Colossenses 2 - Bíblia

Paulo Colossos Hajene Ruchinikanrexyawaka Piranapni

¹ Klu tshinanu naluklu hixa himaxyawaklu hi psokananu nixa kamrurewleta hixa tshinanu hiyrun-koxa Laodiceia poktshi hwatshine tshinanu. Hiyrun-koxa pimrine ptowruneka hita mimathetkane tshinan-koxa.

² Wane nixa kamrurewleta ptowrunek-yine nmixkotahchinikanuxyawakapa hiyrun-koxa pa hchinikanurune potuko rixyawakapna ruchiniklewjexyawakapna. Hiyrun-koxa rimatpotuxyawakapna psoluka pohirewnalu Cristo-ya ptowru potuko hmixkonuyma. Hiyáhoni xye tshinanu hixa himukata himatlepotutlu, himatkaltshi halikak-potuko Hoyakalu yohimakanatanru pirana tshinanu mpikkanephi. Waleni Cristo.

³ Ptowruko kwenuru himretakanatkaluru himatkaltshi hiyrunu himatjemlu Hoyakalunni Cristo tsonu rimatyehixikatka.

⁴ Waneya wla ntshinanhi: Hi hitshitanna yine hyokwixyawakaphi kihleru tokantshiyma.

⁵ Klu tshinanu yáholu hi wanetkano nomaneya seyni nohchinikanuya wane nwiya hix-yehi. Numuwleyma netlu hixa kihle pokolunhi hiyrun-koxa hixa halixle poyeh-potuko Cristo-ya.

Paulo Haluklu Htserutahalixlexyawakapna Colossos Hajene Piranapni

⁶ Hiyáhoni mitshikananu hixa yoptolexyawaklu Tsru Hixikatshriwa Jesus Cristo pixka hixa homkahretanru.

⁷ Poyehirunephi Cristo-ya. Cristo hoho panawaxikatshine pixkalunephi. Halixlewlu pirana homkahpotutatshinephi. Xye ptowruka hasrukkatka hiyáhoni Cristo tshinanu htseruwna poyahnuwletanu.

Cristo Pirana Hasruklewatatshine Yahole Hislahinwa Piranapni

⁸ Xakoka hike yineru kachitanhi yine hchinikanucha hipiranachakaka yokwijrewatatshri pirana hike mkochpakkatu piranayma. Xye hasruklewlu xye tshijne hajene hchinikanuko ruchpajya hiyrunu kamtshine towre chinikantshi runya. Seyni hi Cristo runya wale pixkalutu hasruklewlu.

⁹ Klu tshinanu ptowruka Hoyakalu hixannu pso potuko Cristo mane hitokote rawa.

¹⁰ Hiweklu hike mmahaxikatu henekka Cristo-ya. Ptowru hiwejikalune tsru hitakkalunemka hiyrunu hiwejikalune tsrukakalunemka ptowruneka tsru hitakkalur-potni Cristo.

¹¹ Jiprojhikatshinwahi Cristo hetanuya. Hi yinemyoyma jiprojhikatshinwahi. Seyni Cristo jiprojhatkawu. Walekni kochpajyano nomane hektunu towutlewleya.

¹² Waleyma kapnatkalunhi batiza-xikoluyma. H-batiza-tkoklun-koxa Cristo-yma hiwekkaka hipuktshiya hixa halixle tshinanu Hoyakalu kamrure himukatlewatatshri tshinanuya Cristo hiwekkakjeru hipuktshiya.

¹³ Hixa hipnakanatatshinhi hixa hektunu tshinanu hiyrunu mjiprojhakanhi Cristo-yma hiwekkakalunhi. Hoyakalu hamtakahchinikanyehixyatkahi hixa hektunu ptowruka.

¹⁴ Hcheyitlu w-deve-kanatanru m-deve-tkane rixkakwu. Hektutu wumtukakanatjeru, wjihyehjekanatjeru yonatkaluruya hcheyita Hoyakalu. Ruchyapotutatkalu w-conta-te klu tshinanu cruz rixpatatkalu.

Hkahwakpirakanatanrukaka Yapkapletlu Hinatshripa Cristo Piranapni

¹⁵ Hiyrun-koxa tsrukakalune hiyrunu tsru hitakkalune himukatle konko. Rumukatlena hkonyana Cristo cruz-ya. Wanna ramtakkakanune rekhita ptowruko hetanu rimathexikowaka ramtakkakatkana.

¹⁶ Hiyáhoni hike yineru xako hiykotanhi nikalu tshinanu ho hirkaluru tshinanu ho kahwakpiratkalur-hohnekak-pirana tshinanu, ho rehonotle ksurkak-piranaya ho hapnanuxikalur-hohnekak-piranaya.

¹⁷ Xye hiykolu pirana hinatshripa pirana mayawlechani. Seyni hakanhatshri potukni halikaka Cristo.

¹⁸ Hi pimrine heyikakjixinwa ralixkowle tshinanna. Ho hetkalurkaka tenhohne hichpajikatshri retler-himna ho mturu rutajnawakwa pirana hasruklewatatshri ho hiwejikalune Hoyakalu towrene tenhohne hajene kahwakpirru pirana hasruklewatatshri. Xye pixkalutu yineru malechawaka halixkoxikatshriwa waleko himane hihchinikanu homkahitatshrini.

¹⁹ Xyekaka pixkalutu hi Cristo jiwu pixkalutuymalutni. Cristo haptowru mankaklewatatshri, mantshi psojitkaka hyokaka, psotsonujijkaka hepixka, pa manepka rixyawakapa. Satkaka mantshi psojite tserutka tserutlewatatshri Hoyakaluya.

Cristo-yma Wupniywaka Wiwejyawaka Piranapni

²⁰ Hiyáhoni Cristo-yma hipnatshine pixka hixinixka xye tshijne towutlewle tshinanuya. Klu tshinanhe xawaka xye tshijne hiwekakanaxini pixka hixa towutletkawa? Hiyáhoni klu tshinanhe homkahitawalu xyekaka hiykolukaka?

²¹ Hiyakolukaka wla tshinatshri: Hi pyotnekanru, ho hi pnikanru, ho hi pkachitanru.

²² Xyekaka ptowruka nikawninripa. Xyekaka yineko hiykolukakachani hiyrunu yineko hasruklewlechani.

²³ Xyekaka halikaka himatkalnutshi rixahotka. Hoyakalu towrene tenhohne hajene hkahwakpirakjixna ho mturu hitajnawakwa pirana ho wimane wsalewnakajyawaka pirana. Seyni xyekaka hi psojikna repixlu wimane het-sotanre rasujyawaka.