Efésios 6 - Bíblia

Paulo Hiykotna Tsrune Hiyrunu Mturune Ruykoxyawaka Piranapni

¹ Whentshinhi Wutsrukate Cristo homkahitatshine hixyawaka tshinanu hixa hijhalu hirtshine hyijnakoxyawaka klu tshinanu xyeni kihleru wan-hixyawaka.

² Pyijnakotanru puru, punro. (Xye yonatkaluru yokanatkaluru mitshikananu hinkakletkaluru.) Runkakletluna kihleru hakanhayehixyawakapna kajnako rixyawakapna.

³ Kihle hixinripa. Hohiweklu hixinripa.

⁴ Hiyrun-koxa hixa hirtshinhi hi himtuwnakakanna hwuhenene seyni hislahanna, htseruwnakakanna Wutsrukate Cristo haluklewleya hiyrun-koxa Cristo hiykolewleya.

Hiykolu Ktowutlewakleru Tshinanu Hiyrun-koxa Kkamrurewaklerune Tshinanu Piranapni

⁵ Towrertshine xako yijnakotanna htowutjene xye tshijne hajene. Hkahwakpiratanna htowutjene hiyáhoni hyijnakotanna ptowru potuko hjemleru. Wane potuko hixatshinephi kihle hchinikanuphi hatatjewa Cristo towutanunhi.

⁶ Hi htowutjene hetanu tsonu kajnakophi hyokwijechaxyawaka tshinanupna htowutjene seyni Cristo towrene hikahwajinwa hiyáhoni psoluka hihchinikanu mixkonuyma hkamhanru Hoyakalu halujyawaka.

⁷ Kihle hchinikanurunhi kamrurewatanu hatatjewa hi yine towutlenhi seyni Wutsrukate Cristo towutlenhi.

⁸ Hichinikanru xye, satkaka yineru, yáholu towrertshi ho mtowutkotu seyni hyoptotanru hkamrure wenru Tsru Hixikatshriwa Hoyakalu henekanhi hkamhiniplu ho kihleru ho hektutu.

⁹ Hixa ktowutaklerunhi waneko pixka hixanna hkamrurewkakjetanune. Hi hyanhakkakanna htowrene. Seyni hichinikanru xako hixa tsru hixikatshinwahi hiyrun-koxa hixa towrertshine hitsrukate satupkalu Hoyakalu tenhohne hajeru. Payakalunephi Hoyakaluyma.

Kamtshi Kamnirewle Wuknojyawaka Piranapni

¹⁰ Hiyáhoni xawakni hixkolunephi klu tshinanu Wutsrukate Cristo-ymalunwu hiyrunu hpixkonu wmixkotjeru tshinanu.

¹¹ Ptowruk-xako hyochmakanu hinokakoklunu himaletyehitjerupa Hoyakalu henekanhi hixa himukata poyehi yopkakle hixyawakapa, tsru kamtshi kakonre hixa hma kachixyawakanupa tshinanu.

¹² Klu tshinanu wkamnitjene hi yinni kahiturune, hi kahrahalune seyni wkamnitjene wannakni kamtshine hmuhlenuymana xye psol-hohneko yapatshine hiyrunu tsrukakalune, tsru hitakkalune, malehohnewaka hwatshine tsru pixkontshiyma yine yokwijpiratatshine, kamtshi yokwijpiratwu towutlewpiratatshineya.

¹³ Hiyáhoni ptowruko hyochmakanu hinokakoklunu himaletyehitjerupa Hoyakalu henekanhi hixa himukata hiknohletanru hektutu pa hohne hinyehitjerupa tshinanu. Hkamnitkoklunupa hixa himukata poyehi yopkakle hixleta haté rasujinipa hkamnitjeru hpaklu yopkakletanutshi.

¹⁴ Hiyáhoni xawakni chikpok-yopkaklerunephi. Halikakalutu pirana halixpotutanu wan-hixini hostuptshijitkalunhi pixka hixatshinetkahi. Potukalunephi hatatjewa statshi hislahatshri hitakastatka.

¹⁵ Kihle piranalu potuko hiwekkaklewatatshri pirana hapnanuhchinikankaklewatatshri tokantshi hpoyehixinwa hiyáhoni hatatjewa hislahjixitjeru hyochmakka.

¹⁶ Hiyrun-koxa ptowru hohneruka hiyrunu ptowru papkoluko halixpotutanu wan-hixatshri hatatjewa katshralu himaletapichpata ranikamta pa myoya. Hiyáhoni hixa himukata hiwakletlu ptowru hatatkaluru katshralkaka Satanás yokananwakaxyahi.

¹⁷ Hoyakalu henekanhi hiwekkaklewatatshri hyoptotanrupa wan-hixatshinhi hislahjiwutjeru hitakatshinhi. Hiyrun-koxa Hoyakalu tokanu hanikanu Hoyakalu Hiwejikaluru henejyahi waleni hatatjewa yohlolewapi hkachimta.

¹⁸ Xye ptowruko hkamhanu hanjihohneruya Hoyakalu hanjitanu repixyawakaphi. Hanjihohnetanu hi hituk-hanjihohneretanu. Hoyakalu Hiwejikaluru kosekle homkahitanu hanjihohneruya. Hi himnanhanu. Hi hihrokanu hanjihohneruya. Hanjihohneyehitanna Hoyakalu halixatshine.

¹⁹ Hit-koxa hanjihohneyehitanu, nunkaklewaxini, Hoyakalu henektokanuxyawakapno hiyrun-koxa nunkaklewaxini nma pijyawakanupa, nunkakle pirana rimatjemikowakap-koxa kihle piranalu potuko hiwekkaklewatatshri pirana npohitakanatanru pirana.

²⁰ Kihler-potuko tokantshi hiwekkaklewatatshri pirana pohitatshrino yahmaklu kapna nutakka. Hiyáhoni hanjihohneyehitanno phujetanuwaka potuko ntshina hinkakletlexyawakaplu hiwekkaklewatatshri pirana rixpiranaxyawak-potuko.

Haliklewlu Piranapni

²¹ Wuchinikanru wimole Tíquico tshinkaluru Wutsrukate Cristo kamrurewyehitatshri halikak-potuko. Wale hinkakanhi hita nopirana hixa himaxyawakaplu hanu nixa.

²² Wale tshinanukni wale nyokananwakathi hixa himatpiranyehixyawakapwu, hma kojwakahchinikanuxyawakanupa wipirana tshinanu.

Paulo Kihler-pirana Ranjiyehitna Éfeso Hajene Piranapni

²³ Nanjitlu Wuru Hoyakalu hiyrun-koxa Wutsrukate Jesus Cristo renejyawakaphi, hixa moletkakatshinhi, kihlehchinikanu rixkajyawakaphi hiyrun-koxa hamotkajyawakapa hixa satkakhi hiyrun-koxa pnut-potu Hoyakalu halixyawaka nanjita renejyawakaphi.

²⁴ Hiyrun-koxa nanjitlu Hoyakalu, Hoyakalu hihlenu renekachale renejyawakaphi hixa ptowrunekhi Wutsrukate Jesus Cristo hichinikhohnekanatatshinephi.