Apocalipse 8 - Bíblia

Sete Rixinri Yonawahlo Steno Hosture Jimlaklu Hiyrunu Sete Kowi Hima Piranapni

¹ Waneya Carneiro Whene tshinkaluru yonawahlo steno hosture sete rixinri hkotpujinixka, meia hora pchini hetko potshke rixa tenhohneya.

² Waneya netna hiwejikalune Hoyakalu towrerune tenhohne hajene sete, wanna honukla Hoyakalu hoji sreta hwahohnekanatatshine. Sete kowi henekkalune.

³ Waneya satu hiwejikaluru Hoyakalu towreru tenhohne hajeru hina. Henekachalu hitajikowaka pajistsi hyopkaka. Ranikamtlu phamlu pahiru stono, ouro kamhikaluru. Hixo phamlu pahiru renekka. Hoyakalu nurrene ralixjene hanjihohnere ptowru potuka, phamlu pahiruyma henekachalu paji hoho, Hoyakalu tuplawakle hinaple hwatshri, ouro kamhikaluru paji hoho rutaklu, henekachlu rixikowakapa.

⁴ Waneya hiwejikaluru Hoyakalu towreru tenhohne hajeru myo hwatshriya, hpalnaphata phamlu pahiru pha, Hoyakalu nurrene ralixjene hanjihohnereyma. Hoyakalu hetan-yehi hpalnaphaxya.

⁵ Waneya hiwejikaluru Hoyakalu towreru tenhohne hajeru kachitlu phamlu pahiru stono, tshitshime wane htsepoxya, henekachalu paji yehi hwatshriya. Waneya tshij-hoho ruknokatkalu phamlu pahiru stono. Waneya rawatka tokantshi himkaka, rutlohlekaka, rawraklekaka hiyrun-koxa tshiji hiyolika.

⁶ Waneya hiwejikalune Hoyakalu towrerune tenhohne hajene sete halpokoxnawa kowi hyanumkajyawakapna.

Mitshikananu Kowi Hima Piranapni

⁷ Waneya mitshikananu hiwejikaluru Hoyakalu towreru tenhohne hajeru kowitatka. Waneya sotluha hiyrun-koxa tshitshmero hrahtshi yapjetatshri tshij-hoho ruknokkatka. Hiyáhoni satupka mapate (1/3) hocha halha hiyrunu ptowruka kaptsheru poleru halhana.

Hepi Rixinri Kowi Hima Piranapni

⁸ Waneya hepi rixinri hiwejikaluru Hoyakalu towreru tenhohne hajeru kowitatka. Waneya satu pa hixanu tenopjita pixkalutu halhatshri mar powha hitoko ruknokatka. Waneya satupka mapate mar powha hrahtshi rixnatkawa.

⁹ Satupka mapate (1/3) mar powha hwatshine, hiwekatshine hipnana. Hiyrun-koxa satupka mapate (1/3) kanawkaka himtukkatka.

Mapa Rixinri Kowi Hima Piranapni

¹⁰ Waneya mapa rixinri hiwejikaluru Hoyakalu towreru tenhohne hajeru kowitatka. Waneya satu katahiri tsrur-potuko tsru kat-merolu pixkalutu tenhohne ruchpakhalhalemxya. Satupka mapate (1/3) wenkaka hiyrunu hakophakaka rapokana.

¹¹ Katahiri hiwakni Kchana Kapsahalu. Waneyakni satupka mapate (1/3) honha kchana kapsahalu rixnatkawa. Hiyáhoni hixolune yinni hipnana honha tshinanu klu tshinanu kapsahalutkalu.

Quatro Rixinri Kowi Hima Piranapni

¹² Waneya quatro rixinri hiwejikaluru Hoyakalu towreru tenhohne hajeru kowitatka. Satupka mapate (1/3) tkatshi, satupka mapate (1/3) ksuru hiyrunu satupka mapate (1/3) katahiri katalu himtuwnakakkatka. Hiyáhoni satupka mapate hohi hi tnikotatka tkatshi hiyrunu hoyetshno satupka mapate (1/3) hi katatka ksuru hi katahiriko kata wane pchinika.

¹³ Waneya netatkalu. Tsru paktsha tenhohne palnikatshri teno potu, neta. Njemlu hyanumaxyawaka tsru tokantshi yanumaxikatshri wla tshinatshri: — Kyowikowak-potuklu, kyowikowak-potuklu, kyowikowak-potuko rawna xye tshijne hwatshine pimri kowi himkaka, hiwejikalune Hoyakalu towrerune tenhohne hajene mapa kowitatshinpatka tshinanu.