Gálatas 4 - Bíblia

Hoyakalu Whenenetkawu Cristo Tshinanu Piranapni

¹ Hiyáhoni wane ntshina: Mturu hkaylerupa hma myoptotkanu pchinika towrertshi pixka rixnawa. Yáholu ptowru potukomka walenutkani.

² Mturu rixka pchinika, jinotaklerune hiyrun-koxa suslahaklerune towre rutakka haté rapokhohnexinipa ruru marca-hohnexyalu hyoptotanru hkaylerupa.

³ Waneko pixka wixa hix-koxa mturune pixka wixakanaxiniwa, xye hohne hajerkaka towutjekanatwu.

⁴ Rapokhohnepotuxinixka Hoyakalu yokanatlu hituru, suxo hmatuxyatka Moisés yonreru homkahitatshrotkani.

⁵ Wan-rixa, Moisés yonreru towre hkochpajyawakapna Moisés yonreru homkahitatshine Hoyakalu whenene wixyawakapa.

⁶ Hiyáhoni rekhixyawakaplu Hoyakalu whenene wixyawaka, Hoyakalu yokanatlu Hituru Hiwejikaluru, wan-tshinatshri wajiya. Hipokananu wla htshina: “Hirtshi, Nuru.”

⁷ Hiyáhoni hi towrertshinhi seyni whentshinhi. Hiyahokni whentshine hixyawaka tshinanu, Hoyakalu henekanhi ptowru potuko hiwhenene renekanrupa.

Paulo Kojwakahchinikanuta Gálatas Hajene Tshinanu Piranapni

⁸ Seyni mitshikananu Hoyakalu hmimatyehitkanuklunuwa, hoyakalune minjene towutjekanathi.

⁹ Seyni xawakni hixa himathetatkalu Hoyakalu, halikak-potu Hoyakalu himathetatkahi hixa. Hanhe xawaka himukata satokanwakletanru xye hohne hajeru mahijerkaklewatatshri hike mkochpakkatu? Kluneru tshinanhe hixa hijhalu xyekaka towuxyawakhi hiyrunukotnaka?

¹⁰ Hixa himretpotutlu hihohnekaka, hiksurkaka, hipapkolkaka, mhalkaka.

¹¹ Nkojwakahchinikanuta hixa tshinanu. Hiyáhola nmahijeru kamrurewletatka hix-yehiya?

¹² Cristo tshinanu nmoletanune, nanjithi hita pixka hixahchinikanuxyawaka klu tshinanu hixa pixkalut-koxno hita. Hike halikaka himtukno hita.

¹³ Hixa hichiniklu mitshikananu nyeyixle, nuhrokmanre tshinanu nehinkakletkahi kihle piranalu potuko hiwekkaklewatatshri pirana.

¹⁴ Yáholu tsru yaprentshi nenekhi nyeyixle tshinanu, hixa hi heyikatkano. Hiyrun-koxa hike hiknokno seyni kihle hixa yoptoletno hatatjewa hiwejikaluru Hoyakalu towreru tenhohne hichpajikatshri hyoptota ho hatatjewa Jesus Cristo potuko hyoptota.

¹⁵ Poyikpotukananhi. Klu tshinanhe hi wan-hixa xawakni koxa? Klu tshinanu nimatlu mitshikananu hike potuko htshipexyano haté himukatkamka hiyhal-sahi koxa hkochpakanumka henejyawakapno.

¹⁶ Halikaka pirana nunkajyawakhi tshinanrahe xawakni hixa kahwakno hkamnitjeru nixyawaka?

¹⁷ Nyi jejine hmixkotahchinikanutjene phuta hi kihlerunni. Seyni hixa rujhahchinikanutna rumtujyawakaphina hita hma momkahixyawakanupa seyni wanna potu homkahixyawakapni.

¹⁸ Kihleru hmixkowahchinikanhohnekanaxinripa kihleru tshinanu. Hi hix-yehi nwini tsonu wan-hixanu.

¹⁹ Ha nowhenene pixkalune! Matuwhenetatshro pixka nixa jemletshinothi. Hi nutuka jemletshinothi haté Cristo hali tsepotlehchinikanuxiniphi.

²⁰ Hix-yehimka naluk-hwaleta xawakni klu tshinanu hi nimat-hichinikanuwyehithi. Sara Hiyrunu Agar Tshinkalune Yapkakle Pirana

²¹ Hinkakanno, hixa Moisés yonreru homkahpiratatshinhi, hi he xawaka himatjemlu Moisés yonreru pirana?

²² Wla htshina yonatkaluru. Hepi whenru Abraão. Satu hiwhene towretshro whenni. Satutnaka mtowutkoto whenni.

²³ Towretshro whene matuchata ptowru mturu pixka. Seyni mtowutkoto whene Hoyakalu hinkakletahnapurerni wale.

²⁴ Xye yapkaklu piranni. Hepi kojiretlu piranni. Satu himriji Sinai tshinikowaka hichpajikatshrini, Agar tshinkaluro hyapkakleta. Towhenene koxa wala pixkako hixa towutletko.

²⁵ Agar tshinkaluro yapkakletlu himriji Sinai tshinikowaka, Arábia tshijne hwatshri. Halikaka Jerusalém poktshi tyapkakleta Agar. Jerusalém poktshi towretshri Jerusalém hajene ptowruneymako.

²⁶ Seyni Jerusalém poktshi tenhohne hajeru waleni wunro mtowutkoto pixkalutu.

²⁷ Klu tshinanu halikak-potuk-tokantshi wan-tshina: “Suxo mwuhenewatkatokananyi, ppoyikowatanu! Pixa, hikeklu tshinowatatshrokananyi, psaplewatanu ppoyiknuyma. Klu tshinanu khanururo pnute hixonu whenro hichotkaluro.”

²⁸ Seyni hixa, Cristo tshinanu nmoletanune, Isaque pixka hixa. Hoyakalu whenenetkahi Hoyakalu hinkakle tshinanu Isaque pixka.

²⁹ Klu tshinanu waneklu papko ptowru mturu pixka hixa matlechatatshri kamnitlu Hoyakalu Hiwejikaluru matkakleru. Waneko pixka rixa haté xawakni.

³⁰ Seyni hanu htshina Hoyakalu tokanu yonatkaluru? Wla htshina: “Puknokanro towretshro toturuyma. Klu tshinanu towretshro whene hi yoptotanru rumlujikolna mtowutkoto wheneyma.”

³¹ Hiyáhoni, nmoletanune Cristo tshinanu, hi towretshro whenenwu hixa seyni mtowutkoto whenenwu hixa.