Apocalipse 9 - Bíblia

Cinco Rixinri Kowi Hima Piranapni

¹ Waneya cinco rixinri hiwejikaluru Hoyakalu towreru tenhohne hajeru kowitatka. Waneya netlu satu katahiri tenhohne hijrujikatshri, tshiji hapokatshri. Teno pnawaka kotpukapre renekka katahiri.

² Teno pnawaka hiple hkotpuka katahiri. Waneya teno pnawaka ruchpajya tsru tshitshipha, hsana yoxijikolu pixka. Hiyáhoni tkatshi katalu hkatshpoka hiyrunu malehohnewaka hitshpokatka tshitshipha teno pnawaka hichpajikatshri tshinanu.

³ Tshitshipha hitokote ruchpajya tsetserune. Tshij-hoho rapoka. Renekpixkonutka tsetserune runokalewaxyawakapa heklo xye tshijne hwatshro pixka rixanna.

⁴ Htshin-towutlexikowakna hi hocha, hi hahmuna, hi satukna pole sureruko tumtujyawakapa seyni yine, Hoyakalu himaxikole jrottshi hitakkaluru mwikane tsonuko hsaletanna halikaka tsetserune.

⁵ Hi titshitka tsetseru nyi yinni tuylaxyawakapa seyni t-saletachapotuxyawakapna cinco ksuru pejnu tsonu. Yine heklo hinojinna saletle pixka.

⁶ Waneklu papkomka ralukanruna rupniywakapna yinepni seyni hi rumukatanruna. Ranjitanmakluna rupniywakapna seyni hipuktshi hasujinna.

⁷ Tsetserune cavalo-ne yahotkaklu himalpokotkalune pixka rixahotkana. Sahyi ouro kamhikaluru pohirtshi hitakjetanru pixkalutu hwajiwutna. Hihojna yineru hoji pixka rixhojitna.

⁸ Hijiwutsna suxo jiwutsa pixka rixa. Hiyhina leão yhi pixka rixayhitna tsetserune.

⁹ Statshi hinotatshri rutaklerna yomuwa kamhikolu chpata pixkalutni. Himejna sejire hixolune cavalo-ne carro-ne kosetatshine yahotkaklu nwaka hyinna pixka htshinhimata, himejna.

¹⁰ Hihchina, heklo hchi pixka rixa. Hinokalewapni hihchina hwatshri. Hihchina kmixkonru yine hsalexyawakapna cinco ksuru pejnu.

¹¹ Kpohirna. Htowutjerna hiwejikaluru teno pnawaka hinotatshrikni wale. Hiwakni judeu-neru tokanuya, Abadom tshinkaluru seyni grego-neru tokanuya Apolião tshinkalurni. (Raluka tshinreta, knikatakleru.)

¹² Mitshikananu salewaktshi hiknohatka. Seyni hjemanu! Hepi salewaktshi hapokatshripa mahatawa.

Seis Rixinri Kowi Hima Piranapni

¹³ Waneya seis rixinri hiwejikaluru Hoyakalu towreru tenhohne hajeru kowitatka. Waneya tokantshi nyijnakota. Kapajiru henekachalu yoxikkaluru hitajikowaka, ouro kamhikolu hwatshri, quarto hwa mayawle Hoyakalu hoji sreta hwatshri ruchpaktokanuxya.

¹⁴ Wla htshinatkalu tokantshi, seis rixinri hiwejikaluru Hoyakalu towreru tenhohne hajeru, kowi himwatshri: — Puchotanna hiwejikalune Hoyakalu towrerune tenhohne hajene, quatro tsru wenu Eufrates wenne tshinikowakastsi hostutkalune.

¹⁵ Waneya ruchotkatkana hiwejikalune Hoyakalu towrerune tenhohne hajene quatro. Nyi quatro Hoyakalu halpoklenni wale papko potuko tshinanu, wale hwalapu, wale ksuru, wale hora potuko tshinanupa yine ruylaxyawakapna, satupka mapate (1/3) yine pejnu.

¹⁶ Soldado-ne pejnu njempiranata, cavalo-ne yapatshine pejnu. Duzentos milhões pejnu himna.

¹⁷ Netna cavalo-ne hiyrunu wanna yapatshine neta, nupnale pixkalutu nexyana. Statshi hinotatshri chpata serolu tshitshmero pixkalutu, katshino polnuru sotlu safira pixkalutu hiyrunu pwalolu enxofre pixkalutu hwastatna. Cavalo-ne leão jiwu pixka rixjiwutna hiyrun-koxa tshitshmero, tshitshipha hiyrunu enxofre hichpaka namaxyana cavalo-ne.

¹⁸ Satupka mapate (1/3) yinni hiylatkana xye mapa saletlu tshinanu, tshitshmero tshinanu, tshitshipha tshinanu hiyrunu enxofre tshinanu. Cavalo-ne nama hichpajikatshri.

¹⁹ Klu tshinanu cavalo-ne himukatle hinama rawa hiyrunu hihchina rawa. Hihchina himnune pixka rixna, kajiwru. Waleyma hsaletanna yinni.

²⁰ Seyni pimrine yine hixetatshine xyekaka saletlu muylatkanune, hi rehchinikanyehitluna wannako hkamrurna: hi ruchotluna kamtshine romkahixyawakna, hi mayawletshicha ouro ho prata ho bronze, ho sotlu, ho hahmuna kamhikolu metkatu, majnakotu, myankatu hi rutuk-homkahretna.

²¹ Hiyrun-koxa hi rehchinikanyehitluna ruylalewlena, hi hkahontshiwlekna, hi rapoklewlekna, hi htshowhuwlekna rehchinikanuxyana.