Efésios 3 - Bíblia

Paulo Kamrure Piranapni Judeu Mixkane Tskalaya

¹ Xye hikolukle tshinanu, hita Paulo-no, preso hajerno Jesus Cristo hitshre tshinanu. Hixa judeu mixkanhi nepixyawakapa.

² Hix-hetko jempiranyehitlu Hoyakalu henejya tshinanno xye kamrurtshi renekno hixa tshinanupa.

³ Hoyakalu hekhitno hkamhanrupa pirana yohimakanatkaluru. Wale pirana rimatjemkakno. Xye pirana mitshikananu nyonata psotsonu tokantshi hixa tshinanupa.

⁴ Wale het-yonhaxini himatjemanru Cristo pirana yohimakanatkaluru nimatleru.

⁵ Mitshikananu xye yohimakanatkaluru pirana hi renekna rimaxyawakna yine wale pirana, xawakni pixka. Seyni xawakni Hoyakalu hekhitna nuretkalune wale tokantshi hiphujetatshine hiyrun-koxa nuretkalune htokanu hinkakletatshine rekhita, Hoyakalu Hiwejikaluruya.

⁶ Xyekni tokantshi yohimakanatkaluru. Kihle piranalu potuko hiwekkaklewatatshri pirana tshinanu, judeu mixkane kwawaklena judeu-neruneyma Hoyakalu henekanwu kihler-pirana. Judeu mixkane Jesus mane psojitnina judeu-neruneyma. Hiyrun-koxa Hoyakalu judeu-nerune runkaklexinri judeu-nerune mixkanen-koxatkani Jesus Cristo tshinanuya.

⁷ Hoyakalu, hixa ruchinijyawaka tshinanu, rutakno Cristo pirana, hiwekkaklewatatshri pirana, jinkakletakleru nixyawaka, Hoyakalu tsru pixkonu rixle tshinanu.

⁸ Hita mpomujhakotpotno ptowruneka Hoyakalu hayineteneya. Wanepnawaka Hoyakalu henekno xye poyikowlu judeu mixkane nunkajyawaklu kihler-pirana potuko, tsru pohirewnalu honra Cristo henekwu.

⁹ Hiyrun-koxa renekno nimatjemkajyawakna ptowru neruka hanu potu rixa yohimakanatatshri pirana, Hoyakalu hixa hichinikanretlexyawakna pirana. Klu tshinanu Hoyakalu ptowru potuko hiyakotatshri ptowru papkokananuko mitshikananu hi ruphujetakanatlu xye pirana yohimakanatkaluru.

¹⁰ Hiyáhoni xawakni Cristo halixatshine hapatjetatshine tshinanu tsrukakalune hiyrun-koxa tsru hitakkalune malehohnewaka hwatshine rimathetanruna ptowruka hixatshri Hoyakalu himatkalewle.

¹¹ Ruchinikanrexyawak-potuko rixa kamhaletlu Hoyakalu honra mitshikawako raluka kamhalexyawaka hnikata kamhaletlu rixa hichinikanretlexyawaka rixa yokanretlu Wutsrukate Jesus Cristo-ya.

¹² Jesus Cristo wmunanhal-tshinanu hi wpika. Hiyahokni kihlehchinikanwu hiyrunu kihle hapoklepwu Hoyakalu nwaka Jesus Cristo walixyawaka tshinanu.

¹³ Wale tshinanu nanjithi hi hihrokanu hixa tshinanu nsalewniywaka. Klu tshinanu waleni hixa hepixjeru.

¹⁴ Wale tshinanu nyoptsojityehitlu Wuru Hoyakalu nanjihohnexyawaka.

¹⁵ Ptowru nerukananuko tenhohne hwatshine xkehkaka Hoyakalu hiwaka renekkana hiyrun-koxa yine tshiji hwatshine xkehkaka renekka.

¹⁶ Nanjitlu Hoyakalu repixyawakapna yine rimwaleru tsrur-potuko tshinanu, renejyawakhi, hixa nanwaka hmixkowaxinripa, pixkontshi Hoyakalu Hiwejikaluru tshinanu.

¹⁷ Nanjitkoxlu hixa halixle tshinanu, Cristo himukata hwahajretanhi. Hiyrun-koxa nanjitlu ruchiniklewle hmixkoxyawakaphi hiyrun-koxa hpoyehiwkajyawakaphi,

¹⁸ wan-hixatshinekni himukata himatjemlepotutlu ptowruka Hoyakalu homkahitatshineyma Cristo hichiniklewle. Himaxyawakaplu htsernu, rowuknu, htennu hiyrunu hi pchini hitokotlu htennu Cristo hichinijyawakwu.

¹⁹ Hiyáhoni nanjitlu himaxyawaklu Cristo hichiniklewle, hixa wihchinikanu pnuterut-potni wale, Hoyakalu himukata tsepotlexyawakaplu hiwejikaluru wiwekleya psol-potuko.

²⁰ Hiyáhoni xawakni rimalwutko Hoyakalu, hpixkonu tshinanu, wmixkotjeru wiwejinriya, rumukata kamhaletanru pnut-potu wanjixyalu ho wuchinikanretleru.

²¹ Himalwutkalurupni Hoyakalu, Cristo halixatshine hapatjetatshineya Cristo Jesus tshinanu ptowru papkoko mnikawnakatupni. Seyoka.