane koxa mitshikananu altar hkamhiya Abrão; waneya wane potuko Abrão himalwutatkalu Hoyakalu.

⁵ Ló himotsatlu Abrão wale koxa kapra hiprane híxona, wakane koxa híxona hiyrunu pantshi nikalumta kamhikolu hi heppika rimwa.

⁶ Hiyáhoni campo swa hi hpoyahotna wanna ptowruneka wane rawyawakna klu tshinanu rimwalerna hixpotuko waneya hi hpoyahotna rimwakajyawakna.

⁷ Waneya hyinuwaka hahkakakjeretna Abrão-pra hislahatshine, Ló-prane hislahatshineyma. Waneklu papko cananeu-nerune, hiyrunu ferezeu-nerune wane tshiji hwakanata.

⁸ Waneya Abrão wan-tshinru Ló: — Hi kihleru wale hikolukle wahkakajyawaka hita, pixa hiyrunu hitapra hislahatshine, pixapra hislahatshineyma klu tshinanu wmoletkaka.

⁹ Hi he pixa stsikolu tshiji hitsrukakananu? Nanjityi putspalaxyawakapno; xawakni pnuretanu, pixa pasta sreta pyini, hita potuklu sreta nyanu seyni potuklu sreta pyini pixa waneya hita pasta sreta nyanu hita.

¹⁰ Waneya Ló heknojtata retlu Jordão wennemta tshiji. Wale tshiji kihlehlu honha (wanekni mnukawa Tsru Hixikatshriwa Hoyakalu hma nikatkonuklunuwa mitshi Sodoma, Gomorra poktshikaka) Tsru Hixikatshriwa Hoyakalu hitaklecha pixka rixa, Egito tshijne pixka rixatka hatatjewa Zoar poktshi yapamtatshri pixka rixa.

¹¹ Waneya Ló nuretlu walenu rixyawakapa Jordão wenne kihlemta tshijiwaka hiyáhoni tkatshi hichpajyawaka sreta hyatka Ló hiyáhoni rutspalkajyana wanna.

¹² Abrão Canaã tshijne hwa seyni Ló nuretlu kihlemta tshijiwaka poktshinkaka hwiywaka hiyáhoni Sodoma poktshistsi rutakapjikananumta.

¹³ Hetanu Sodoma hwatshine jejine hektutu kkamhaklerune Tsru Hixikatshriwa Hoyakalu hetanuya.

Tsru Hixikatshriwa Hoyakalu Hinkaklu Abrão Canaã Tshijne Renejyawakaplu Piranapni

¹⁴ Ló hitspalaxinixkalu Abrão pnut-hohne Tsru Hixikatshriwa Hoyakalu wla tshinru Abrão: — Xawakni peknojtatanu pyopkajyawaka pokoya.

¹⁵ Klu tshinanu xye tshiji psoluko petleru nenekanyi pixa, pixa klopichane koxa, hikeklu hohne mnikawnakatupa.

¹⁶ Nkamhanru piklopichane ksatuji pejnu rixyawakapna hiyáhoni satu yineru poyaho hitakyahokletkamkalu ksatuji waneya pixa piklopichane koxa poyaho hitakyahokletko.

¹⁷ Ppalnanu pixa, xye tshiji psajrukanu rowuknu htsernu koxa klu tshinanu nenekanyi.

¹⁸ Waneya Abrão yokmakapjitatka, tsru hahmunkaka yehi Mamre tshinkaluru, Hebron poktshistsi tshinikowaka hyatka. Waneya satu altar hkamha Tsru Hixikatshriwa Hoyakalu tshinanu.