Efésios 2 - Bíblia

Hipuktshi Yehi Ruchpajyawaka Riwejyawaka Piranapni

¹ Mitshikananu hipnatshine pixka hixakanata Hoyakalu tokanu hmajnakowakanaxyawaka tshinanu, hektunu tshinanu.

² Waneklu papko xye tshiji hixjexyawaka hektutu homkahjekanata, hixa halixjekanatlu tsru hitakkalune metkone hektune malehohnewaka hajene towutatshri. Walekatkani ptowruneka Hoyakalu malixkane towutatshri.

³ Halikaka mitshikananu ptowrunekwu wanna pixka hixjekanatatshinwu, womkahjekanatlu hixako wixjexyawaka. Wkamhajekanatlu wimaneko hiyrun-koxa wihchinikanu halujyawakako. Hiyáhoni hix-koxa pimrineko pixka wixa kahwaklekanatlu Hoyakalu hapnokatlewle.

⁴ Seyni Hoyakalu hetwamonre tshinanu tsru potuko hiyrun-koxa ruchinijyawakwu tsru potuko.

⁵ Wale tshinanu Hoyakaluya, hipnakanatatshinwu wixjekanata wmalixlenu tshinanu, Hoyakalu, Cristo walixyawaka tshinanu, riwekkakwu. Klu tshinanu Hoyakalu henekachale tsonu tshinanu wiwekkakka.

⁶ Cristo-yma hipuktshi riwekkajyatkawu hiyáhoni Cristo Jesus-yma tsru hitakkaluru tenhohne hwatshri Hoyakalu henekwu.

⁷ Hoyakalu wan-rixa rekhixyawakna hiwekatshinepa pa hohnechakananu hinatshripa hi psokananru renekachaxyana retwamonutkal-tshinanna Cristo Jesus-ya.

⁸ Klu tshinanu Hoyakalu himukatle reneklewle hiwekkakatkahi Jesus halixikowaka tshinanni. Hiyrunu hi hixako wuhlenu tshinanu riwekkakwu seyni Hoyakalu henekachale tshinanu tsonu wiweka.

⁹ Hi wkamrure tshinanni, hi satukna halixkoxinwa.

¹⁰ Klu tshinanu Hoyakalu hiyakotwu Jesus Cristo-ya kihleru wkamhiywakapa. Kihleru wkamhin-honra mitshikawako ralpokotatkalu hixa tshinanu wkamhiywakaplu kihleru.

Cristo-ymalune Pa Hchinikanurune Piranapni

¹¹ Judeu mixkane hixjexyawaka tshinanu, mjiprojhikanwa tshinkalunhi judeu-neya. Jiprojhal-pirana wale yine kamrure tsonni. Hichinikanru mitshikananu hkamrure.

¹² Waneklu papko hixa Cristo kotspalakanathi. Hi Hoyakalu hayinetene nuretkalune hixakanata seyni kahnete hajene hixakanata. Hi Hoyakalu hinkakletanru pirana yoptotatshine hixakanata, Hoyakalu hinkakletpiranachakanaxiklúkona hinerune tsonu. Hiyáhoni hike wkahwakakanata Hoyakalu yehiya. Xye tshiji hiwekle hiwekakanaxya seyni moyakalutenhi hixapa.

¹³ Seyni xawakni Jesus Cristo-ymalunhi hixyawaka tshinanu hixa mitshikananu Hoyakalu yehi howuka hwakanatatshinhi hapokastsitlu Hoyakalu, Cristo hipnale tshinanu.

¹⁴ Hiyáhoni Cristo-kni wapnanuhchinikankakjeru. Walekni judeu-ne hiyrunu judeu mixkane pa nerupka rixkakna. Cristo mane henekachaluru tshinanu Hoyakalu herutlu hkaniprexikolu hepi neru hixkaklewakanatatshri himuklujtakakjekanatanru.

¹⁵ Cristo, waleko himaneyma, nikatlu judeu-nerune hiykoxikolu piranakananu Moisés yonreru piranni, himaletlewakanatatshri pirana. Hiyáhoni hepi nerukananu pa nerupka rixkaka. Rimatletkakna Cristo tshinanuya.

¹⁶ Cruz rupniywaka tshinanu Cristo nikatlu hahnanuwlu. Cruz tshinanu hepi neru pa nerupka rixatkana. Hiyáhoni Hoyakalu nwaka hsatkakatkawu.

¹⁷ Rapoka Cristo. Runkakletlu kihler-potuko tokantshi ptowru yineru tshinanu, rimatletlewle pirana. Hixa, judeu mixkanhi, Hoyakalu nwaka howuka hwakanaxikatshine, runkaklexya rimatletlewle pirana hiyrun-koxa judeu-ne walestsi hwakanatatshin-koxa runkaklexya.

¹⁸ Cristo tshinanu, hixa ptowrunekwu, judeu-neru hiyrun-koxa judeu mixkanhi, wumukata yanwakletlu Hoyakalu, Hirtshi wtshinreru nwaka, Hoyakalu Hiwejikaluruya satupkalutu.

¹⁹ Hiyáhoni xawakni hixa judeu mixkanhi, hi kahnete hajenetkahi. Hi koxa Hoyakalu mimatletanunetkahi. Seyni xawakni Hoyakalu kotspalatanune nuretkalune nerutkahi. Hiyrun-koxa hixa satkaka Hoyakalu molenetkahi.

²⁰ Hixa pantshi sotlu kamhikolu pixkalunhi. Jesus pirana hiphujetatshine nuretkalune hiyrun-koxa Hoyakalu tokanu hinkakletatshine hoho panawaxikatshinhi. Poyehir-hoho panawaxikatshinhi. Hiyrun-koxa Jesus Cristo-kni sotlu hijhakaluru pixkalut-potu, psolupjiko poyehiwkakatshri.

²¹ Jesus Cristo-kni hihnanutatshri hpotukatlu htseruwnakaklu pantshi. Repixlu htseruwniywaka Hoyakalu hwiywaka potukalu rixyawakapa, Wutsrukatepji rixinripa.

²² Hiyahokni hix-koxa, Cristo-ymalunhi, pantshinhi pimrineymakananuko, Hoyakalu hwiywaka hixyawakapa, Hoyakalu Hiwejikaluru pixkonu tshinanu.