Colossenses 4 - Bíblia

¹ Hixa ktowutaklerunhi hihle hetletanna hkamrurewkakjetanune hiyrunu htshinyawak-potuko hixanna. Himatanu hix-koxa tenhohne rawyahi htowutjeru Wutsrukate Cristo.

Hiykolukaka Piranapni

² Hi hituk-hanjihohneretanu. Hi himnanhanu hanjihohnereya. Hoyakalu hpoyahnutanu.

³ Hanjihohnexini hix-koxa hanjihohneyehitanu, Hoyakalu himukata hikchika yapawaklexyawakapwu wunkaklexyawakaplu Cristo pirana mpohitakanatkotu pirana. Cristo pirana npohitle tshinanu kapna nutakka.

⁴ Hanjihohneyehitanno phujetanuwaka potuko ntshina hinkakletlexyawakaplu hiwekkaklewatatshri pirana rixpiranaxyawak-potuko.

⁵ Himatkalnuyma hiwekanu malixkane hetanuya. Hiwekka pchinika hi hetachaxinwa.

⁶ Htokanu ptowru hohneruka kihleru tokantshi hyanumaxini, chinikantshi hepixatshri tokantshiko, himat-hihixyawakapna hepomhakjene ptowruneka.

Tíquico Hiyrunu Onésimo Tshinkalune Hyokananwakaxyawakna Paulo Piranapni

⁷ Wuchinikanru Cristo tshinanu wmoletanru Tíquico tshinkaluru, kamrurewatatshri halikak-potuko, wimotslu Tsru Hixikatshriwa Cristo kamrure tshinanu, hinkakanhi hita nopirana psoluka.

⁸ Wale tshinanukni wale nyokananwakathi hixa himatpiranyehixyawakapwu, hixa hapnanuhchinikanuxyawakapa.

Haliklewlu Piranapni

⁹ Waleymalu Onésimo tshinkaluru, Cristo tshinanu wmoletanru, wuchinikanru potuko poyehi halixleru, hix-yehi hichpajikatshrini. Wanna hinkakanhi ptowruka hewi hajeru pirana.

¹⁰ Aristarco tshinkaluru hitayma preso hwa ralikanwakathi. Hiyrun-koxa Marcos tshinkaluru Barnabé tshinkaluru palikleru halikhi. Marcos pirana mitshi nunkakatkahi hanu potu hixanru. Wale yanwakaxiniphi kihle hixa yoptoletanru.

¹¹ Josué koxa Potukalu tshinkaluru halikanwakathi. Nyi mapa jejine tsonu judeu-ne halixatshine pejnu nikamrurewatjene Hoyakalu pohirewaxyawaka tshinanu. Nyi hepixpotutatkano.

¹² Epafras, satutnaka hix-yehi hichpajikatshritka, Cristo towreru halikhi. Hi rutuk-hanjihohneyehrethi seyni ranjijetlu Hoyakalu hpoyehiwa halixlekakanhi, tsrune rixkakanhi halixlewluya, psoluka Hoyakalu halukanru hixa tshinanu.

¹³ Klu tshinanu hitni hapak-hetatshrino repixlewaxinri hixa repixyawaka tshinanu hiyrun-koxa Laodiceia hajene hiyrunu Hierápolis hajene tshinanu.

¹⁴ Lucas tshinkaluru halikanwakathi. Wale honra kpinrewakleru wuchinikanru potuko. Hiyrunu Demas tshinkaluru halikanwakathi.

¹⁵ Walikanwakatna Cristo tshinanu wmoletanune Laodiceia poktshi hajene hiyrunu Ninfa tshinkaluro, hiyrunu Cristo halixatshine hapatjetatshine walapji hapatjexikatshine.

¹⁶ Hixa hali hethalexinro twu yonawahlo waneya Cristo halixatshine hapatjetatshine Laodiceia poktshi hajene hethakjixanro yonawahlo. Yonawahlo Laodiceia hajene tshinanu nyokanrero, hix-koxa het-yonhatanro xako.

¹⁷ Hiyrun-koxa wla htshinanru Arquipo tshinkaluru: Pujha kamhalpotutanru kamrurtshi penejikolu Tsru Hixikatshriwa Cristo kamrureya, ppoyahokajyawakaplu.

Haliklu Hmahleta

¹⁸ Hitni Paulo-no halikhi. Hitako yonatlo twu. Hi hamtakanno hostutkalurutkano. Nanjitlu Hoyakalu, Hoyakalu hihlenu henekachaleymapyi.