Gálatas 3 - Bíblia

Ho Moisés Hiykole Yonatkaluru Ho Halixlu Piranapni

¹ Gálatas poktshi hajene mchinikanunhi, kathe yokchathi halikak-potuk-tokantshi hmajnakowyehixyawaka? Hanhe himukata wan-hixleta, hixa Jesus Cristo pirana phujewak-potukomka hiphujewnayehithi, cruz hixa tshinanu rupniywaka pirana?

² Xye pirana naluk-himatlexyahi. Hanu hixa yoptoletlu Hoyakalu Hiwejikaluru? Ho Moisés yonreru pirana homkahixikolu tshinanrahe ho halixlu pirana yijnaxikolu tshinanrahe halikaka?

³ Mahchinikanunrahe? Hixa Hoyakalu Hiwejikaluruya yinuwakatshinhi hkahwakhe xawakni hpotukatko hixa nanwaka tshinanu?

⁴ Hixlahe ptowruko mahijeru salewnakaklechathi? Halikaka hike mkochpakkatu rixkamka?

⁵ Hoyakalu honra Hoyakalu Hiwejikaluru heneklewatatshri hiyrun-koxa himyekaklewatatshri kamhatshri hixa tskalaya wan-rixa Moisés yonreru pirana homkahixikolu tshinanrahe ho halixlu pirana yijnaxikolu tshinanrahe halikaka?

Hoyakalu Hinkaklexyalu Abraão Pirana Halixluyma Tsonu Retko

⁶ Petanru Abraão-ni. Hoyakalu ralixa hiyáhoni wale tshinanu hike mixkatu hkahwakka Abraão.

⁷ Hiyáhoni hixa himatlu Abraão klopichane halikakalune wannani halixatshine.

⁸ Hoyakalu tokanu yonatkaluru hinkakletahnaputlu judeu mixkane halixlu tshinanu hpowratkona Hoyakaluya. Hiyáhoni hma makanhaknuklunuwa kihle piranalu potuko hiwekkaklewatatshri pirana yonatkaluru wan-tshinanwakatlu Abraão: “Pixa tshinanu Hoyakalu hihlewahchinikanyehitna ptowru tshijne hajeneko.”

⁹ Abraão halixatka. Hiyáhoni ruhlewahchinikanyehitka Abraão. Waneko pixka rixka ptowru halixatshri Abraão pixka ruhlewahchinikanyehitkana.

¹⁰ Moisés yonreru pirana homkahlu munanhatshine wannakni Hoyakalu kamakatanunepa. Klu tshinanu wane htshina halikaka tokantshi yonatkaluru: “Ptowruneka katuktako hi homkahitlu ptowru potuko yonruru pirana hajeru, wanna Hoyakalu kamaklewle hwatshinni.”

¹¹ Wimaxyawaklu hi satukna yineru powratko Moisés yonreru pirana homkahlu tshinanu Hoyakalu hetanu. Klu tshinanu halikaka tokantshi yonatkaluru wan-tshina: “Hoyakalu powratleru halixlu riwejya.”

¹² Klu tshinanu Moisés yonreru pirana homkahlu hi halixlu tshinanni. Klu tshinanu halikaka tokantshi yonatkaluru wan-tshina: “Katukta kamhanru Moisés yonreru tshinyawaka ptowruka, wale kamhatshri hiwekanu yonruru pirana homkahixikolu tshinanu.”

¹³ Cristo hipnanatka hkochpajyawakwu Moisés yonreru pirana hapnokatlewleya. Hixa kachrijru kamakatkalurni Cristo. Klu tshinanu halikaka tokantshi yonatkaluru wan-tshina: “Kamakatkalurupni katukta hahmuna hixripkakko.”

¹⁴ Hoyakalu hihlewahchinikanyehixyawaklu Abraão pirana himukata hapokyehretna judeu mixkane yehi Jesus Cristo tshinanu wyoptoxyawakaplu Hoyakalu Hiwejikaluru runkakletleru halixlu tshinanu.

Hoyakalu Hinkakle Piranapni

¹⁵ Cristo tshinanu nmoletanune, yineru hixannu pirana ntshina: Yáholu yineru hinkaklechani seyni ruphujetko halikak-piranni, hike hiknoktokanutanru. Hiyrun-koxa hike hiwjetanru.

¹⁶ Hoyakalu hinkakle pirana, Abraão hiyrunu Abraão klopichane tshinanu runkakletlu Hoyakalu. Halikaka tokantshi yonatkaluru wan-tshina hi hiklopichane tshinanni htshina, hi hixolune hkochtsheka seyni hiklopicha htshina satupka hkochtsheka. Piklopicha tshinanni htshina. Waleni Cristo.

¹⁷ Hiyáhoni xye ntshina: Hoyakalu hinkakletlu hkamhalerupa Cristo-ya. Waneya Moisés yonreru pirana quatrocentos e trinta mhale wkatanu hohneko rakanhatka seyni hi rumukata makanhalnuta Hoyakalu tshinreru. Hoyakalu hinkakle hi hmahijerutanu wkatanu hohneko hapokatshri tokantshi tshinanu.

¹⁸ Klu tshinanu wyoptotanrupa Hoyakaluya, Moisés yonreru tshinanu wyoptotkamkalu, hiyáhoni hi Hoyakalu hinkakletlerumka wyoptoxinri. Seyni Abraão yoptoleru Hoyakalu henekachale.

¹⁹ Hiyáhoni kluneru tshinanhe Moisés yonreru hitakka? Rutakka rimathexikowakapa hanu rixa hektuntshi. Moisés yonreru towutlewatanu haté rapokpotuxinipa Abraão klopicha hinkakletkaluru. Moisés yonreru henekka hiwejikalune Hoyakalu towrene tenhohne hajeneya. Satu jeji papohchinikanutkolumyo rutakka.

²⁰ Papohchinikanutkolu hepi sretako rujhika. Seyni Hoyakalu satupka.

Klu Rimaluka Moisés Hiykole Yonatkaluru Piranapni

²¹ Moisés yonreru piranrahe xawaka kamnitlu Hoyakalu hinkakle pirana? Hike, hikeklu. Klu tshinanu rawkamka satu hiykolu hiweklu heneklewatatshri, waneyamka Moisés yonreru hima ruchpajikmaka yineru potukatatshri Hoyakalu hetanuya. Hikemka mahatanutka.

²² Seyni Hoyakalu tokanu yonatkaluru wan-tshina, ptowru yineru potuko hektuntshi towutlerni. Wan-rixa hiyáhoni halixlu tshinanu ptowru yineru potuko himukata yoptoletanru Hoyakalu hinkaklexyana hyoptotanrupna Cristo halixatshinetka.

²³ Seyni hmapokkanuklunuwa Cristo halixikolu pirana, Moisés yonreru pirana himretlewakanata hinotlewatatshri pixka rixapa haté ruphujewninixka halixlu pirana.

²⁴ Moisés yonreru hinotlu yineru haté rapojinipa Cristo. Hiyahokni halixlu tshinanu Hoyakalu halukwu mimaletkonetkawu.

²⁵ Xawakni rapokatka halixlu papkolu. Hiyáhoni hi wujhalu wtowuxikowaka.

²⁶ Klu tshinanu hixa Jesus Cristo halixyawaka tshinanu hixa ptowrunekhi Hoyakalu whenenhi.

²⁷ Klu tshinanu hixa batiza-tka himathexikolupa Cristo-ymalunhi hixyawaka hiyahokni hixa Cristo-kni wimkalu.

²⁸ Satupkahi Cristo Jesus-yma. Hi judeu-nhi hi judeu mixkanhi. Hi towrertshiko hi hichotkaluruko. Hi jejineko hi suxoneko.

²⁹ Cristo-nune hixyawaka tshinanu hix-koxa Abraão klopichanhi. Hiyrun-koxa wyoptotanru Hoyakalu hinkaklexyawu wyoptotanrupa.