Gênesis 11 - Bíblia

Torre de Babel Tshinkalurupji Piranapni

¹ Hiyáhoni yine psoltshijneka hajene panrurutu tsonu hyanumaxyana; walerutu tokantshi hyanumaxyana.

² Hiyáhoni yine yamta tkatshi hichpajyawaka sreta rukchijyaluna kihlemta tshijiwaka Sinear tshijne rapokna waneya waneko rutukna.

³ Waneya wane htshinna wannakakluko: — Wuya, tijolos wkamhanu hihleyoxikletanru. Hiyáhoni tijolos hpanatna sotlu kachrijru hiyrunu cimento kachrijru preu hsahatna rumukata kachrexyawaka.

⁴ Waneya wane htshinna wanna wannakakluko: — Wuya wkamhinwa satu poktshi hiyrun-koxa satu tenopjiru wkamhanu haté hijripto tenhohne hapkatanu. Hiyáhoni hixa hiwaka hichinijikowakapa wmupalaxyawakanupa tshij-hohoya.

⁵ Waneya hserpikatka Tsru Hixikatshriwa Hoyakalu rexyawakaplu poktshi tenopjiru koxa, hanu rixa kamhaletluna jejine.

⁶ Waneya wane htshina Hoyakalu: — Halikakni panerupkana yine, panrupkana. Xyeni hyinuwajikolu tsonu. Xawakni hike himaletanna wanna klukta raluka kamhaletanna wale hkamhanna.

⁷ Wuya, wserpikanu wyokmakanrutanna hma mimatjemkajyawakanupna satkaka.

⁸ Hiyáhoni Tsru Hixikatshriwa Hoyakalu kopalatna yine psol-tshijiko hyiywakapna hiyáhoni rutuk-kamrurewletna poktshiya.

⁹ Wale tshinanu tenopjiru rutakhiwakatka Babel tshinikowaka klu tshinanu wane honra Tsru Hixikatshriwa Hoyakalu yokmakanruxyana psol-tshijneka hajene hiyáhoni waneko rupalaxyana psoltshijiko hyiywakpatkanna.

Sem Klopichane Piranapni

¹⁰ Xye Sem klopichane piranapni: cem mhaletkalu Sem waneya hwuhenetlu Arfaxade tshinkaluru. Hepi mhale hahyekachalu pnute hwuhenetlu.

¹¹ Arfaxade hwuheneta waneya wane pnute quinhentos mhale riweka Sem. Hwuhenetna hiwhenene jejine suxone koxa.

¹² Riwekatka Arfaxade trinta e cinco mhale waneya Selá tshinkaluru hwuheneta.

¹³ Selá hwuheneta waneya wane pnute quatrocentos e três mhale riwekatka Arfaxade. Hwuhenetna hiwhenene jejine suxone koxa.

¹⁴ Riwekatka Selá trinta mhale waneya hwuhenetlu Héber.

¹⁵ Héber hwuheneta waneya wane pnute quatrocentos e três mhale riwekatka Salá. Hwuhenetna hiwhenene jejine suxone koxa.

¹⁶ Riwekatka Héber trinta e quatro mhale waneya hwuhenetlu Pelegue.

¹⁷ Pelegue hwuheneta waneya wane pnute quatrocentos e trinta mhale riwekatka Héber; hwuhenetna hiwhenene jejine suxone koxa.

¹⁸ Riwekatka Pelegue trinta mhale waneya hwuhenetlu Reú.

¹⁹ Reú hwuheneta waneya wane pnute duzentos e nove mhale riwekatka Pelegue. Hwuhenetna hiwhenene jejine, suxone koxa.

²⁰ Riwekatka Reú trinta e dois mhale waneya hwuhenetlu Serugue.

²¹ Serugue hwuheneta waneya wane pnute duzentos e sete mhale riwekatka Reú, hwuhenetna hiwhenene jejine suxone koxa.

²² Riwekatka Serugue trinta mhale waneya hwuhenetlu Naor,

²³ Naor hwuheneta waneya wane pnute duzentos mhale riwekatka Serugue; hwuhenetna hiwhenene jejine suxone koxa.

²⁴ Riwekatka Naor vinte e nove mhale waneya hwuhenetlu Terá.

²⁵ Terá hwuheneta waneya wane pnute cento e dezenove mhale riwekatka Naor; hwuhenetna hiwhenene jejine suxone koxa.

²⁶ Riwekatka Terá setenta mhale waneya hwuhenetna Abrão, Naor, Harã.

²⁷ Xyeni Terá klopichane piranapni: Terá wuhenetlu Abrão, Naor, Harã. Waneya Harã wuhenetlu Ló.

²⁸ Rupnanatka Harã hmatuxyawaka tshijneko rupniyana Ur tshinikowaka Caldone tshijneya. Seyni ruru Terá tshinkaluru hiwekawa.

²⁹ Abrão hanunrowata, Naor koxa hanunrowata; Abrão hnunro Sarai tshinkaluro, Naor hnunro Milca tshinkaluro, Milca hirni Harã tshinkaluru; Harã wuhenetna Milca, Iscá tshinkaluro.

³⁰ Seyni Sarai mwuhenewaklétoni hi kwuhenro.

³¹ Waneya Terá haniklu hiwhene Abrão. Ranikkoxlu Harã whene Ló tshinkaluru. Ló Terá tshinkaluru whene whene; Terá mekanunroni Sarai tshinkaluro ranika, hiwhene Abrão hnunro. Waneya wannayma hyana Ur tshinikowaka Caldone tshijne ruchpajyana, Canaã tshijne hyiywakna. Harã tshinikowaka rapokna waneya wane potuko rutukna.

³² Duzentos e cinco mhaletkalu Terá waneya Harã tshinikowaka rupniyanatka Terá-ni.