Atos 3 - Bíblia

Myankatu Hitskalajikolu Piranapni

¹ Pa hohne kayi nwaka três hora hanjihohneru papko, Pedro, João Hoyakalupji nwaka hyana.

² Ptowru hohneruka satu jeji hmatureyakawa myankatu Hoyakalupji hiphaptote kihlewaka tshinkalurustsi rutakjetka. Wan-rutakluna myankatu tiyiro ranjixyawakapna hiphapto jihlokatshinepa.

³ Waneya myankatu hetna Pedro, João Hoyakalupji hjihlokamxyawakna. Tiyiro ranjita renejikowakapa.

⁴ Waneya Pedro, João-yma yopukhatlu waneya Pedro wan-tshinru: — Petanwu!

⁵ Waneya myankatu hetpotutna. Hkahwakakanatlu pa hixanu hkayaxyawaka.

⁶ Waneya Pedro wan-tshinru: — Tiyiro hi nwiya seyni pa hixanu nimwa. Wale nimwaleru nenekanyi. Xawakni Jesus Cristo Nazaré hajeru hiwakaya tshinanu ppalnanu! Pyanu!

⁷ Waneya Pedro myankatu myo hpotukle hkachita. Hpalnakaklu. Waneklukawa hixkojixitkalu hiyrun-koxa hihpeji hixkoyatkalu.

⁸ Waneya ruptemta, hyotunota waneya hyinuwaka yanretatka. Waneya Hoyakalupji hjihlokatka wannayma. Hyanamtatka, ruptemtatka. Rimalwumtlu Hoyakalu.

⁹ Ptowru yineru het-yanretlu, rimalwumtlu Hoyakalu.

¹⁰ Waneya rimathexinixkaluna, Hoyakalupji Hiphaptote Kihlewaka tshinkalurustsi tuplajekanatatshri rixyawaka, tiyiro hanjijekanatatshri rixyawaka rimyekna. Rimyekpotutna wan-rixinixka.

Pedro Hoyakalupji Hinkaklewaxyawaka Piranapni

¹¹ Waneya myankatukananu hihlexikolutka himotsatna Pedro, João. Ptowrunek-yine himyeka. Hixolune hasukamta wanna nwaka Hoyakalupji psojite Salomão tshinikowaka nwaka hya hasuklexkehimtna.

¹² Waneya rexinna Pedro wan-rixyawakna yine, wane htshinna yine: — Jejine israel-nerune, haklu tshinanhe himyeka? Haklu tshinanhe hixa yopukhatwu hatatjewa hixako wpixkonu tshinanu ho wuhlenu tshinanu wyankakatkalu xye jeji?

¹³ Wutsrukatenni Hoyakalute, Abraão-ni, Isaque-ni, Jacó-ni Hoyakalute, walekni tsru hitakkaluru reneklu htowreru Jesus. Seyni hixa nomolenhi hkamnitlu Jesus hiyrunu Jesus Pilatos tshinkaluru hoji sreta rawakanaxini, Pilatos kaspukpiratmaklu Jesus seyni hixa nomolenhi hi hinanchitlu.

¹⁴ Hiyáhoni hixa nomolenhi hi halixlu Potukalu Poyahokakatshri, seyni hixa Pilatos hanjita jiylalewakleru ruchoxyawakapa.

¹⁵ Hixa nomolenhi hiylatatkalu hiweklu heneklewatatshri seyni Hoyakalu hiwekkakatnaklu hiyrunu hixa hetpotutlu xye ptowruka.

¹⁶ Jesus hiwaka ralixyawaka tshinanu rutskalakkatka xye jeji hiyrun-koxa xye hiwaka pixkonu tshinanuko renek-mixkonutlu xye jeji myankatukananu hixa hetamtanru, himatanru hyanyawaka. Hehe, Jesus ralixyawaka tshinanu renekkatka pomtalu rixyawakpatka hixa hetanuya.

¹⁷ Seyni xawakni, nomolene, nimatlu hixa hiyrunu hixa tsrukakalutene wan-hixlu Jesus hma mimatkan-tshinanna.

¹⁸ Seyni Hoyakalu kamhalu wale runkaklewjixanru ptowruneka Hoyakalu tokanu hinkakletatshine namaya, Messias hijhalu hsalewniywaka.

¹⁹ Hiyáhoni hehchinikanutanu xako, hyokmakahchinikanutanu waneya hiknojiko hektunu.

²⁰ Hiyrun-koxa rapojinipa pixkontshi papko Hoyakalu yokanre, Jesus yokanatko, mitshikananu hixa tshinanu rutakka Messias rixyawaka.

²¹ Jesus hijhalu tenhohne rutujyawaka haté rapokpapkoluxini ptowruka herotetko wane htshina hinkakleta Hoyakalu mitshikawako nuretkalune Hoyakalu tokanu hinkakletatshine namaya.

²² Klu tshinanu Moisés-ni wan-tshinatka: “Tsru Hixikatshriwa Hoyakalu yokanatanru hixa tshinanu satu Hoyakalu tokanu hinkakletatshri, hita pixka rixanu pimolene ruchpajini. Hyijnakotanru xako wale ptowruko runkajyahi.

²³ Katukta hi yijnakotanru wale, Hoyakalu tokanu hinkakletatshri, hkotspalatko yine tskalaya hiyrunu hnikatko.”

²⁴ Ptowruneka Hoyakalu tokanu hinkakletatshine Samuel-ni klukananuko haté hapkatatatshine ptowruneka hinkakletpiranatlu wale pirana, hinkaklewatatshine runkakletpiranatluna xye hohnekaka pirana.

²⁵ Hipirana psoluka Hoyakalu hinkaklexyana Hoyakalu tokanu hinkakletatshine hix-koxa runkaklexyatkalu. Hix-koxa hkojireta Hoyakalu, Hoyakalu hkojirexinnina hixa hitsrukatenni wane htshinniru Abraão-ni: “Ptowru tshijne hajene hihlewahchinikanyehitko piklopichane tshinanu.”

²⁶ Hiyáhoni Hoyakalu hali hiwekkaklexinixkalu Hituru, Hoyakalu yokanhapkatlu hix-yehi, ruhlewahchinikanyehixyawakaphi, hixa satkakhi hichoxyawakaplu hektuntshi hwaleru.