Gálatas 1 - Bíblia

Hichiniklewlu

¹ Twu yonawahlo, Paulo yokanrerni. Nuretkalurno, nyokanatka. Yine hi yokanatno hiyrunu hi yineru nurreru tshinanu seyni Jesus Cristo tshinanni hiyrun-koxa Hirtshi Hoyakalu tshinanu Cristo hiwekkakatshri hipnatshine tskalaya.

² Hiyrun-koxa ptowrunemnuka Cristo tshinanu wmoletanune, hitaymalune, twu yonawahlo nyokananwakatna Cristo halixatshine hapatjetatshin-yehkaka Galácia tshijne hwatshine.

³ Hoyakalu henekachale hihlenu yoptotatshinephi, kihlehchinikanurunephi Wuru Hoyakaluya hiyrunu Wutsrukate Jesus Cristo tshinanuya.

⁴ Cristo henejnawa rupniywaka wektunu tshinanu. Wan-rixa Cristo riwekkajyawakwu xye hektutu hohneya, Hoyakalu, Wuru halujyawaka tshinanu.

⁵ Himalwuhohnekanatkalurni Hoyakalu hikeklu hohne mnikawnakatupa. Wan-hixatshripyi.

Seyokatkani Hiwekkaklewatatshri Pirana

⁶ Nimyekpotuthonuka wan-hixa hicholehapkaxyawaklu hixa tshanixjeru, hetwamonru piranaya, Cristo tshinanuya, satu kihle piranalu potuko hiwekkaklewatatshri piranako homkahixyawakana.

⁷ Seyni waleni hi satu kihle piranalu potuko hiwekkaklewatatshri pirana, halikaka. Seyni wanena satkaka hixa hkojwakahchinikanutjene, Cristo pirana hiwekkaklewatatshri pirana himtukpiratatshine.

⁸ Seyni katuktako, ho hixamka ho hiwejikaluru Hoyakalu towreru tenhohne hichpajikatshrimka, runkaklexinhi satu hixatshri kihle piranalu potuko hiwekkaklewatatshri pirana, hixa mitshikananu hinkakletakanatanru pirana hmixkanuklunu waneya wan-hixatshri hektutu htshinanwakatko.

⁹ Mitshikananu wtshinyawaka wane wtshinatnaka. Satu yineru hinkajiniphi satu hixatshri kihle piranalu potuko hiwekkaklewatatshri piranamka hixa hma jema hinkakletletanutu, hektutu htshinanwakatko wan-hixatshri.

¹⁰ Kathe xawaka nkahwakpirata? Ho yine ho Hoyakalu? Ho nujhalhe xawaka yine himalwuxyawakno? Klu tshinanu yinemka nuhlewahchinikankajini, hi Cristo towrerno.

Paulo Nurreru Piranapni

¹¹ Jesus Cristo tshinanu nmoletanune, nunkakhi halikaka kihle piranalu potuko hiwekkaklewatatshri pirana nunkakletleru, hi yineru hiyakolerni.

¹² Hike yineru hinkakno wale pirana, hi satukna yineru hasrukno wale. Seyni Jesus Cristo potuko hiphujetpiranatlu hit-yehiya.

¹³ Hixa jempiranatlu nixjekanaxyawaka pirana judeu-ne hiykole pirana nomkahjekanaxini. Hixa himatlu, Hoyakalu halixatshine hapatjetatshine nkamnixyawaka pirana. Nkamnipotutatkana nnikaxyawakamkapna.

¹⁴ Waneklu papko judeu hiykole nomkahpotutatka. Wane potu nixa homkahretlu wutsrukatenni judeu hiykolekaka haté pimrine hixolune hita pixkalune pnute nix-hita.

¹⁵ Seyni Hoyakalu, retwamonre tshinanu, hnuretno, htshanixno nma matutkanuklunuwa.

¹⁶ Waneya hituru ruphujewnayehkakno, nunkaklexyawakaplu Cristo pirana judeu mixkaneya, hike yineru hchinikanu nujhatka.

¹⁷ Hiyrun-koxa hi Jerusalém poktshi nyanwakatatka mitshikananu nuretkalune hita pnuterune nexyawakapa. Seyni Arábia tshijne nyatka. Nsatokatka waneya Damasco poktshi nyatnaka.

Paulo Jerusalém Poktshi Hiyrunu Pimri Poktshikaka Hyiywaka Piranapni

¹⁸ Waneya wane pnute, mapa mhale hiknohinixka Jerusalém poktshi nyanwakata, Pedro nimaxinripa. Waneya quinze hohne Pedro yehi nwatka.

¹⁹ Pimrine nuretkalune hi neta seyni Tiago tsonupka, Tsru Hixikatshriwa Jesus hepuru tsonu neta.

²⁰ Nunkakhi halikak-potu xye pirana nyonatanru. Hoyakalu hetanu, hi nweyawata.

²¹ Waneya wane pnute Síria tshijne sreta hiyrun-koxa Cilícia tshijne sreta nya.

²² Hiyrunu wane pchinika Cristo halixatshine hapatjetatshin-yehkaka Judeia tshijne hwatshine hi hetawano.

²³ Hjempiranachatnona pimrine hinkajyawakna nopirana: “Mitshikananu wkojwakakanatjeru xawakni hinkakletlu halixlewlu pirana hnikatpirjekanatanrumka mitshi hkamhatka.”

²⁴ Hiyahokni hita tshinanu Hoyakalu rimalwutna.