Colossenses 3 - Bíblia

Cristo Hoyaknu Yehi Hwatshine Piranapni

¹ Hiyáhoni Cristo-yma wiwejinixka wujhanru tenhohne hajerkak-pirana, Cristo hwiywaka hwatshri, Hoyakalu potukle sreta tuplatatshri.

² Tenhohne hajerkak-pirana hichinikanretanu. Hi xye tshijne hajeru pirankaka hichinikanretanu.

³ Klu tshinanu hipnatshinetka pixkalunhi hiyrunu hixa hiwejinri Cristo-ymalu, Hoyakalu yohimlenetkahi.

⁴ Hixa wiwejinri halikakalutu Cristo-ni. Waneya ruphujewninipa Cristo hix-koxa hiphujewnanu waleyma royaknu yehi.

Wiwejinri Mitshikawluru Herotexikolu Piranapni

⁵ Hiyáhoni hkamakatanru mantshi het-sotanrerkaka xye tshijne hajeru, hapoklewlu, kapatmenuru, kapnoka makawleru, hektutu haluklu, hiyrunu sotanuhonutshi, walekni mayawletshicha munanhikolu.

⁶ Klu tshinanu xyekaka tshinanu runa Hoyakalu hapnokatlewle hmajnakowyehitjene tshinanu.

⁷ Hix-koxa xyekaka hkamhajekanata wan-hixa homkahrejekanaxini mitshi.

⁸ Seyni xawakni hixa haluk-hiknokletanru xyekaka ptowruka: jhekantshi, hahxalu, hapatlewlu, hektuwaka htshinanwakaxyawaklu Hoyakalu, kapatmenuru hyanumaxyawaka.

⁹ Hi hyokwikakanu. Klu tshinanu hixa hiknokatkalu mitshikananu hixantshi hkamhajekanatanruymakananuko.

¹⁰ Herotu hitajinixkawa. Waleni chinikantshi herotexikolu. Rerotetjetlu wihchinikanu haté Hoyakalu wuyakotjeru hchinikanu psoluka wapkapanu.

¹¹ Hiyáhoni xawakni hi kakojerune hkahwakkatka ho judeu mixkane, ho judeu-ne, ho mjiprojhikanwa, hi jiprojhikatshriwa, ho pa tokanu yanumaxikatshriko, ho kajituko, ho towrertshiko, ho mtowutkotuko. Klu tshinanu ptowrukni Cristo-nu hiyrunu Cristo-kni ptowruko.

Jesus Cristo Hiwaka Himwatshri Hixyawaka Piranapni

¹² Hoyakalu hayinetenetkahi. Hihchinikanunetkahi. Hnurethi walenuko hixyawakpatka. Hiyáhoni hixa hijhalu hyochmajnawakwa hetwamonrewluya, hichiniklewluya, mturu hixnawakwa, mchiretannutshi, kahwakachluya.

¹³ Hakotachakakanu, hkaspukahchinikankakyehitanu satu yineru kojwajinhi. Cristo kaspukahchinikanyehixyawakhi pixka hixanu hixa.

¹⁴ Waneya xyekaka pnute hyokakanru pimrine hichinijyawaka. Klu tshinanu hichiniklewlu ptowruka hpoyahokaka.

¹⁵ Hitshitanru Hoyakalu wapnanuhchinikankakjeru kosejyawaklu hixa hchinikanu. Klu tshinanu tshanixkalunhi hapnanuhchinikanru tshinanu pa manepka hixyawakapa. Hiyrunu hpoyahnutlewjetanu.

¹⁶ Hitshitanru Cristo tokanu himwiywakhi psoluka ptowru himatkaltshiya. Hasrukkakanu, hiykokakanu Hoyakalu tokanu chikaltshiyma hiyrunu himalwuru chikaleyma hiyrun-koxa pimrikaka chikaltshiyma. Hoyakalu Hiwejikaluruya hchikalewatanu. Hchikalewaxini Hoyakalu tshinanuya hpoyahnutanru hajiya.

¹⁷ Hiyrun-koxa kluneruktako hkamhini ho kluneruktako hyanumaxini wan-hixanu Tsru Hixikatshriwa Jesus hiwaka himwatshine pixka. Himalwutanru Wuru Hoyakalu Cristo tshinanuya.

Wixa Hiweklexyawakapa Herotu Hiwekluya Piranapni

¹⁸ Suxone yijnakotanna wannako hhanurna, Wutsrukate Cristo halujyawaka pixka.

¹⁹ Hnurtshine hamotanna hhanunrone. Hi himtuwnakakanna hhanunrone.

²⁰ Whentshine yijnakotanna rurune, runrona ptowru potuyako klu tshinanu xyekni Wutsrukate Cristo halujyawaka.

²¹ Hirtshine hi himtuwnakakanna hwuhenene hma mamernuwaxyawakanupna.

²² Towrertshine xako yijnakotanna htowutjene xye tshijne hajene ptowru potuko hjemlerna. Hi htowutjene hetanu tsonu kajnakophi hyokwijechaxyawaka tshinanupna. Seyni psoluka hihchinikanu mixkonuyma hkamhanru Hoyakalu halujyawaka, Hoyakalu kahwakpirlu tshinanu.

²³ Hiyrun-koxa kihle hchinikanurunhi kamrurewatanu hatatjewa hi yine towutlenhi seyni Wutsrukate Cristo towutlenhi.

²⁴ Hichinikanru xye, hyoptotanru hkamrure wenru hixanupa Wutsrukate Cristo henekanhi. Klu tshinanu hixa Wutsrukate Cristo towrenhi.

²⁵ Seyni hektutu kamhatshri yoptotanru hwenuxikolu hkamrure hektutu tshinanu. Klu tshinanu payakalunephi Hoyakaluya.