Gênesis 12 - Bíblia

Hoyakalu Towuxyawakaplu Abrão Piranapni

¹ Tsru Hixikatshriwa Hoyakalu hinkakatkalu Abrão mitshi: — Puchpajinixkalu ptshijne, pimolene tskalaya, puchpajinixkalu purupji, pyanwakatanru tshiji nekhixyapyi.

² Pixa nkamhinri hixo pixyawakapa. Nuhlehchinikanutanyi pixa hiyrunu pixa npohiwahiwakkakanyi Abrão. Pixa tshinanu pimrine hihlehchinikanutko.

³ Katukta hihlehchinikanutanyi pixa Hita hihlehchinikanutanna wanna hiyrun-koxa katukta hektuwaka htshinanwakatyi pixa Hit-koxa hektuwaka ntshinanwakatna wanna. Ptowru neruka xye tshiji hajene hihlehchinikanutka pixa tshinanu.

⁴ Waneya Abrão yatka htshina towutlexyawaklu Tsru Hixikatshriwa Hoyakalu wane potuko hya Abrão. Ló koxa himotsatlu. Setenta e cinco mhaletkalu Abrão Harã tshinikowaka ruchpajyatka.

⁵ Abrão hanikna waleyma hyiywakna hhanunro Sarai, Ló repuru whene, hiyrunu ptowru rejnunkate rimwanru hiyrun-koxa ptowru rayinetene Harã tshijne rukchijinine ranikamta. Hyanna Canaã tshiji nwaka. Waneya rapokna.

⁶ Waneya Abrão koprumtlu wale tshiji haté Siquém tshinikowaka Moré tshinkaluru mun-yehi. Waneklu Canaã-nerune wane tshijne rawakanatna.

⁷ Seyni Tsru Hixikatshriwa Hoyakalu hakanhayehitlu Abrão waneya wane htshinru: — Pixa klopichane nenekanu xye tshiji. Waneya wane hkamhiylu Abrão satu altar Tsru Hixikatshriwa Hoyakalu tshinanu rakanhayehitjeru.

⁸ Waneya wane riknohamta hipjitkaka yehi hyamta Betel tshinikowaka tkatshi hichpajyawaka sreta nwaka. Waneya wane rutakapjita nikalumta kamhikolu pji. Betel tshinikowaka tkatshi himxijyawaka sreta Ai tshinikowaka tkatshi hichpajyawaka sreta hanikajite hpanawaxya. Waneya wane altar hkamhiya Tsru Hixikatshriwa Hoyakalu rimalwuxyawaka tshinanu.

⁹ Waneya Abrão wane hichpajyatnaka Nequebe tshinikowaka nwaka hyamta.

Abrão Egito Hyinri Piranapni

¹⁰ Waneya tsru natshi wale tshijne hakanhiya; hiyáhoni Abrão Egito tshijne nwaka hya wane rawyawakapa klu tshinanu tsru natshi potuko hakanha wale htshijneya.

¹¹ Egito tshijnestsi rapojinixka hi howukatkalu, Abrão wan-tshinro hhanunro Sarai: — Petanu, nimatyi pixa kihleyi.

¹² Waneya Egito-nerune hexinipyi wla htshinanna: “Twu hhanunro” waneya hita ruylatanna seyni pixa hi ruylatanna.

¹³ Hiyáhoni wane ptshininwa repurno, waneya ramotannona pixa tshinanu hiyrun-koxa kihlewaka hkamhinnona pixa ramotle tshinanna. Hiyáhoni hi ruylatannona.

¹⁴ Waneya rapojinixka Abrão Egito tshijne, egito-nerune hetlo Sarai kihle hojiro tixyawaka.

¹⁵ Waneya rexinixkalona Sarai Faraó yehi towrerune runkakluna Faraó kihle potuklo Sarai htshinruna; waneya ranikatkalona Sarai Faraó yehi twiywakpatka.

¹⁶ Waneya wala tshinanu Faraó kihle hixlu Abrão hiyáhoni wane rixa yoptoletluna Abrão prane carneiro-ne, wakane, porone, htowrerune jejine, htowrerone suxone koxa, porone suxone, camelo-ne koxa.

¹⁷ Seyni Tsru Hixikatshriwa Hoyakalu (Teno Hajeru) hapnokatlu Faraó rayinetene koxa. Tsru hahijewaktshiyma rapnokaxyana Sarai Abrão hnunro tshinanu.

¹⁸ Waneya Faraó tomhalu Abrão waneya wane htshinru: — Kluhe pixatkano? Haklu tshinanhe hi puhle hinkakletno phanunro tixyawaka?

¹⁹ seyni wane ptshinno pepuro tixyawaka? Wale tshinanu nkonyi nhanunro tixyawakapa. Xawakni petanu twutkani phanunro, panikanro pyanutka.

²⁰ Waneya Faraó towutna rayinetene jejine Abrão nwaka hyana rimapyawakpatkana Abrão hiyrun-koxa hhanunro hiyrunu ptowru rimwalerna.