Gálatas 5 - Bíblia

Moisés Hiykole Yonatkaluru Ho Ruchochaxikolu Piranapni

¹ Cristo hichokakwu hichotkalune potuko wixyawaka. Hiyáhoni hpoyehixinwa hichoxikolu pirana tshinanu. Hi hkachitkotnaka towretshine hixyawaka hiyrunukotnaka.

² Hyijnakpotutanno! Hita Paulo-no wan-tshinhi. Katukta jiprojhakjixinwa, hi psojikna repixiko Cristo tshinanuya.

³ Hiyrunu wane ntshinatnaka. Katuktako jiprojhakjixnawa rujhalu Moisés yonreru pirana psoluka romkahixyawaka.

⁴ Hanunektahi hixa kahwaklu Moisés yonreru pirana homkahixini powratlewaxyawaka Hoyakalu yhaleya hkotspalaxinwa Cristo yehiya, Hoyakalu hihlenu renekachale psoluka hamtakatshinetkahi.

⁵ Seyni hixa, wkahwaklu Hoyakalu halukanwu. Klu tshinanu Hoyakalu Hiwejikaluru pixkonu tshinanu hiyrunu walixle tshinanu wumukatlu.

⁶ Klu tshinanu Jesus Cristo hetanu hi jiprojhikatshrikwa himukatlu, hi mjiprojhikatukwa yineru himukatlu. Seyni halixlu hichiniklewluyma halikaka himukatatshri potukni.

⁷ Kihle hixjekanata. Klu himaletatkahi halikaka pirana hma momkahixyawakanu?

⁸ Xye hichinikanretleru hi htshanixjeru henejyahi.

⁹ Xye pirana: “Psotsonujiji chitshponatshri psolujpako hchitshponkaka.”

¹⁰ Hixa nkahwaka Tsru Hixikatshriwa Hoyakalu hepixle tshinanu hi pnuko hixahchinikanutanu. Seyni katuktako hkojwakjeru rapnokatko Hoyakaluya.

¹¹ Ha hita xawaka, Cristo tshinanu nmoletanune, jiprojhaptojru pirana tsonu nunkaklexini himka rukolukanno seyni kluneru tshinanhe nkamnitka haté xawakni? Jiprojhalu munanhikolu tsonu nunkakletkamka waneyamka hike yineru kojwakahchinikanutanutka cruz hinkaklexikolu pirana tshinanu.

¹² Nalukmaklu hkojwakahchinikanutjene hjihejhapotuxikowakna.

Hamotkaklu Wuchoxikolu Pnute Hijhakaluru

¹³ Cristo tshinanu nmoletanune, hixa tshanixka hichotkalune hixyawakapa. Seyni hi hixako himane halujyawaka hkamhanu mtowutkone hixyawaka tshinanutka. Seyni Hoyakalu hichiniklewle tshinanu hepixkakanu.

¹⁴ Moisés yonreru ptowruko hpoyahokakatka xye towutlupka tshinanu: “Puchinikanru pimwastsitanru pix-nanuko pixka.”

¹⁵ Seyni hejnune kmatsyirune pixka hachkotkakatshine, nikkakatshine pixka hixini, xako hnikatkakapaka.

Hoyakalu Hiwejikaluru Kamrure Ho Hixako Hihchinikanu Kamhapirleru Piranapni

¹⁶ Naluka wan-tshinreta: Hitshitanru Hoyakalu Hiwejikaluru hixa hiwejinri hkosejyawakapa. Hikeklu hixako hihchinikanu halujyawaka homkahitanu.

¹⁷ Klu tshinanu hixako hihchinikanu kamhapirlu kamnitlu Hoyakalu Hiwejikaluru hchinikanu. Hoyakalu Hiwejikaluru hchinikanu kamnitlu hixako hihchinikanu. Hixako halujyawaka hiyrunu Hoyakalu Hiwejikaluru halujyawaka kamnikaka. Hiyáhoni hixa halukanrukaka hi himukata kamhaleta.

¹⁸ Klu tshinanu hixa hitshixiniplu Hoyakalu Hiwejikaluru kosejyawakaphi, Moisés yonreru hi hixa towutatshrini.

¹⁹ Wimatlu hixako wihchinikanu hichpajikatshrikaka. Wannani himopatlewlu, hapoklewlu, pitshotlewatatshri, hektutu kamhalu,

²⁰ mayawletshicha kahwakpiraxikolu, kahontshiwlu, jhekantshi, kamnirewlu, hejnuhimlu, hahxalu, himtuwaktshi, hihjekaklu, kotspalahchinikanrewlu, pnuko hasruklewlu hasruklewatatshri,

²¹ sotanuhonutshi, himri, tsru nikatshri, hiyrunu wane pixkalutkaka. Ntshinyawakatka mitshi pixka ntshinanukotnaka, wan-hixatshinenapa hi hyoptotanruna Hoyakalu pohirewaxyawaka.

²² Seyni Hoyakalu Hiwejikaluru kamrurni hixkakluko hamotkajyawaka, wumuwaxyawaka, hwachalu, ptowru potuko wakoxyawaka, kchinikanurune wixyawaka, pimrine wuchinikanrexyawaka, walixyawaklu,

²³ hixanu tsonu wma muchinikanrexyawakanu, hi hix-nanuko walujyawaka tsonu womkahitanu. Xyekaka Hoyakalu Hiwejikaluru kamrurni. Hi rawatka satu yokanruru xyekaka himaletatshritka.

²⁴ Cristo-ymalune wannako ralujyawakna ruknokna. Himanna halujikolkaka hiyrun-koxa himanna het-sotanrewle ruknokna Cristo pixka. Hatatjewa Cristo-yma cruz rixpatkatka himanna.

²⁵ Hoyakalu Hiwejikaluru himukatle wiwejini, wujhalu Hoyakalu Hiwejikaluru halujyawaka koxa womkahixyawaka.

²⁶ Hi hix-nanuko halixkoxinwa. Hi wyotnekakanu. Hi whahxakajini.