Efésios 5 - Bíblia

Hoyakalu Whenene Hiwekle Piranapni

¹ Hoyakalu whenenhi, ruchinikanunhi. Hiyáhoni Hoyakalu pixka hixahchinikanutanu.

² Xye chinikantshi ptowru wiwejinri htowuta. Hichinikanuwyehkakanu. Hixa hichinikanuwkakleyehixyawaka pixka rixa Cristo, renejyanawa rupniywaka hixa tshinanu renekachaxnatkawa henekachaluru rixnatkawa hatewa phamluhalo phamluro pixka potuko hixatshritkani Hoyakalu hetanuya hiyrun-koxa henekachaluru hiylatkaluru Hoyakalu hikchikhihlenutanru potuko.

³ Hoyakalunerunhi hixyawaka tshinanu, hi hapoklewatanu hiyrun-koxa ptowru kaptsholu, hiyrun-koxa ptowruka het-sotanuhowlu hikeklu hohne hpohiwkakanhi.

⁴ Hi hektutu tokantshi kapatmenuru hyanumaxinixka, hi tokantshichako, hi koxa hixpirannutshi tokantshiko. Klu tshinanu wan-hixatshri hi kihleru seyni halikaka himalwutanru Hoyakalu.

⁵ Klu tshinanu himatanru xye: hi satukna yineru kapoklewakleru, hi mpowratuko, hi ksotanuholuko — waleni mayawletshichako munanhatshri — hi satukna wanna yoptotanru rawyawakna Cristo pohirewaxyawaka, Hoyakalunu.

⁶ Xako hike yineru yokwijetanhi tokantshi mal-himaluya. Klu tshinanu xyekaka ntshinakanatanru kamhatshine Hoyakalu hapnokatanna wanna hektuwaka kamhatshine.

⁷ Hiyáhoni hi yokwijrewpiratatshineyma hyananutka.

⁸ Klu tshinanu hix-koxa mapchahawaka yapjekanata mitshikananu seyni xawakni Hoyakalunerune hixyawaka tshinanu katawaka hyaninixka. Hiyáhoni hiwekanu katawaka hiwejikatshine pixka.

⁹ Klu tshinanu katal-hixlu ptowru hixatshri hihlentshi poyahokakleni, halikak-potu.

¹⁰ Hijhanru klunerukta rukchikhihlenreru Wutsrukate Hoyakalu.

¹¹ Hi himotsatanna malechawaka kamrurewaxikatshine. Waleni mapchahawaka hajeru kamrurtshi. Seyni halikaka xye kamrurtshikaka phujewaka hitakanru.

¹² Halikaka wunkaklexinri wanna kamrure hektutu hyohimpirrerna pirana hpatetjetanna.

¹³ Ptowru potuko katawaka rekhixiko rimathexikowaka hanu potu rixa.

¹⁴ Klu tshinanu ptowru potuko hiphujetkalurni katawakaya. Hiyáhoni mitshikawlur-pirana wan-tshina: “Pixa himkatshriyi, puyokanu xako! Hipnatshri yehi puchpajinixka, Cristo Katalu nikotyehitanyi.”

¹⁵ Hiyáhoni xakoka. Hislahpotuxinwa hanu hixa hiwekletanu. Hi mimatjemkane pixka hixa hiwekletanu seyni jimatkalurune pixka hixa hiwekletanu.

¹⁶ Hiwekka pchinika hi hetachaxinwa, klu tshinanu xye hohnekaka katsepna yine hektutu kamhatshine.

¹⁷ Hiyáhoni hi mahchinikanunephi seyni Wutsrukate Cristo halujyawaka himatjematshinephi.

¹⁸ Hi katshwuhalo himetatshinephi. Klu tshinanu himri towutle himtuklewata. Seyni halikaka hitshitanru Hoyakalu Hiwejikaluru towuxyawakhi.

¹⁹ Hiynumsakakanu Hoyakalu tokanu chikaleya, himalwuru chikaleya, pimrikaka chikaltshi Hoyakalu Hiwejikaluruya. Himalwutanru Wutsrukate Cristo, himalwutanru hihchinikanuya.

²⁰ Ptowru hohneruka himalwutanru Hoyakalu, Hirtshi Hoyakalu, ptowru potuko tshinanu, Wutsrukate Jesus Cristo hiwakaya.

²¹ Cristo kahwajikol-tshinanu hyijnakkakanu.

Hanu Rumukata Hixa Hiwekleta Hnurtshi, Hhanunroyma Cristo Halixatshine Rixyawaka Tshinanna Piranapni

²² Suxone hyijnakotanna hixako hhanuru. Tsru Hixikatshriwa Cristo hixa yijnakolexyawakako pixka.

²³ Klu tshinanu suxo thanuru tojiwukni wale. Waneko pixka rixa Cristo. Cristo towutna halixatshine hapatjetatshine. Cristo-katkani halixatshine hapatjetatshine hiwekkakatshri. Wannakatkani Cristo mane.

²⁴ Cristo halixatshine hapatjetatshine yijnakotlu Cristo hiyáhoni waneko pixka raluk-hixletna hnunrotshine. Hhanurna hyijnakotanna ptowron-potuko suxone.

²⁵ Hixa jejinhi hamotanna hhanunrone, Cristo pixka. Cristo hichinikna hapatjetatshine Cristo halixatshine. Hiyáhoni renejnawa rupniywaka wanna kachrijru.

²⁶ Wan-rixa Cristo, hapatjetatshine Cristo halixatshine hatatjewa Cristo hnunropni, kanipretkalurotkani Hoyakaluya. Cristo herokalo honhaya, htokanuya hpowratlo.

²⁷ Xye hkamha Cristo, rumukata heneklexnawakwa hix-yehiya, hixa hatatjewa hhanunrone, kihleron-potpakwu, maptsholemtatopni potukalo hike mukolukanutopni, hixa hapatjetatshine Cristo halixatshinwu.

²⁸ Waneko pixka raluk-hixletna hnurtshine. Rumukata hichinikletna hhanunrone wannako himaneko pixka. Jeji hanuruktako hijhalu ruchinijyawaklo hhanunro wale nanuko ruchinijnawakwa pixka.

²⁹ Klu tshinanu hike yineru wale nanuko hayehixmanexnawa. Seyni halikaka ruslahmanexnawa. Cristo waneko pixka rixna ralixjene hapatjetatshine.

³⁰ Klu tshinanu hixa satkakwu Cristo mane psojitwu.

³¹ Wane htshina yonatkaluru potukalu mitshikawlur-pirana: “Wale tshinanu jeji hichotlu ruru, runro, hiyáhoni satu manepkalu hhanunroyma.”

³² Halikakalutu hijhakaluru pirana runkakleta xye hima. Waleni Cristo, hiyrun-koxa Cristo halixatshine hapatjetatshine mkoje pejnu piranni.

³³ Hiyrunu hixa tshinan-koxni wale pirana. Satkakhi hixa jejinhi hijhalu hhanunro ruchinijyawaka wale nanuko ruchinijnawakwa pixka. Hiyrunu suxo hijhalu tkahwakpiraxyawaklu thanuru.